Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 62

Thuto e Bohlokwa ya Boikokobetšo

Thuto e Bohlokwa ya Boikokobetšo

MATEO 17:22–18:5 MAREKA 9:30-37 LUKA 9:43-48

  • JESU O BOLELA GAPE E SA LE PELE KA LEHU LA GAGWE

  • O LEFA LEKGETHO KA TŠHELETE YA TŠHIPI E TŠWAGO MOLOMONG WA HLAPI

  • KE MANG YO E TLAGO GO BA YO MOGOLO KUDU MMUŠONG?

Ka morago ga gore Jesu a fetoge ponagalo le go fodiša mošemane yo a nago le motemona tikologong ya Kesarea Filipi, o leba Kaperenaume. O sepela a sa bonwe a na le barutiwa ba gagwe, e le gore mašaba a se “tsebe.” (Mareka 9:30) Se se mo nea sebaka se sengwe sa gore a hlamele barutiwa ba gagwe lehu la gagwe le modiro woo ba tlago go o dira ka morago ga moo. O hlalosa gore: “Morwa wa motho o tla ekwa gomme a gafelwa diatleng tša batho, ba tla mmolaya ke moka ka letšatši la boraro o tla tsošwa.”—Mateo 17:22, 23.

Taba yeo ga se ya swanela go makatša barutiwa ba gagwe. Pejana Jesu o boletše ka go bolawa ga gagwe, gaešita le ge Petro a ile a gana go dumela gore se se be se tla direga. (Mateo 16:21, 22) Le gona baapostola ba bararo ba bone ge a fetoga ponagalo gomme ba kwa poledišano ya mabapi le “go tloga” ga Jesu. (Luka 9:31) Bjale balatedi ba gagwe ba “kwa bohloko kudu” ka seo Jesu a se bolelago, gaešita le ge ba sa kwešiše ka botlalo seo se bolelwago ke mantšu a gagwe. (Mateo 17:23) Lega go le bjalo, ba tšhaba go mmotšiša dipotšišo tše dingwe ka seo.

Ge nako e dutše e eya ba fihla Kaperenaume, e lego moo Jesu a direlago mediro ya gagwe gona e bile e le motse wo baapostola ba mmalwa ba tšwago go wona. Ge ba le moo, banna bao ba kgoboketšago lekgetho la tempeleng ba tla go Petro. Mohlomongwe e le ge ba leka go latofatša Jesu ka go se lefe makgetho, ba botšiša ba re: “Na morutiši wa lena ga a ntšhe lekgetho la tempeleng?”—Mateo 17:24.

Petro o araba ka gore: “Ee.” Ge Jesu a a le ntlong, o šetše a tseba seo se diregilego. Ka gona go e na le gore Jesu a emele Petro go bolela ka taba yeo, o botšiša gore: “O nagana’ng Simone? Ke go bomang moo magoši a lefase a hwetšago ditshwanelo goba lekgetho la go ntšhwa ke motho yo mongwe le yo mongwe? Na ke go barwa ba bona goba go batho ba bangwe?” Petro o araba ka gore: “Go batho ba bangwe.” Ge a re’alo Jesu o re: “Ka gona, barwa ga ba ntšhe lekgetho.”—Mateo 17:25, 26.

Tatago Jesu ke Kgoši ya legohle le Yoo a rapelwago tempeleng. Ka baka leo, ka molao ga go nyakege gore Morwa wa Modimo a lefe lekgetho la tempeleng. Jesu o re: “Eupša gore re se ba kgopiše, wena eya lewatleng, o lahlele kgwega gomme o tšee hlapi ya pele e tšwago, ge o bula molomo wa yona, o tla hwetša tšhelete ya tšhipi [terakema]. O e tšee o ba nee yona o ntšhetše nna le wena lekgetho.”—Mateo 17:27.

Go se go ye kae ke ge barutiwa ba kopane, gomme ba botšiša Jesu mabapi le gore ke mang yo e bego e tla ba yo mogolo kudu Mmušong. Ga se kgale ge banna ba ba be ba tšhaba go botšiša Jesu mabapi le lehu la gagwe leo le batamelago, eupša bjale ga ba tšhabe go bolela le yena ka bokamoso bja bona. Jesu o tseba seo ba se naganago. Ke selo seo ba bego ba dutše ba ngangišana ka sona ge ba dutše ba etla ba latela Jesu leetong la bona la go boela Kaperenaume. Ka gona o botšiša ka gore: “Ke’ng seo le bego le ngangišana ka sona tseleng?” (Mareka 9:33) Ba swerwe ke dihlong, barutiwa ba a homola ka gobane ba be ba ngangišana mabapi le gore ke mang yo mogolo kudu go ba feta. Mafelelong, baapostola ba botšiša Jesu potšišo yeo ba bego ba dutše ba e ahlaahla, ba re: “Gabotsebotse ke mang yo mogolo kudu Mmušong wa magodimo?”—Mateo 18:1.

Go bonagala go makatša gore barutiwa ba be ba ka ba le ngangišano e bjalo ka morago ga gore ba fetše nywaga e ka bago e meraro ba šeditše Jesu le go mo kwa a bolela. Lega go le bjalo, ga se ba phethagala. E bile ba goletše tikologong ya bodumedi moo go gatelelwago taba ya boemo le maemo. Go feta moo, Petro o be a sa tšwa go kwa Jesu a mo holofetša “dinotlelo” tše itšego tša Mmušo. Na a ka ba a ikwa a phagametše ba bangwe? Jakobo le Johane ba ka ikwa ka tsela e swanago, ka ge ba be ba iponetše ka mahlo ge Jesu a fetoga ponagalo.

Go sa šetšwe gore boemo ke bofe, Jesu o tšea kgato ya go lokiša pono ya bona. O bitša ngwana, o mo emiša gare ga bona, gomme o botša barutiwa ba gagwe gore: “Ka ntle le gore le sokologe gomme le be bjalo ka bana ba banyenyane, le ka se tsene Mmušong wa magodimo le gatee. Ka baka leo, mang le mang yo a tlago go ikokobetša go swana le ngwana yo bjalo, ke yena yo mogolo kudu Mmušong wa magodimo, mang le mang yo a amogelago ngwana yo bjalo yo monyenyane ka baka la leina la ka, le nna o a nkamogela.”—Mateo 18:3-5.

A mohlala o kgahlišago gakaakang wa go ruta! Jesu ga a galefele barutiwa ba gagwe le go ba bitša gore ba na le megabaru goba ba rata maemo. Go e na le moo, o diriša mohlala go ba ruta. Bana ba banyenyane ga ba na maemo a phagamego goba botumo le gatee. Ka go re’alo Jesu o bontšha gore barutiwa ba gagwe ba swanetše go itebelela ka tsela ye. Ke moka Jesu o phetha thuto ye ya barutiwa ba gagwe, o re: “Yo a itshwarago bjalo ka yo monyenyane gare ga lena, ke yena yo mogolo.”—Luka 9:48.