Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 27

Mateo o a Bitšwa

Mateo o a Bitšwa

MATEO 9:9-13 MAREKA 2:13-17 LUKA 5:27-32

  • JESU O BITŠA MATEO, YO E LEGO MOLEKGETHO

  • KRISTE O TLWAELANA LE BADIRADIBE E LE GORE A BA THUŠE

Jesu ka moragonyana ga gore a fodiše morephaditho, o šala Kaperenaume Lewatleng la Galilea. Mašaba a batho a tla go yena gape, gomme o thoma go a ruta. Ge a le gare a sepela, o bona Mateo, yoo gape a bitšwago Lefi, a dutše ofising ya lekgetho. Jesu o mo laletša ka borutho o re: “Eba molatedi wa ka.”—Mateo 9:9.

Go bonagala Mateo a šetše a tlwaelane le dithuto tša Jesu le ditiro tšeo a di dirilego tikologong yeo, go etša ge Petro, Andrea, Jakobo le Johane ba be ba tlwaelane le tšona. Ka go swana le bona, Mateo o amogela taletšo ka bjako. Mateo o hlalosa se Ebangeding ya gagwe, o re: “A napa a [Mateo] ema a mo latela.” (Mateo 9:9) Ka baka leo, Mateo o tlogela maikarabelo a gagwe e le molekgetho gomme e ba morutiwa wa Jesu.

Ka morago, mohlomongwe e le ge Mateo a bontšha tebogo bakeng sa pitšo ye yeo e kgethegilego e tšwago go Jesu, o dira monyanya o mogolo ka ntlong ya gagwe. Ke bomang bao ba laleditšwego go sa balwe Jesu le barutiwa ba gagwe? Ge e le gabotse, go na le bagwera ba mmalwa ba Mateo ba nakong e fetilego, e lego balekgetho ba bangwe. Ba kgobokeletša balaodi bao ba hloilwego ba Baroma metšhelo, go akaretša metšhelo ya dikepe tšeo di tsenago boemakepeng, metšhelo ya go laola melokeloke ya dikamela ditseleng tše dikgolo le metšhelo ya dithoto tšeo di tšwago dinageng tše dingwe. Bajuda ka kakaretšo ba lebelela bjang balekgetho bao? Batho ba ba hloile ka gobane gantši ba nyaka tšhelete e ntši go batho ka go se botege go e na le go nyaka tekanyo e beilwego ya lekgetho. Gape go na le ‘badiradibe’ monyanyeng, e lego batho bao ba tumilego ka go tlwaela go dira dilo tše mpe.—Luka 7:37-39.

Bafarisei bao ba iponago ba lokile bao ba lego gona ge ba bona Jesu a na le batho ba bjalo monyanyeng, ba botšiša barutiwa ba gagwe gore: “Ke ka baka la’ng morutiši wa lena a eja le balekgetho le badiradibe?” (Mateo 9:11) Ge Jesu a ba kwa, o araba ka gore: “Batho ba ba phetšego gabotse ga ba nyake ngaka, eupša ba babjago ba a e nyaka. Ka gona, eyang le ithute se se bolelwago ke se: ‘Ke nyaka kgaugelo e sego sehlabelo.’ Gobane ke tletše go bitša badiradibe, e sego baloki.” (Mateo 9:12, 13; Hosea 6:6) Bafarisei ga ba bitše Jesu “morutiši” ka go tšwa pelong, eupša ba ka ithuta se sengwe go yena mabapi le seo se nepagetšego.

Go bonagala Mateo a laleditše balekgetho le badiradibe lapeng la gagwe e le gore ba tle ba theetše Jesu le gore ba fodišwe moyeng ka ge “ba bantši ba bona e ile ya ba balatedi ba gagwe.” (Mareka 2:15) Jesu o nyaka go ba thuša gore ba be le tswalano e botse le Modimo. Jesu ga a nyatše batho ba bjalo go swana le ge Bafarisei bao ba iponago ba lokile ba ba nyatša. O tutuetšwa ke kwelobohloko le kgaugelo; e ka ba ngaka ya moya ya bohle bao ba babjago moyeng.

Jesu o gaugela balekgetho le badiradibe, e sego gore a lokafatše dibe tša bona, eupša gore a ba bontšhe lerato le le swanago le leo a le bontšhitšego bao ba bego ba babja mmeleng. Ka mohlala, gopola ge a be a kgwatha molephera ka go mo kwela bohloko a re: “Ke a rata. Hlweka.” (Mateo 8:3) Na ga se ra swanela go hlagolela pono e swanago ya kgaugelo gomme ra thuša bahloki, kudukudu ka go ba thuša ka tsela ya moya?