Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 32

Ke Eng Seo se Dumeletšwego ka Sabatha?

Ke Eng Seo se Dumeletšwego ka Sabatha?

MATEO 12:9-14 MAREKA 3:1-6 LUKA 6:6-11

  • O FODIŠA SEATLA SA MONNA KA SABATHA

Ka Sabatha e nngwe, Jesu o etela sinagogeng, mohlomongwe kua Galilea. Gona moo o hwetša monna yoo seatla sa gagwe sa la le letona se omeletšego. (Luka 6:6) Bamangwalo le Bafarisei ba lebeletše Jesu ka kelohloko. Ka baka la’ng? Ba utolla seo e lego morero wa bona wa kgonthe ge ba botšiša gore: “Na go fodiša ka Sabatha go dumeletšwe ke molao?”—Mateo 12:10.

Baetapele ba bodumedi ba Bajuda ba dumela gore go fodiša ka Sabatha go dumeletšwe ke molao ge feela bophelo bo le kotsing. Ka gona, e le mohlala, ga se gwa dumelelwa go otlolla lerapo goba go itlema mo o thinyegilego ka Sabatha, e lego maemo ao a sa beego bophelo kotsing. Go molaleng gore bamangwalo le Bafarisei ga se gore ba botšiša Jesu ka gobane ba tshwenyegile e le ka kgonthe ka tlaišego ya monna yo wa batho. Ba leka go hwetša lebaka la go bea Jesu molato.

Lega go le bjalo, Jesu o tseba kgopolo ya bona yeo e kgopamego. O lemoga gore ba na le pono e feteletšego yeo e sego ya mangwalo ka seo se bolelwago ke go tshela molao wa go šoma ka Sabatha. (Ekisodo 20:8-10) O šetše a kile a lebeletšana le go swawa diphošo mo go fošagetšego ka mediro ya gagwe e mebotse. Bjale Jesu o ala motheo bakeng sa ngangišano e kgolo ka go botša monna wa seatla se se omeletšego gore: “Tsoga o tle mo gare.”—Mareka 3:3.

Ge Jesu a retologela go bamangwalo le Bafarisei, o re: “Motho ke mang gare ga lena yo e tla rego ge a na le nku e tee, gomme ge e ba nku yeo e wela ka moleteng ka Sabatha, a ka se kego a e swara a e ntšha?” (Mateo 12:11) Nku e emela peeletšo ya tša ditšhelete, ka gona ba be ba ka se e tlogele ka moleteng go fihlela letšatšing le le latelago; e ka hwa lebakeng leo gomme ba lahlegelwa. Ka ntle le moo, Mangwalo a re: “Moloki o hlokomela bophelo bja seruiwa sa gagwe.”—Diema 12:10.

Jesu ge a bapiša se gabotse, o tšwela pele ka gore: “Na motho ga a bohlokwa go feta nku? Ka gona, go dira selo se sebotse ka Sabatha go dumeletšwe ke molao.” (Mateo 12:12) Ka baka leo, Jesu o be a sa tshele molao wa Sabatha ka go fodiša monna yoo. Baetapele ba bodumedi ba palelwa ke go ganetša kgopolo e bjalo e kwagalago le e bontšhago kwelobohloko. Ba fo homola.

A selekilwe e bile a nyamišitšwe ke dikgopolo tša bona tše fošagetšego, Jesu o a lealea, ke moka o re go monna yoo: “Otlolla seatla sa gago.” (Mateo 12:13) Ge monna a otlolla seatla sa gagwe se omeletšego, se a fola. Seo se thabiša monna yoo, eupša se kgoma bjang bao ba lekago go beela Jesu molaba?

Go e na le go thabela gore seatla sa monna yoo se fodile, Bafarisei ba a tšwa gomme gateetee ba lakana le “lekoko la balatedi ba Heroda ka [Jesu], e le gore ba tle ba mmolaye.” (Mareka 3:6) Go bonagala sehlopha se sa dipolitiki se akaretša ditho tša sehlopha sa bodumedi seo se bitšwago Basadutsei. Ka tlwaelo, Basadutsei le Bafarisei ba a ganetšana, eupša bjale ba ipopile ngatana go ganetšeng ga bona Jesu.

Ithute ka mo go oketšegilego

Na Bakriste ba Swanetše go Boloka Sabatha?

Ge e ba ba sa swanela, gona ke ka baka la’ng Beibele e bitša Sabatha gore ke kgwerano e sa felego?