Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 53

Mmuši yo a Kgonago go Laola Dilo tša Tlhago

Mmuši yo a Kgonago go Laola Dilo tša Tlhago

MATEO 14:22-36 MAREKA 6:45-56 JOHANE 6:14-25

  • BATHO BA NYAKA GO DIRA JESU KGOŠI

  • JESU O SEPELA GODIMO GA MEETSE, O HOMOTŠA PHEFO

Go fepa ga Jesu batho ba dikete ka mohlolo go kgoma maphelo a batho e le ruri. Ba phetha ka gore “ka kgonthe yo ke moporofeta yo a bego a tlo tla lefaseng,” e lego Mesia, le gore ruri e be e tla ba mmuši yo a swanelegago. (Johane 6:14; Doiteronomio 18:18) Ka gona batho ba loga maano a go swara Jesu gore ba mo dire kgoši.

Lega go le bjalo, Jesu o lemoga maano ao batho ba a logago. O phatlalatša mašaba gomme o laela barutiwa ba gagwe gore ba tsene ka sekepeng sa bona. Ba lebile kae? Ba lebile thokong ya Betsaida ke moka ba ya Kaperenaume. Jesu o a tloga o ya thabeng gore a yo rapela a le noši bošegong bjoo.

Jesu o bona sekepe se le kgojana ka seetša sa ngwedi pejana ga masa. Maphoto a lewatle a be a bethwa ke phefo e matla gomme baapostola ba ‘swere bothata bja go hudua sekepe ka ge ba lebane le phefo.’ (Mareka 6:48) Jesu o fologa thabeng gomme o thoma go sepela godimo ga maphoto, a lebile go bona. Bjale ba be ba “sesitše monabo wa mo e ka bago dikhilomithara tše hlano goba tše tshelelago.” (Johane 6:19) Barutiwa ba bona eka Jesu o a ba feta gomme ba goeletša ba tšhogile ba re: “Ke seriti!”—Mareka 6:49.

Jesu o araba ka tsela ya go kgothatša o re: “Tiang matla! Ke nna; le se boife.” Eupša Petro o re: “Morena, ge e ba e le wena, ntaele gore ke tle go wena ke sepela godimo ga meetse.” Jesu o araba ka gore: “Tlaa!” Ka nako yeo, Petro o fologa sekepeng a sepela godimo ga meetse a eya go Jesu. Eupša ge Petro a lebelela ledimo, a tšhoga gomme a thoma go nwelela. A goeletša a re: “Morena, mphološe!” Ge Jesu a otlolla seatla sa gagwe, o swara Petro gomme o re: “Wena wa tumelo e nyenyane, ke ka baka la’ng o fentšwe ke pelaelo?”—Mateo 14:27-31.

Petro le Jesu ba tsena ka sekepeng gomme phefo e a okobala. Barutiwa ba maketše, eupša na ba swanetše go makala? Ge nkabe ba kwešišitše “seo ba bego ba swanetše go ithuta sona ka mohlolo wola wa dinkgwa,” e lego mohlolo woo Jesu a o dirilego diiri tše sego kae pejana ge a fepa ba dikete, gona ba be ba sa swanela go makala ge ba mmona a sepela godimo ga meetse gomme a homotša phefo. Bjale ba a mo khunamela gomme ba re: “Ruri o Morwa wa Modimo.”—Mareka 6:52; Mateo 14:33.

Go se go ye kae ba fihla molaleng o mobotse wo o tšweletšago dienywa wa Genetsareta wo o lego ka borwa bja Kaperenaume. Ba emiša sekepe moo gomme ba ya lebopong. Batho ba lemoga Jesu gomme bona le ba bangwe ba tikologong ba tliša bao ba babjago go yena. Ge bao ba babjago ba kgwatha morumo wa seaparo sa gagwe sa ka ntle, ba fola ka mo go feletšego.

Mo nakong ye, lešaba leo le bonego ge go fepša ba dikete ka mohlolo le lemoga gore Jesu o sepetše. Ka gona ge diketswana tšeo di tšwago Tiberiase di fihla, batho ba a di namela gomme ba ya Kaperenaume go yo nyaka Jesu. Ge ba mo hwetša, ba botšiša gore: “Rabi, o tlile neng mo?” (Johane 6:25) Jesu o a ba kgalema, a dira se ka lebaka leo le kwagalago, bjalo ka ge re tla bona.