Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 54

Jesu—“Senkgwa sa Bophelo”

Jesu—“Senkgwa sa Bophelo”

JOHANE 6:25-48

  • JESU KE “SENKGWA SE SE TŠWAGO LEGODIMONG”

Ka thoko ya bohlabela bja Lewatle la Galilea, Jesu ka mohlolo o ile a fepa batho ba dikete gomme a phonyokga ge ba be ba nyaka go mo dira kgoši. Bošegong bjoo o ile a sepela lewatleng leo le nago le ledimo gomme a phološa Petro, yoo le yena a ilego a sepela godimo ga meetse eupša a thoma go nwelela ge tumelo ya gagwe e fokola. Jesu o ile a ba a homotša phefo, mohlomongwe a šireletša barutiwa ba gagwe gore ba se robegelwe ke sekepe.

Bjale Jesu o boetše thokong ya ka bodikela ya lewatle, e lego tikologong ya Kaperenaume. Bao a ilego a ba fepa ka mohlolo ba a mo hwetša gomme ba botšiša gore: “O tlile neng mo?” Ge Jesu a ba kgalema, o bolela gore ba tlile go mo nyaka feela ka gobane ba letetše go fepša gape. O ba kgothaletša gore ba se ke ba “šomela dijo tše di senyegago, eupša [ba] šomele dijo tše di dulago go iša bophelong bjo bo sa felego.” Ka gona ba botšiša gore: “Re tla dira’ng gore re dire mediro ya Modimo?”—Johane 6:25-28.

Ba ka ba ba nagana ka mediro yeo e ngwadilwego Molaong, eupša Jesu o ba bontšha modiro o bohlokwahlokwa, o re: “Modiro wa Modimo ke wo, gore le bontšhe tumelo go yena yo a romilwego ke Yoo.” Lega go le bjalo, batho ga ba bontšhe tumelo yeo go Jesu, go sa šetšwe dilo ka moka tšeo a di dirilego. Ba nyaka gore a dire pontšho e le gore ba ka dumela go yena. Ba botšiša gore: “Ke modiro ofe wo o ka o dirago? Borakgolokhukhu ba rena ba jele manna lešokeng, go etša ge go ngwadilwe gwa thwe: ‘O ba neile senkgwa se se tšwago legodimong gore ba je.’”—Johane 6:29-31; Psalme 78:24.

Mabapi le go kgopela ga bona pontšho, Jesu o šupa batho Mothopong wa kgonthe wa go dira mehlolo, o re: “Ruriruri ke re go lena, Moshe ga se a le nea senkgwa se se tšwago legodimong, eupša Tate o le nea senkgwa sa kgonthe se se tšwago legodimong. Gobane senkgwa sa Modimo ke yo a theogago legodimong gomme a nea lefase bophelo.” Ka ge ba sa kwešiše seo a se bolelago, ba lopa ka gore: “Morena, o re nee senkgwa se ka mehla.” (Johane 6:32-34) Lega go le bjalo, ke “senkgwa” sefe seo Jesu a bolelago ka sona?

O hlalosa gore: “Ke nna senkgwa sa bophelo. Yo a tlago go nna a ka se ke a swarwa ke tlala le gatee, gomme yo a dumelago go nna a ka se ke a nyorwa le gatee. Eupša ke itše go lena, le bile le mpone eupša ga le dumele. . . . Ke theogile legodimong, e sego go tlo dira thato ya ka, eupša go dira thato ya yo a nthomilego. Ye ke thato ya yo a nthomilego, gore ke se ke ka lahlegelwa le ke o tee go bohle bao a nneilego bona, eupša gore ke ba tsoše letšatšing la mafelelo. Gobane thato ya Tate ke ye, gore yo mongwe le yo mongwe yo a lemogago Morwa a dumela go yena, a be le bophelo bjo bo sa felego.”—Johane 6:35-40.

Se se galefiša batho gomme Bajuda ba thoma go ngongorega ka yena. A ka bolela bjang gore ke “senkgwa se se theogilego legodimong”? (Johane 6:41) Ba tšea Jesu e fo ba morwa wa batswadi bao e lego batho ba motseng wa Natsaretha wa Galilea. Batho ba botšiša gore: “Na yo ga se Jesu morwa wa Josefa, yo tatagwe le mmagwe re ba tsebago?”—Johane 6:42.

Jesu o araba ka gore: “Tlogelang go ngongorega seng sa lena. Ga go motho yo a ka tlago go nna ge a sa gogwe ke Tate yo a nthomilego; le gona ke tla mo tsoša letšatšing la mafelelo. Go ngwadilwe Baporofeteng gwa thwe: ‘Ka moka ba tla rutwa ke Jehofa.’ Yo mongwe le yo mongwe yo a kwelego Tate gomme a ithuta o tla go nna. Ga se gore go na le motho yo a bonego Tate, ge e se yo a tšwago go Modimo; yo ke yena a bonego Tate. Ruriruri ke re go lena: Yo a dumelago o na le bophelo bjo bo sa felego.”—Johane 6:43-47; Jesaya 54:13.

Pejana ge Jesu a be a bolela le Nikodemo, o ile a bolela ka bophelo bjo bo sa felego gomme a bo tswalanya le go bontšha tumelo go Morwa wa motho, a re: “Yo mongwe le yo mongwe yo a dumelago go [Morwa wa Modimo yo a tswetšwego a nnoši] a be le bophelo bjo bo sa felego.” (Johane 3:15, 16) Eupša bjale o bolela le batho ba bantši kudu gomme o ba botša gore o kgatha tema e bohlokwa go hwetšeng ga bona bophelo bjo bo sa felego, bjoo bo ka se newego ke manna goba senkgwa seo se hwetšagalago ka boati kua Galilea. Ka gona bophelo bjo bo sa felego bo ka hwetšwa bjang? Jesu o bušeletša mantšu a gagwe, o re: “Ke nna senkgwa sa bophelo.”—Johane 6:48.

Poledišano ye ya mabapi le senkgwa se se tšwago legodimong e tšwela pele go fihla seremong sa yona ge Jesu a ruta sinagogeng kua Kaperenaume.