Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 25

O Fodiša Molephera ka Kwelobohloko

O Fodiša Molephera ka Kwelobohloko

MATEO 8:1-4 MAREKA 1:40-45 LUKA 5:12-16

  • JESU O FODIŠA MOLEPHERA

Ge Jesu le barutiwa ba gagwe ba bane ba bolela “disinagogeng tša . . . Galilea ka moka,” ditaba tša mabapi le dilo tše di kgahlišago tšeo Jesu a di dirago di phatlalala gohle. (Mareka 1:39) Pego ya mabapi le mediro ya gagwe e fihla motseng o mongwe moo go nago le monna yo a swerwego ke lephera. Ngaka Luka e mo hlalosa e le yo a ‘tletšego lephera.’ (Luka 5:12) Bolwetši bjo bjo bo boifišago ge bo dutše bo keka bo golofatša ditho tše fapafapanego tša mmele ganyenyane-ganyenyane.

Ka gona boemo bja molephera yo bo bohloko gomme o swanetše gore a dule kgole le ba bangwe. Le gona, o swanetše gore ge batho ba le kgauswi a goeletše a re “Ga se ka hlweka, ga se ka hlweka!” gomme ka go re’alo a ba thibele gore ba se mmatamele kudu gomme ba fetelwa ke bolwetši bjoo. (Lefitiko 13:45, 46) Eupša molephera yo bjale o dira’ng? O batamela Jesu gomme a wela fase ka sefahlego, a mo kgopela a re: “Morena, ge feela o rata, o ka ntlhwekiša.”—Mateo 8:2.

Ruri monna yo o na le tumelo go Jesu! Le gona bolwetši bja gagwe bo swanetše go ba bo mo dira gore a bonagale a hlomola pelo! Jesu o tla arabela bjang? Nkabe o ile wa dira’ng ge e ba o be o le moo? A tutueditšwe ke kwelobohloko, Jesu o otlolla letsogo la gagwe a kgwatha monna yoo. Jesu o re go yena: “Ke a rata. Hlweka.” (Mateo 8:3) Le ge go ka ba go le thata gore ba bangwe ba dumele, gateetee lephera le a hwelela monneng yo a babjago.

Na o ka rata go ba le kgoši e kwelago bohloko le e nago le bokgoni go swana le Jesu? Tsela yeo a swarago molephera yo ka yona e re kgonthišetša gore ge Jesu e le Kgoši ya lefase ka moka, go tla phethagala boporofeta bjo bja Beibele bjo bo rego: “O tla kwela mmotlana le modiidi bohloko, o tla phološa meoya ya badiidi.” (Psalme 72:13) Ee, ka nako yeo Jesu o tla phethagatša kganyogo ya pelo ya gagwe ya go thuša bohle bao ba tlaišegago.

Gopola gore le pele molephera yo a ka fodišwa, bodiredi bja Jesu bo be bo dutše bo thabiša batho kudu. Bjale batho ba tla kwa ka selo se seo se kgahlišago se a se dirilego. Lega go le bjalo, Jesu ga a nyake batho ba dumela go yena feela motheong wa dipego tšeo di bolelwago. O tseba boporofeta bjo bo rego “a ka se kwatše lentšu la gagwe mokgotheng,” ke gore, ka tsela e nngwe e makatšago. (Jesaya 42:1, 2) Ka baka leo, Jesu o laela molephera yo a fodišitšwego o re: “O bone gore o se ke wa botša motho, eupša eya o iponagatše go moperisita, o dire sebego sa mpho seo Moshe a se beilego.”—Mateo 8:4.

Lega go le bjalo, ka ge o ka akanya, monna yo ga a kgone go homola ka seo se sa tšwago go diragala ka ge a thabišitšwe kudu ke gore o fodišitšwe. O a sepela gomme a phatlalatša taba yeo gohle. Seo se tsoša kgahlego e oketšegilego bathong gotee le kganyogo ya go nyaka go tseba. Taba ye e fihla bokgoleng bja gore Jesu a se sa kgona go tsena motseng phatlalatša. Ka gona o tšea nakwana a dula mafelong ao a lego lekatana moo go sa dulego motho. Lega go le bjalo, batho ba go tšwa mathokong ohle ba tla go yena gore a ba rute le go ba fodiša.