Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 31

Go kga Mabele ka Sabatha

Go kga Mabele ka Sabatha

MATEO 12:1-8 MAREKA 2:23-28 LUKA 6:1-5

  • BARUTIWA BA KGA MABELE KA SABATHA

  • JESU KE “MORENA WA SABATHA

Jesu le barutiwa ba gagwe bjale ba ya ka leboa ka thoko ya Galilea. Ke lehlabula, le gona mašemong go na le mabele mahlakeng. Ka ge barutiwa ba swerwe ke tlala, ba roba diako tša mabele gomme ba a ja. Eupša ke letšatši la Sabatha gomme Bafarisei ba bona seo ba se dirago.

Gopola gore Bajuda ba itšego kua Jerusalema ba be ba sa tšwa go nyaka go bolaya Jesu, ba mo latofatša ka go tshela Sabatha. Bjale Bafarisei ba tliša tatofatšo yeo e theilwego ditirong tša barutiwa. Ba re: “Bona! Barutiwa ba gago ba dira se go sa dumelelwego ke molao gore se dirwe ka Sabatha.”—Mateo 12:2.

Bafarisei ba bolela gore go kga mabele le go a fogohla ka diatla bakeng sa go a ja ke go buna le go fola. (Ekisodo 34:21) Tlhathollo ya bona e thata ya mošomo e dira gore Sabatha e be morwalo, mola mathomong e be e reretšwe go ba letšatši la go thaba le la go aga moyeng. Jesu o diriša mehlala go ganetša pono ya bona e fošagetšego go ba bontšha gore Jehofa Modimo le ka mohla o be a sa rera gore molao wa Gagwe wa Sabatha o dirišwe ka tsela yeo.

Mohlala o mongwe woo Jesu a o neago ke wa Dafida le banna ba gagwe. Ge ba be ba swerwe ke tlala, ba ile ba ema taberenakeleng gomme ba ja dinkgwa tša pontšho. Dinkgwa tšeo, tše di bego di šetše di tlošitšwe pele ga Jehofa gomme go beilwe tše difsa, ka tlwaelo di be di jewa ke baperisita. Lega go le bjalo, ka baka la maemo, Dafida le banna ba gagwe ga se ba bewa molato ge ba di jele.—Lefitiko 24:5-9; 1 Samuele 21:1-6.

Mohlaleng wa bobedi, Jesu o re: “Na ga la ka la bala Molaong gore ka Disabatha baperisita tempeleng ba swara Sabatha e se e kgethwa gomme ba fo dula ba se na molato?” Seo a se bolelago ke gore gaešita le ka Sabatha, baperisita ba hlaba diphoofolo bakeng sa dihlabelo le go dira mediro e mengwe ka tempeleng. Jesu o re: “Eupša ke le botša gore se se fetago tempele ka bogolo se mo.”—Mateo 12:5, 6; Numeri 28:9.

Jesu gape o diriša Mangwalo go bea taba ya gagwe, o re: “Ge e ba le be le kwešišitše se se bolelwago ke gore: ‘Ke nyaka kgaugelo e sego sehlabelo,’ le ka be le se la ba bona molato bao ba se nago molato.” O phetha ka gore: “Gobane Morwa wa motho ke yena Morena wa Sabatha.” Jesu o bolela ka pušo ya gagwe e sa tlago ya Mmušo ya khutšo ya nywaga e sekete.—Mateo 12:7, 8; Hosea 6:6.

Ke kgale batho ba tlaišega bokgobeng bjo boima bja Sathane, moo go atilego bošoro le ntwa. Ruri boemo e tla ba bjo bo fapanego ka tlase ga pušo e kgolo ya Sabatha ya Kriste, yoo a tlago go re nea nako ya go khutša yeo re e hlologetšego e bile re e nyaka!