Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 48

O Dira Mehlolo, Eupša o Ganwa le Kua Natsaretha

O Dira Mehlolo, Eupša o Ganwa le Kua Natsaretha

MATEO 9:27-34; 13:54-58 MAREKA 6:1-6

  • JESU O FODIŠA DIFOFU LE SEMUMU

  • BATHO BA NATSARETHA BA A MO GANA

Jesu o be a swaregile letšatši ka moka. Ka morago ga leeto la go boa tikologong ya Dekapoli, o ile a fodiša mosadi yo a nago le bolwetši bja ngope gomme a tsoša morwedi wa Jairo. Eupša ga go felele moo. Ge Jesu a tloga legaeng la Jairo, difofu tše pedi di a mo latela, di goeletša di re: “Re gaugele, Morwa wa Dafida.”—Mateo 9:27.

Ka go bitša Jesu “Morwa wa Dafida,” banna ba ba bontšha gore ba dumela gore Jesu ke mojabohwa wa sedulo sa bogoši sa Dafida gomme ka go re’alo ke Mesia. Go bonagala Jesu a hlokomologa dikgoeletšo tša bona, mohlomongwe a nyaka go bona ge e ba ba tla phegelela, gomme ba dira bjalo. Ge Jesu a tsena ka ntlong, banna ba babedi ba tsena le yena ba mo šetše morago. Jesu o ba botšiša ka gore: “Na le na le tumelo ya gore nka dira se?” Ba mo araba ka kgodišego ba re: “Ee, Morena.” Ge ba re’alo, Jesu o kgwatha mahlo a bona gomme o re: “A go le diragaleleng go ya ka tumelo ya lena.”—Mateo 9:28, 29.

Gateetee ba a bona! Go etša ge pejana Jesu a ile a laela ba bangwe, o ba laela gore ba se ke ba kwalakwatša seo a se dirilego. Eupša ka ge ba tletše lethabo, ka morago ba mo kwalakwatša kgole le kgauswi.

Ge banna ba ba babedi ba tloga, batho ba tliša monna yo a sa kgonego go bolela ka baka la ge a na le motemona. Jesu o leleka motemona yoo gomme gateetee monna yo o thoma go bolela. Mašaba a makatšwa ke se gomme a re: “Sa go swana le se ga se sa ka sa bonwa Isiraeleng.” Bafarisei le bona ba gona. Ga ba kgone go gana mehlolo yeo, ka gona ba boeletša tatofatšo ya bona mabapi le mothopo wa mediro ya Jesu, ba re: “O leleka batemona ka matla a mmuši wa batemona.”—Mateo 9:33, 34.

Ka moragonyana ga moo, Jesu o boela motseng wa gabo wa Natsaretha, bjale a sepela le barutiwa ba gagwe. Mo e ka bago lebaka la ngwaga pejana ga moo, o ile a ruta sinagogeng ya moo. Mathomong batho ba be ba kgahlwa ke seo a bego a se bolela, eupša ka morago ba ile ba kgopišwa ke thuto ya gagwe gomme ba leka go mmolaya. Bjale Jesu o leka gape go thuša bao e kilego ya ba baagišani ba gagwe.

Ka Sabatha, o boela sinagogeng go yo ruta. Ba bantši ba a kgotsa, e bile ba botšiša gore: “Motho yo o tšere kae bohlale bjo le mediro ye e matla?” Ba re: “Na yena yo ga se morwa wa mmetli? Na mmagwe ga se yo a bitšwago Maria gomme na barwarragwe ga se Jakobo le Josefa le Simone le Judase? Le gona na dikgaetšedi tša gagwe ka moka ga di na le rena? Ka gona, dilo tše ka moka motho yo o di tšere kae?”—Mateo 13:54-56.

Batho ba nagana gore Jesu e fo ba motho feela wa lefelong. Ba nagana ka gore: ‘Re mmone a gola, ka gona e ka ba Mesia bjang?’ Ka baka leo, go sa šetšwe bohlatse bjo ka moka—go akaretša bohlale bjo bogolo bja Jesu gotee le mediro ya gagwe e matla—ba a mo gana. Ka ge ba tlwaetše Jesu, le metswalo ya gagwe e a kgopišega, e lego seo se mo dirago gore a re: “Moporofeta ga a ke a nyatšwa ge e se seleteng sa gabo le ntlong ya gagwe.”—Mateo 13:57.

Ruri Jesu o makatšwa ke go hloka tumelo ga bona. Ka gona ga a dire mehlolo le ge e le efe moo “ge e se go bea ba sego kae ba babjago diatla le go ba fodiša.”—Mareka 6:5, 6.

Ithute ka mo go oketšegilego

BEIBELE—E NA LE MOLAETŠA OFE?

Jesu o Dira Mehlolo

Mehlolo ya Jesu e bontšha’ng ka matla a gagwe le ka pušo ya gagwe ya nakong e tlago ge a tla be a buša lefase?