Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 60

Go Fetoga Ponagalo—Go Bonwa ga Kriste a le Letagong

Go Fetoga Ponagalo—Go Bonwa ga Kriste a le Letagong

MATEO 16:28–17:13 MAREKA 9:1-13 LUKA 9:27-36

  • PONO YA GO FETOGA PONAGALO

  • BAAPOSTOLA BA KWA LENTŠU LA MODIMO

Ge Jesu a le gare a ruta batho bao ba lego tikologong ya Kesarea Filipi, yeo e lego bokgole bja dikhilomithara tše e ka bago tše 25 go tloga Thabeng ya Herimone, o dira tsebišo e makatšago e rego: “Ruri ke le botša gore go na le ba bangwe ba bao ba emego mo ba ba ka se kego ba hwa le gatee go ba go fihla pele ba bona Morwa wa motho a etla ka Mmušo wa gagwe.”—Mateo 16:28.

Barutiwa ba swanetše go ba ba ipotšiša gore Jesu o ra go re’ng. Mo e ka bago ka morago ga beke, o tšea ba bararo ba baapostola ba gagwe—Petro, Jakobo le Johane—a ya le bona thabeng e telele. E ka ba e le bošego, ka gobane banna ba ba bararo ba imetšwe ke boroko. Ge Jesu a le gare a rapela, o fetoga ponagalo pele ga bona. Baapostola ba bona sefahlego sa gagwe se taga bjalo ka letšatši gomme diaparo tša gagwe di phadima bjalo ka seetša, tša šweufala wa go phadima.

Ke moka go tšwelela batho ba babedi bao e lego “Moshe le Eliya.” Ba thoma go boledišana le Jesu ka tša ‘go tloga ga gagwe mo go bego go tla direga kua Jerusalema.’ (Luka 9:30, 31) Go bonagala go tloga ga Jesu go šupa lehu la gagwe le tsogo ya gagwe yeo e bego e tla latela, tšeo a bego a sa tšwa go bolela ka tšona. (Mateo 16:21) Poledišano ye e bontšha gore go fapana le seo Petro a bego a se kgothaletša, lehu la Jesu leo le gobošago le ka se thibelwe.

Ka ge bjale ba phafogile, baapostola ba ba bararo ba bogetše le go theetša ka makalo. Ye ke pono, eupša e bonagala eka ke ya kgonthe moo e lego gore Petro le yena o ikakaretša tabeng, o re: “Rabi, ke mo gobotse ge re le mo, ka gona a re hlomeng ditente tše tharo, e nngwe e be ya gago, e nngwe e be ya Moshe gomme e nngwe e be ya Eliya.” (Mareka 9:5) Na Petro o nyaka gore ditente di hlongwe ka gobane a nyaka gore pono e tšwele pele?

Ge Petro a sa dutše a bolela, ba apešwa ke leru leo le tagilego gomme gwa kwala lentšu lerung le re: “Yo ke Morwa wa ka yo a rategago, yo ke kgahlwago ke yena; le mo theetšeng.” Ge ba ekwa lentšu la Modimo, baapostola bao ba tšhogilego ba wa ka difahlego, eupša Jesu o re go bona: “Tsogang le se ke la boifa.” (Mateo 17:5-7) Ge baapostola ba bararo ba tsoga, ga ba bone motho ge e se Jesu. Pono e fedile. Ge go sele gomme ba fologa thabeng, Jesu o laela ka gore: “Le se ke la botša motho pono ye go fihla ge Morwa wa motho a tsogile bahung.”—Mateo 17:9.

Ponagalo ya Eliya ya ponong e rotoša potšišo. Baapostola ba botšiša ka gore: “Ke ka baka la’ng bamangwalo ba re Eliya o swanetše go tla pele?” Jesu o araba ka gore: “Eliya o šetše a tlile gomme ga se ba mo tseba.” (Mateo 17:10-12) Jesu o bolela ka Johane Mokolobetši, yo a kgathilego tema e swanago le ya Eliya. Eliya o lokišeditše Elisha tsela gomme Johane yena a lokišetša Kriste.

Ruri pono ye e matlafatša baapostola ba Jesu kudu! Ke ponelopele ya letago la Mmušo wa Kriste. Ka go re’alo barutiwa ba bone “Morwa wa motho a etla ka Mmušo wa gagwe,” bjalo ka ge Jesu a be a holofeditše. (Mateo 16:28) Ge ba sa le thabeng, ba bile “dihlatse tše di bonego ka mahlo tša bogolo bja gagwe bjo bogolo kudu.” Gaešita le ge Bafarisei ba be ba nyaka pontšho ya go bontšha gore Jesu e be e tla ba Kgoši e kgethilwego ya Modimo, o be a ka se ba nee yona. Eupša barutiwa ba Jesu ba kgauswi ba ile ba newa sebaka sa go bona go fetoga ponagalo ga Jesu, e lego seo se kgonthišetšago diporofeto tša Mmušo. Ka gona, Petro ka morago o be a ka ngwala gore: “Re kgonthišeditšwe ka matla lentšu la boporofeta.”—2 Petro 1:16-19.

Ithute ka mo go oketšegilego

Petro o be a Botega ge a Lebane le Diteko

Tumelo le potego di ile tša thuša Petro go amogela phošollo e tšwago go Jesu?