Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 55

Mantšu a Jesu a Tšhoša ba Bantši

Mantšu a Jesu a Tšhoša ba Bantši

JOHANE 6:48-71

  • GO JA NAMA YA GAGWE LE GO NWA MADI A GAGWE

  • BA BANTŠI BA A KGOPIŠEGA GOMME BA TLOGELA GO MO LATELA

Sinagogeng ya kua Kaperenaume, Jesu o ruta mabapi le go ba ga gagwe senkgwa sa kgonthe se se tšwago legodimong. Go bonagala mantšu a gagwe a tlaleletša seo a se boditšego batho bao ba boilego ba etšwa karolong ya ka bohlabela ya Lewatle la Galilea, e lego bao ba ilego ba ja dinkgwa le dihlapi tšeo ba ilego ba di fiwa moo.

Jesu o tšwela pele ka poledišano ya gagwe, o re: “Borakgolokhukhu ba lena ba jele manna lešokeng, eupša ba hwa.” Go fapana le seo, o hlalosa gore: “Ke nna senkgwa se se phelago se se theogilego legodimong; ge e ba motho le ge e le ofe a eja senkgwa se o tla phela ka mo go sa felego; ruri senkgwa seo ke tlago go se nea ke nama ya ka yeo ke e neago bakeng sa bophelo bja lefase.”—Johane 6:48-51.

Seruthwaneng sa 30 C.E., Jesu o ile a botša Nikodemo gore Modimo o ratile lefase kudu mo a ilego a nea Morwa wa gagwe gore e be Mophološi. Jesu bjale o gatelela go nyakega ga go ja nama ya gagwe ka go bontšha tumelo sehlabelong seo a tlago go se dira. Yeo ke tsela ya go amogela bophelo bjo bo sa felego.

Lega go le bjalo, batho ga ba dumelelane le mantšu a Jesu. Ba botšiša gore: “Motho yo a ka re nea bjang nama ya gagwe gore re e je?” (Johane 6:52) Jesu o nyaka ba kwešiša gore o bolela ka tsela ya seswantšhetšo, e sego ya kgonthe. Seo a se tlaleletšago se bontšha seo ge e le gabotse a se bolelago.

O re: “Ka ntle le gore le je nama ya Morwa wa motho le go nwa madi a gagwe, ga le na bophelo go lena. Yo a jago nama ya ka le go nwa madi a ka o na le bophelo bjo bo sa felego . . . ; gobane nama ya ka ke sejo sa kgonthe, le madi a ka ke seno sa kgonthe. Yo a jago nama ya ka le go nwa madi a ka o ba boteeng le nna.”—Johane 6:53-56.

Akanya kamoo seo se ka kwagalago se kgopiša batheetši ba Bajuda! Ba ka nagana gore Jesu o kgothaletša gore ba je batho goba ba robe molao wa Modimo wa go se je madi. (Genesi 9:4; Lefitiko 17:10, 11) Jesu ga a bolele ka go ja nama goba go nwa madi ka tsela ya kgonthe. O bontšha gore bohle bao ba nyakago bophelo bjo bo sa felego ba swanetše go bontšha tumelo sehlabelong seo a tlago go se dira ka mmele wa gagwe o phethagetšego e le motho gomme a tšholla madi a gagwe. Lega go le bjalo, gaešita le barutiwa ba gagwe ba bantši ga ba kwešiše thuto ye. Ba bangwe ba re: “Mantšu a a a tšhoša; ke mang yo a ka a theetšago?”—Johane 6:60.

Ka ge Jesu a lemoga gore ba bangwe ba barutiwa ba gagwe ba a ngongorega, o a botšiša o re: “Na se se a le kgopiša? Bjale le tla re’ng ge e ba le bona Morwa wa motho a rotogela moo a bego a le gona pele? . . . Dipolelo tšeo ke le boditšego tšona ke moya e bile ke bophelo. Eupša go na le ba bangwe ba lena bao ba sa dumelego.” Ka baka la se, barutiwa ba bantši ba a tloga gomme ba se sa hlwa ba mo latela.—Johane 6:61-64.

Ka gona Jesu o botšiša baapostola ba gagwe ba 12 o re: “Na le lena le nyaka go sepela?” Petro o araba ka gore: “Morena, re tla ya go mang? Wena o na le mantšu a bophelo bjo bo sa felego; re dumetše gomme ra tseba gore o Mokgethwa wa Modimo.” (Johane 6:67-69) A mantšu ao a bontšhago potego, gaešita le ge mo nakong ye Petro le baapostola ba bangwe ba sa kwešiše ka botlalo thuto ya Jesu tabeng ye!

Le ge Jesu a thabetše karabo ya Petro, o re: “Na ga se ka le kgetha le le ba lesomepedi? Lega go le bjalo, yo mongwe wa lena ke mothomeletši.” (Johane 6:70) Jesu o bolela ka Judase Isikariote. Mohlomongwe lebakeng le Jesu o lemoga gore Judase o thoma go aroga.

Lega go le bjalo, ruri Jesu o kgotsofatšwa ke go tseba gore Petro le baapostola ba bangwe ga ba tlogele go mo latela le go dira modiro wa go phološa bophelo woo yena a o dirago.