Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 39

Madimabe go Moloko wo o sa Arabelego

Madimabe go Moloko wo o sa Arabelego

MATEO 11:16-30 LUKA 7:31-35

  • JESU O SOLA METSE E ITŠEGO

  • O IMOLLA BATHO LE GO BA LAPOLOŠA

Jesu o tšeela godimo Johane Mokolobetši, eupša batho ba bantši ba lebelela Johane bjang? Jesu o re: “Moloko wo . . . o swana le bana ba banyenyane bao ba dutšego marekišetšong bao ba goeletšago dithaka tša bona, ba re: ‘Re le leleditše naka, eupša la se bine; ra golola, eupša la se itshetle dihuba ka manyami.’”—Mateo 11:16, 17.

Jesu o ra go re’ng? O hlalosa kgopolo ya gagwe o re: “Johane o tlile a sa je e bile a sa nwe, eupša batho ba re: ‘O na le motemona’; Morwa wa motho o tlile, a ja e bile a nwa, go dutše go le bjalo batho ba re: ‘Bonang motho wa sejagobe le yo a lemaletšego beine, mogwera wa balekgetho le badiradibe.’” (Mateo 11:18, 19) Ka lehlakoreng le lengwe, Johane o phetše bophelo bjo bonolo e le Monasari, e bile a sa nwe beine, lega go le bjalo moloko wo o re o na le motemona. (Numeri 6:2, 3; Luka 1:15) Ka lehlakoreng le lengwe gape, Jesu o phela bjalo ka batho ba bangwe. O a ja le go nwa ka tekatekano, eupša o latofatšwa ka gore o a feteletša. Go bonagala go kgotsofatša batho go sa kgonege.

Jesu o swantšha moloko wo le bana ba banyenyane bao ba dutšego marekišetšong bao ba ganago go arabela ka go bina ge bana ba bangwe ba letša naka goba ka gore ba nyame ge ba bangwe ba golola. O re: “Bohlale bo hlatselwa ka mediro ya bjona gore bo lokile.” (Mateo 11:16, 19) Ee, “mediro”—ke gore, bohlatse bjo bo bontšhitšwego ke Johane le Jesu—e hlatsela gore ditatofatšo tšeo di lego kgahlanong le bona ke tša maaka.

Ka morago ga ge Jesu a hlalositše moloko wo e le wo o sa arabelego, o sola ka go lebanya metse ya Koratsina, Betsaida le Kaperenaume, moo a dirilego mediro e matla. Jesu o re ge nkabe a ile a dira mediro e bjalo metseng ya Fenikia ya Tiro le Sidone, metse yeo nkabe e ile ya itshola. Gape o bolela ka motse wa Kaperenaume, moo e bego e le ga gabo ka nakwana. Le gona moo, ba bantši ga se ba arabela. Jesu o bolela ka motse woo o re: “Letšatšing la Kahlolo le tla ahlolwa o šoro go feta naga ya Sodoma.”—Mateo 11:24.

Ke moka Jesu o tumiša Tatagwe, yoo a utelago “ba bohlale le ba tlhaologanyo” ditherešo tša moya tše bohlokwa eupša a di utollela babotlana, e lego bao ba swanago le bana. (Mateo 11:25) O nea taletšo e kgahlišago go ba bjalo o re: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya ka le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo. Gobane joko ya ka e botho, morwalo wa ka o bohwefo.”—Mateo 11:28-30.

Jesu o lapološa batho bjang? Baetapele ba bodumedi ba imeditše batho ka metlwae yeo e ba dirago makgoba, yeo e swanago le melao e thata ya go boloka Sabatha. Eupša Jesu o ba lapološa ka go ba ruta therešo ya Modimo, yeo e sa šilafatšwago ke metlwae yeo. Le gona o bontšha tsela ya go imolla bao ba kwago ba imetšwe kudu ke pušo ya babuši ba dipolotiki le bao ba ikwago ba imetšwe ke sebe. Ee, Jesu o ba utollela kamoo dibe tša bona di ka lebalelwago le kamoo ba ka bago khutšong le Modimo.

Bohle bao ba amogelago joko ya Jesu e bohwefo ba ka ineela go Modimo gomme ba hlankela Tatago rena wa legodimong yo a kwelago bohloko le yo a nago le kgaugelo. Go dira bjalo ga go imele ka gobane ditaelo tša Modimo ga di boima le gatee.—1 Johane 5:3.

Ithute ka mo go oketšegilego

Na Bakriste ba Swanetše go Boloka Sabatha?

Ge e ba ba sa swanela, gona ke ka baka la’ng Beibele e bitša Sabatha gore ke kgwerano e sa felego?

“Taelo ya Pele go Ditaelo ka Moka ke Efe?”

Seo Modimo a se nyakago go rena se ka akaretšwa ka lentšu letee.