Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 29

Na Motho a ka Dira Mediro e Mebotse ka Sabatha?

Na Motho a ka Dira Mediro e Mebotse ka Sabatha?

JOHANE 5:1-16

  • JESU O DIRA BOBOLEDI KUA JUDEA

  • O FODIŠA MONNA YO A BABJAGO BODIBENG

Jesu o fihleletše dilo tše dintši nakong ya bodiredi bja gagwe bjo bogolo kua Galilea. Lega go le bjalo, Jesu ga se a nagana ka Galilea feela, ge a re: “Le metseng e mengwe ke swanetše go bolela ditaba tše dibotse tša Mmušo wa Modimo.” Ka gona, o tšwela pele “a ruta disinagogeng tša Judea.” (Luka 4:43, 44) Go a kwagala ka gobane bjale ke seruthwane e bile monyanya wa kua Jerusalema o a batamela.

Ge re bapetša le seo re se balago ka bodiredi bja Jesu bja Galilea, ga re hwetše mo gontši Diebangeding mabapi le modiro wa gagwe kua Judea. Gaešita le ge bodiredi bja Jesu bo sa amogelwe kua Judea, se ga se mo thibele go bolela ka mafolofolo le go dira mediro e mebotse kae le kae mo a lego gona.

Go se go ye kae ke ge Jesu a lebile motseng o mogolo wa Judea, e lego Jerusalema, bakeng sa Paseka ya 31 C.E. Lefelong la leemaema la kgauswi le Kgoro ya Dinku, go na le bodiba bjo bo nago le mathudi a dikokwane bjo bo bitšwago Bethesida. Ba bantši bao ba babjago, difofu le digole ba tla bodibeng bjo. Ka baka la’ng? Ka gobane ka kakaretšo go dumelwa gore batho ba ka fodišwa ka go tsena ka bodibeng ge meetse a bilošwa.

Bjale ke Sabatha, gomme Jesu o bona monna yo a bego a babja ka nywaga e 38 bodibeng bjo. Jesu o mmotšiša gore: “Na o rata go fola?” Monna yoo o araba a re: “Mohlomphegi, ga ke na motho yo a ntsenyago ka bodibeng ge meetse a bilošwa; eupša ge ke sa re ke a tsena, yo mongwe o ntsenela pele.”—Johane 5:6, 7.

Jesu o bolela selo se makatšago monna yo le ba bangwe bao ba mo kwago, o re: “Tsoga, tšea leako la gago o sepele.” (Johane 5:8) Monna o dira sona seo. Gateetee ge monna yo a fodile, a tšea leako a thoma go sepela!

Go e na le gore ba thabele selo se sebotse seo se diregilego, Bajuda ba bona monna yo gomme ba bolela ka tsela ya go ahlola ba re: “Ke Sabatha, ga go dumelelwe ke molao gore o tšee leako.” Monna a ba araba a re: “Yena yo a mphodišitšego o itše go nna: ‘Tšea leako la gago o sepele.’” (Johane 5:10, 11) Bajuda bao ba sola motho yo a fodišago ka Sabatha.

Ba nyaka go tseba, ba re: “Ke mang motho yo a go boditšego gore: ‘Le tšee o sepele’?” Ke ka baka la’ng ba botšiša monna yo seo? Ka gobane Jesu “o be a tlogile fao ka ge go be go na le lešaba,” e bile monna yo a fodišitšwego ga a tsebe leina la Jesu. (Johane 5:12, 13) Eupša monna yo o tla kopana le Jesu gape. Ka moragonyana kua tempeleng, monna o kopana le Jesu gomme a tseba leina la motho yo a mo fodišitšego bodibeng.

Monna yo a bego a fodišitšwe o hwetša Bajuda bao ba bego ba mmotšiša mabapi le go fodišwa ga gagwe. O ba botša gore o fodišitšwe ke Jesu. Ge ba ekwa se, Bajuda ba ya go Jesu. Na ba yela go kwa gore Jesu o diriša eng go dira dilo tšeo tše di makatšago? Aowa. Go e na le moo, ba nyaka go bea Jesu molato ka ge a dira dilo tše dibotse ka Sabatha. Ba bile ba thoma le go mo tlaiša!

Ithute ka mo go oketšegilego

Na Bakriste ba Swanetše go Boloka Sabatha?

Ge e ba ba sa swanela, gona ke ka baka la’ng Beibele e bitša Sabatha gore ke kgwerano e sa felego?