Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 45

Matla a go Fenya Batemona ba Bantši

Matla a go Fenya Batemona ba Bantši

MATEO 8:28-34 MAREKA 5:1-20 LUKA 8:26-39

  • O LELEKELA BATEMONA DIKOLOBENG

Ge barutiwa ba boela lebopong ka morago ga phihlelo ya bona e gateletšago kua lewatleng, ba tšhoga kudu. Banna ba babedi ba bogale kudu, bao ka bobedi ba nago le batemona, ba tšwa mabitleng a kgauswi gomme ba kitimela go Jesu! Tlhokomelo e lebišwa go yo mongwe wa banna bao, mohlomongwe ka baka la ge a le bogale go feta yo mongwe e bile a ile a laolwa ke batemona ka nako e telele.

Monna yo yo a hlomolago pelo o be a sepela a hlobotše. Bošego le mosegare, o “goeletša . . . a le mabitleng le dithabeng gomme a ikgatla ka maswika.” (Mareka 5:5) O kotsi kudu mo e lego gore batho ba tšhaba go feta tseleng yeo. Ba bangwe ba ile ba leka go mo tlema, eupša o konoganya diketane gomme a robaganya ditlemo maotong a gagwe. Ga go na motho yo a mo fenyago ka matla.

Ge monna yoo a batamela Jesu gomme a wela dinaong tša gagwe, batemona bao ba mo laolago ba mo dira gore a goeletše a re: “O tletše eng mo wena Jesu Morwa wa Modimo Yo Godimodimo? Ke go eniša ka Modimo gore o se ke wa ntlhokofatša.” Jesu o bontšha gore o na le matla a taolo godimo ga batemona gomme a laela ka gore: “Tšwa go motho yo, wena moya o sa hlwekago.”—Mareka 5:7, 8.

Ge e le gabotse, batemona ba bantši ba tsene go monna yoo. Ge Jesu a botšiša a re: “Leina la gago o mang?” karabo e re: “Leina la ka ke Madira gobane re ba bantši.” (Mareka 5:9) Sehlopha sa madira a Roma se bopša ke mašole a dikete; ka baka leo batemona ba bantši ba ipopile ngatana kgahlanong le monna yoo gomme ba thabela tlaišego ya gagwe. Ba kgopela Jesu “gore a se ke a ba laela gore ba ye sekoting.” Mohlomongwe ba lemoga seo se letšego ka pele bakeng sa bona le moetapele wa bona e lego Sathane.—Luka 8:31.

Kgauswi le moo go be go fula mohlape wa dikolobe tše e ka bago tše 2 000, e lego diphoofolo tšeo go ya ka Molao di sa hlwekago le tšeo Bajuda ba sa swanelago go ba le tšona. Batemona ba re: “Re romele mohlapeng wa dikolobe gore re tsene go tšona.” (Mareka 5:12) Jesu o ba laela gore ba tšwe gomme ba tsena dikolobeng. Ge seo se direga, dikolobe ka moka tše 2 000 di a gatana di fekemela legageng gomme di kgangwa ke meetse ka lewatleng kua tlase.

Ge badiši ba dikolobe ba bona se, ba a kitima ba yo bega ditaba tše motseng le tikologong yeo. Batho ba tla go bona seo se diregilego. Ge ba fihla, ba bona gore monna yoo batemona ba tšwilego go yena bjale o phetše gabotse e bile o hlaphogetšwe monaganong. Mmalo! O apere gomme o dutše dinaong tša Jesu.

Batho bao ba kwago ka se goba ba bonago monna yoo ba a tšhoga, ga ba kwešiše seo se se ka se bolelago go bona. Ba lopa Jesu go tloga tikologong yeo. Ge Jesu a sa namela sekepe gore a tloge, monna yo a bego a na le batemona o kgopela gore a sepele le Jesu. Eupša Jesu o botša monna yoo o re: “Eya gae go ba geno, o ba botše dilo ka moka tšeo Jehofa a go diretšego tšona le kgaugelo yeo a go bontšhitšego yona.”—Mareka 5:19.

Gantši Jesu o laela bao a ba fodišago gore ba se ke ba botša motho ka gobane ga a nyake gore batho ba dire diphetho ka yena motheong wa dipego tše di tsošago kgahlego. Tabeng ye, monna yo a bego a na le batemona ke bohlatse bjo bo phelago bja matla a Jesu gomme a ka nea bohlatse bathong bao Jesu a ka se kgonego go ba fihlelela ka boyena. Bohlatse bja gagwe bo ka ba bja fokodiša pego le ge e le efe e sa kgahlišego mabapi le go lobja ga dikolobe. Ka gona monna yoo o a tloga gomme o thoma go bolela Dekapoli ka moka dilo tšeo Jesu a mo diretšego tšona.

Ithute ka mo go oketšegilego

Na Batemona ba Gona e le ka Kgonthe?

Batemona ke’ng? Ba tšwa kae?

Na Diabolo a ka Kgona go Laola Batho?

Diabolo o tutuetša batho bjang le gona o ka phema bjang melaba ya gagwe?