Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 61

Jesu o Fodiša Mošemane yo a Nago le Motemona

Jesu o Fodiša Mošemane yo a Nago le Motemona

MATEO 17:14-20 MAREKA 9:14-29 LUKA 9:37-43

  • GO NYAKEGA TUMELO E MATLA BAKENG SA GO FODIŠA MOŠEMANE YO A NAGO LE MOTEMONA

Ge Jesu, Petro, Jakobo le Johane ba theoga thabeng, ba gahlana le lešaba le legolo. Go na le bothata. Bamangwalo ba kgobokanetše barutiwa, ba ngangišana le bona. Batho ba tloga ba makaletše go bona Jesu gomme ba kitimela go mo dumediša. Jesu o botšiša ka gore: “Le ngangišana le bona ka eng?”—Mareka 9:16.

Monna yo a tšwago lešabeng o khunama pele ga Jesu gomme a hlalosa a re: “Morutiši, ke tlišitše morwa wa ka go wena gobane o na le moya wo o dirago gore motho a se kgone go bolela, kae le kae mo o mo swarago gona o mmethantšha fase a tšwa lehulo ka molomong le go tsikitlanya meno gomme a felelwa ke matla. Ke boditše barutiwa ba gago gore ba o leleke eupša ga se ba kgona.”—Mareka 9:17, 18.

Go bonagala bamangwalo ba sola barutiwa ka baka la ge ba paletšwe ke go fodiša mošemane, mohlomongwe ba bile ba kwera maiteko a bona. Ka gona go e na le gore Jesu a arabe tate yo a tlaletšwego, o bolela le lešaba o re: “Aowii moloko wo o se nago tumelo le wo o kgopamego, ke tla tšwela pele ke na le lena go fihla neng?” Mantšu a a matla a šupa go bamangwalo bao ba bego ba dutše ba tshwenya barutiwa ba gagwe ge a be a se gona. Ge Jesu a retologela go tate yo a tlaletšwego, o re: “Mo tlišeng mo go nna.”—Mateo 17:17.

Ge mošemane a batamela Jesu, motemona yo a mo tsenego o mo lahlela fase a mo utlautla o šoro. Mošemane o dulela go pshikologa mo fase, a etšwa lehulo ka molomong. Jesu o botšiša tate yoo o re: “Ke nako e kaaka’ng se se mo diragalela?” Yena o araba ka gore: “Go tloga bjaneng, nako le nako o fela o mo lahlela mollong le meetseng gore o mmolaye.” Monna yo o a lopa o re: “Ge e ba o ka kgona go dira se sengwe, re šokele gomme o re thuše.”—Mareka 9:21, 22.

Tate yo o tlaletšwe, ka gobane gaešita le barutiwa ba Jesu ba paletšwe ke go mo thuša. Ge Jesu a arabela topong ya monna yoo ya tlalelo, o mo nea kgonthišetšo e kgothatšago e rego: “Go re’ng o re: ‘Ge e ba o ka kgona’? Gobane dilo tšohle di ka kgonega go motho yo a nago le tumelo.” Gateetee tate o goeletša ka gore: “Ke na le tumelo! Nthuše moo ke hlokago tumelo!”—Mareka 9:23, 24.

Jesu o bona lešaba le kitimela go yena. Jesu o kgalema motemona yo batho ka moka ba lebeletše, o re: “Wena moya wo o dirago gore motho a se kgone go bolela le go mo dira sefoa, ke go laela gore o tšwe go yena gomme o se sa tsena go yena le gatee.” Motemona ge a etšwa, o dira gore mošemane a goeletše le go mo utlautla gantši. Ke moka mošemane a robala moo a sa šišinyege. Ge batho ba bantši ba bona se, ba re: “O hwile!” (Mareka 9:25, 26) Eupša ge Jesu a swara seatla sa mošemane yoo, o a tsoga gomme “a fola go tloga ka nako yeo.” (Mateo 17:18) Go a kwagala ge batho ba makaditšwe ke seo Jesu a se dirago.

Pejana, ge Jesu a be a roma barutiwa ba gagwe go yo dira boboledi, ba be ba kgona go leleka batemona. Bjale, ba mmotšiša thopeng ba le ka ntlong ba re: “Ke ka baka la’ng re se ra kgona go leleka moya wola?” Jesu o hlalosa gore e bile ka baka la go hloka ga bona tumelo, o re: “Mohuta wo o lelekwa feela ka thapelo.” (Mareka 9:28, 29) Go be go nyakega tumelo e matla le go rapelela thušo ya Modimo e matlafatšago gore go lelekwe motemona yo matla.

Jesu o phetha ka gore: “Ruri ke re go lena, ge e ba le na le tumelo e lekanago le thoro ya sehlare sa mosetata, le tla re go thaba ye: ‘Tloga mo o ye mola,’ ke moka ya tloga gomme go ka se be le seo se le palelago.” (Mateo 17:20) Ruri tumelo e ka ba e matla!

Mapheko le mathata ao a šitišago motho go tšwela pele tirelong ya Jehofa mo gongwe a ka bonagala e le ao a sa fenyegego le ao a ka se šuthego go swana le thaba ya kgonthe. Lega go le bjalo, ge e ba re hlagolela tumelo, re ka fenya mapheko le mathata a bjalo ao a swanago le dithaba.