Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 41

Mehlolo—E Dirwa ka Matla a Mang?

Mehlolo—E Dirwa ka Matla a Mang?

MATEO 12:22-32 MAREKA 3:19-30 LUKA 8:1-3

  • LEETO LA JESU LA BOBEDI LA BOBOLEDI LE A THOMA

  • O LELEKA BATEMONA LE GO LEMOŠA KA SEBE SEO SE SA LEBALELWEGO

Ka moragonyana ga gore Jesu a bolele mabapi le taba ya go lebalela a le legaeng la Simone wa Mofarisei, Jesu o thoma leeto le lengwe la boboledi la Galilea. O ngwageng wa bobedi wa bodiredi bja gagwe gomme ga a sepele a nnoši. O na le baapostola ba 12, gotee le basadi ba bangwe bao a ilego a ba ‘fodiša meoya e kgopo [le malwetši].’ (Luka 8:2) Gare ga bona go na le Maria Magadalena, Susana le Johana, yoo monna wa gagwe e lego mohlankedi wa Kgoši Heroda Antipase.

Ge batho ba bantši ba thoma go kwa ka Jesu, ngangišano ka modiro wa gagwe e a oketšega. Seo se bonagala gabotse ge monna yo a nago le motemona, yo e lego sefofu e bile e le semumu a tlišwa go Jesu gomme a fodišwa. Bjale monna yo ga a sa laolwa ke batemona gomme o a bona e bile o a bolela. Batho ba tloga ba maketše gomme ba re: “Na yo mohlomongwe ga se yena Morwa wa Dafida?”—Mateo 12:23.

Mašaba ao a kgobokanego go dikologa ntlo yeo Jesu a dulago go yona ke a magolo kudu moo e lego gore yena le barutiwa ba gagwe ga ba kgone le go ja. Lega go le bjalo, ga se bohle bao ba naganago gore Jesu ke “Morwa wa Dafida” yo a holofeditšwego. Ba bangwe bamangwalo le Bafarisei ba tlile ba etšwa Jerusalema—eupša ga ba tlela go ithuta go Jesu goba go mo thekga. Ba botša batho gore: “O na le Beletsebubu” gomme ka go re’alo o dirišana le “mmuši wa batemona.” (Mareka 3:22) Ge metswalo ya Jesu e ekwa ka mpherefere wo, e tla go swara Jesu. Ka baka la’ng?

Go ba gona, lebakeng le, barwarre ba Jesu ga ba dumele gore ke Morwa wa Modimo. (Johane 7:5) Jesu yo go bonagalago a baka mpherefere wo bathong ga a swane le Jesu yoo ba bego ba mo tseba ge ba be ba sa gola gotee kua Natsaretha. Ka ge ba phetha ka gore go swanetše go ba go na le phošo monaganong wa gagwe, ba re: “O hlakane hlogo.”—Mareka 3:21.

Lega go le bjalo, bohlatse bjona bo bontšha’ng? Jesu o sa tšwa go fodiša monna yo a bego a na le motemona, yo bjale a kgonago go bona le go bolela. Ga go na yo a ka ganetšago se. Ka gona bamangwalo le Bafarisei ba leka go hlompholla Jesu ka tatofatšo ya maaka. Ba re: “Motho yo ga a leleke batemona ge e se ka matla a Beletsebubu, mmuši wa batemona.”—Mateo 12:24.

Jesu o tseba seo se naganwago ke bamangwalo le Bafarisei, ka gona o re: “Mmušo o mongwe le o mongwe wo o aroganego o a šwalalana gomme motse o mongwe le o mongwe goba ntlo ye e aroganego e ka se eme. Ka tsela e swanago, ge e ba Sathane a leleka Sathane, gona o ikarogantše; ka gona mmušo wa gagwe o tla ema bjang?”—Mateo 12:25, 26.

Taba ye e kwagala ka tsela e makatšago e le ruri! Bafarisei ba a tseba gore Bajuda ba bangwe ba leleka batemona. (Ditiro 19:13) Ka gona Jesu o botšiša gore: “Ge e ba ke leleka batemona ka matla a Beletsebubu, barwa ba lena bona ba ba leleka ka a mang?” Ka mantšu a mangwe, tatofatšo ya bona e swanetše go šoma le go barwa ba bona. Ke moka Jesu o katološa kgopolo yeo ka gore: “Eupša ge e ba ke leleka batemona ka moya wa Modimo, gona Mmušo wa Modimo ruri o le fihletše.”—Mateo 12:27, 28.

Go bontšha gore go leleka ga gagwe batemona ke bohlatse bja gore o fenya Sathane ka matla, Jesu o re: “Motho a ka šwahlela bjang ntlo ya monna yo matla a tšea thoto ya gagwe, ka ntle le ge pele a ka tlema monna yoo yo matla, ke moka ya ba gona a hulago ntlo ya gagwe? Yo a sego ka lehlakoreng la ka o lwa le nna gomme yo a sa kgoboketšego le nna o a gašanya.” (Mateo 12:29, 30) Ga go pelaelo gore bamangwalo le Bafarisei ba lwa le Jesu, e lego seo se hlatselago gore ke baemedi ba Sathane. Ba gašanya batho gore ba tloge go Morwa wa Modimo, yo a dirago dilo a thekgwa ke Jehofa.

Jesu o lemoša baganetši ba bao ba laolwago ke Sathane, o re: “Batho ba tla lebalelwa dilo ka moka, go sa šetšwe dibe tšeo ba di dirilego le dithogako tšeo ba di boletšego. Lega go le bjalo, mang le mang yo a rogakago moya o mokgethwa a ka se ke a lebalelwa neng le neng, eupša o na le molato wa sebe sa ka mo go sa felego.” (Mareka 3:28, 29) Nagana seo se bolelwago ke mantšu ao go bao ba rego Sathane ke yena a dirago dilo tšeo go lego molaleng gore di dirwa ka moya wa Modimo!