Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 40

Thuto Mabapi le go Lebalela

Thuto Mabapi le go Lebalela

LUKA 7:36-50

  • MOSADI WA MODIRADIBE O TŠHELA DINAO TŠA JESU KA MAKHURA

  • TEBALELO E SWANTŠHWA KA MOADIMI

Go ithekgile ka seo se lego dipelong tša bona, batho ba arabela ka go se swane go seo Jesu a se bolelago le seo a se dirago. Seo se bonagala gabotse ntlong e nngwe ya kua Galilea. Mofarisei yo a bitšwago Simone o laletša Jesu dijong, mohlomongwe e le gore a tsebe gakaone motho yo yo a dirago mediro e makatšago. Mohlomongwe a tšea se e le sebaka sa gore a bolele le bao ba lego moo, Jesu o a dumela, bjalo ka ge a ile a dira dinakong tše dingwe ge a be a amogetše ditaletšo tša go ja le balekgetho le badiradibe.

Lega go le bjalo, Jesu ga a hwetše tlhokomelo e botse yeo ka tlwaelo e newago baeng. Ditseleng tša marole kua Palestina, dinao tšeo di rwelego diramphašane di kwa phišo le go šilafala, ka gona go hlapiša dinao tša moeng ka meetse a go tonya ke tiro e tlwaelegilego ya go amogela baeng. Jesu ga a direlwe seo. Ga a newe le katlo ya go mo amogela bjalo ka ge go tlwaetšwe. Mokgwa o mongwe ke wa go tšhela meriri ya moeng ka makhura e le tiro ya botho le ya go amogela baeng. Le se Jesu ga a se direlwe. Ka gona, na re ka re o amogetšwe?

Ge baeng ba dutše tafoleng, ba thoma go ja. Ge ba sa ja, mosadi o tsena ka setu ka phapošing a se a laletšwa. O “tsebja motseng gore ke modiradibe.” (Luka 7:37) Batho ka moka ba sa phethagalago ke badiradibe, lega go le bjalo mosadi yo o bonagala a phela bophelo bjo bo gobogilego, mohlomongwe e le mogweba-ka-mmele. A ka ba a kwele ka dithuto tša Jesu, go akaretša le taletšo ya gagwe ya gore ‘bohle bao ba imelwago ba tle go yena gore ba lapološwe.’ (Mateo 11:28, 29) Mohlomongwe a tutueditšwe ke mantšu le ditiro tša Jesu, ga bjale o mo hweditše.

O tšwelela ka morago ga Jesu tafoleng gomme a khunama dinaong tša gagwe. Megokgo ya gagwe e tšhologela dinaong tša Jesu, gomme o e phumola ka moriri wa gagwe. O atla dinao tša gagwe ka borutho gomme a di tšhela ka makhura a monko o bose ao a tlilego le ona. Simone o bogela seo ka go se rate, pelong ya gagwe a ipotša gore: “Motho yo ge nkabe e be e le moporofeta, o be a tla tseba gore mosadi yo a mo kgwathago ke mang le gore ke motho wa mohuta ofe, a tseba gore ke modiradibe.”—Luka 7:39.

Jesu ka go lemoga seo Simone a se naganago, o re: “Simone, ke na le seo ke ratago go go botša sona.” Yena a araba a re: “Morutiši, se bolele!” Jesu o tšwela pele o re: “Banna ba babedi ba be ba na le molato go moadimiši yo a itšego; yo mongwe o be a na le molato wa ditenariase tše makgolohlano, eupša yo mongwe e le wa tše masomehlano. Ge ba be ba se na seo ba ka mo lefelelago ka sona, a ba lebalela bobedi bja bona ka bolokologi. Ka gona, ke ofe go bona yo a tlago go mo rata kudu?” Mohlomongwe Simone o araba ka go se bontšhe kgahlego, o re: “Ke bona gore e tla ba yo a mo lebaletšego molato o mogolo.”—Luka 7:40-43.

Jesu o dumelelana le seo. Ke moka a lebeletše mosadi yoo, o re go Simone: “Na o bona mosadi yo? Ke tsene ntlong ya gago; ga se wa mpha meetse bakeng sa dinao tša ka. Eupša mosadi yo o kolobišitše dinao tša ka ka megokgo ya gagwe gomme a di phumola ka moriri wa hlogo ya gagwe. Ga se wa nkatla; eupša mosadi yo go tloga nakong yeo ke tsenego ka yona, ga se a ka a lesa go atla dinao tša ka ka borutho. Ga se wa tlotša hlogo ya ka ka makhura, eupša mosadi yo o tloditše dinao tša ka ka makhura a monko o bose.” Jesu o be a bona gore mosadi yo o be a bontšha go itshola go tšwa pelong bakeng sa bophelo bja gagwe bjo bo gobogilego. Ka gona o phetha ka gore: “Ke go botša gore dibe tša gagwe le ge e ba e le tše dintši gakaakang, di lebaletšwe, gobane o bontšhitše lerato le legolo, eupša yo a lebaletšwego ganyenyane, o bontšha lerato le lenyenyane.”—Luka 7:44-47.

Jesu ga a phaele ka thoko taba ya boitshwaro bjo bo gobogilego. Go e na le moo, o bontšha go kwešiša ga gagwe ka kwelobohloko batho bao ba dirago dibe tše dikgolo eupša e le bao ka morago ba bontšhago gore ba a itshola gomme ba retologela go Kriste gore ba imollwe. Ka gona mosadi yo o ikwa a imologile kudu ge Jesu a re: “Dibe tša gago di lebaletšwe. . . . Tumelo ya gago e go phološitše; sepela ka khutšo.”—Luka 7:48, 50.

Ithute ka mo go oketšegilego

Na Dibe tša Rena di ka Lebalelwa?

Na Modimo o lebalela gaešita le dibe tše dikgolo? Re swanetše go dira’ng ge e ba re nyaka go amogelwa ke Modimo?

‘Jehofa o le Lebaletše ka Bolokologi’

Modimo o ikemišeditše go lebalela badiradibe bao ba itsholago. Seo se swanetše go kgoma bjang tsela yeo re swarago ba bangwe ka yona? Ke ka baka la’ng go lebalela go le bohlokwa gakaakaa?

Lebalelanang ka Bolokologi

Naganang kamoo re ka ekišago mohlala wa Jehofa wa go ikemišetša go lebalela.