Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 24

O Katološa Bodiredi bja Gagwe Kua Galilea

O Katološa Bodiredi bja Gagwe Kua Galilea

MATEO 4:23-25 MAREKA 1:35-39 LUKA 4:42, 43

  • JESU O DIRA MAETO KUA GALILEA LE BARUTIWA BA BANE

  • BOBOLEDI BJA GAGWE LE MEDIRO YA GAGWE DI THOMA GO TSEBJA GOHLE

Letšatši la Jesu a na le barutiwa ba gagwe ba bane kua Kaperenaume e bile la leemaema. Mantšiboa, batho ba Kaperenaume ba tliša balwetši ba bona go yena gore a ba fodiše. Jesu ga se a ba le nako ya go ba noši.

Bjale, e sa le ka pela mesong e latelago, ge mahube a sešo a hlatloga, Jesu a tsoga a ya ka ntle a nnoši. O hwetša lefelo leo le lego lekatana moo a ka rapelago Tatagwe ka sephiring. Eupša go ba ga Jesu a nnoši ke ga nakwana. Ge ba lemoga gore ga a gona, “Simone le bao ba bego ba na le yena” ba tsoma Jesu. Petro a ka ba a ba etile pele ka ge Jesu a be a le legaeng la gagwe.—Mareka 1:36; Luka 4:38.

Ge ba hwetša Jesu, Petro o re: “Bohle ba a go nyaka.” (Mareka 1:37) Ke mo go kwagalago gore batho ba Kaperenaume ba nyaka Jesu a dula moo. Ba tloga ba leboga seo a se dirilego, ka gona ba leka “go mo thibela gore a se tloge go [bona].” (Luka 4:42) Lega go le bjalo, na morero o mogolo wa go tla ga Jesu lefaseng e be e le go tlo dira diphodišo tše bjalo tša mohlolo? Le gona na o tla dira mediro ya gagwe lefelong le feela? Yena o re’ng ka se?

Jesu o araba barutiwa ba gagwe o re: “A re yeng go gongwe, metseng yeo e lego kgauswi, gore ke yo bolela le moo gobane ke tletše wona morero wo.” Ge e le gabotse, Jesu e bile o botša batho bao ba nyakago a dula o re: “Le metseng e mengwe ke swanetše go bolela ditaba tše dibotse tša Mmušo wa Modimo, gobane ke sona se ke se rometšwego.”—Mareka 1:38; Luka 4:43.

Ee, lebaka le legolo leo ka lona Jesu a tlilego lefaseng ke go bolela ka Mmušo wa Modimo. Mmušo woo o tla kgethagatša leina la Tatagwe le go rarolla mathata a batho sa ruri. Jesu o nea bohlatse bja gore o romilwe ke Modimo ka go dira mehlolo ya phodišo. Ka tsela e swanago, nywagakgolo e mentši pejana, Moshe o ile a dira mediro e makatšago go thekga bohlatse bja gore ke yena yo a romilwego ke Modimo.—Ekisodo 4:1-9, 30, 31.

Ka gona Jesu o tloga Kaperenaume gore a yo dira boboledi metseng e mengwe gomme barutiwa ba gagwe ba bane ba sepela le yena. Barutiwa ba ba bane ke Petro le morwarragwe Andrea gotee le Johane le morwarragwe Jakobo. Bekeng ya ka pele ga moo Jesu o ile a ba laletša gore e be ba pele ba go sepela le yena maetong a gagwe.

Maeto a Jesu a boboledi kua Galilea a na le barutiwa ba ba bane a atlega e le ruri! Ge e le gabotse, batho ba kwa ka Jesu kgole le kgauswi. “Pego mabapi le yena [e] tlala Siria ka moka,” go fihla tikologong ya metse e lesome e bitšwago Dekapoli le ka mošola wa Noka ya Jorodane. (Mateo 4:24, 25) Mašaba a magolo a tšwago mafelong ao gotee le a tšwago Judea, a latela Jesu le barutiwa ba gagwe. Ba bantši ba mo tlišetša bao ba nyakago go fodišwa. Jesu ga a ba nyamiše—o fodiša balwetši le go leleka meoya e kgopo go bao ba tsenwego ke batemona.

Ithute ka mo go Oketšegilego

DIPOTŠIŠO TŠA BEIBELE DI A ARABJA

Mmušo wa Modimo ke Eng?

Ela hloko lebaka leo ka lona mmušo wa Modimo o phagametšego mebušo e mengwe ka moka.