Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 34

Jesu o Kgetha Baapostola ba Lesomepedi

Jesu o Kgetha Baapostola ba Lesomepedi

MAREKA 3:13-19 LUKA 6:12-16

  • BAAPOSTOLA BA 12

E šetše e le mo e ka bago ngwaga le seripa go tloga mola Johane Mokolobetši a tsebatšago Jesu e le Kwana ya Modimo. Ge Jesu a be a thoma bodiredi bja gagwe bja phatlalatša, banna ba botegago ba mmalwa e ile ya ba barutiwa ba gagwe, ba bjalo ka Andrea, Simone Petro, Johane, mohlomongwe le Jakobo (ngwanabo Johane), Filipi le Baratholomeo (yoo gape a bitšwago Nathaniele). Ge nako e dutše e eya, ba bangwe ba bantši ba ile ba latela Kriste.—Johane 1:45-47.

Bjale Jesu o itokišeditše go kgetha baapostola ba gagwe. Ba e tla ba bagwera ba gagwe ba kgauswi gomme ba tla newa tlwaetšo e kgethegilego. Eupša pele a ba kgetha, Jesu o rotogela thabeng, mohlomongwe yeo e lego kgauswi le Lewatle la Galilea leo le sego kgole le Kaperenaume. O fetša bošego ka moka a rapela, mohlomongwe a kgopela bohlale le tšhegofatšo ya Modimo. Letšatšing le le latelago o biletša barutiwa ba gagwe go yena gomme o kgetha ba 12 ba barutiwa ba gagwe e le baapostola.

Jesu o kgetha ba tshelelago bao go boletšwego ka bona mathomong, gotee le Mateo, yoo Jesu a mmiditšego a le ofising ya lekgetho. Ba bangwe ba bahlano bao ba kgethilwego ke Judase (yoo gape a bitšwago Thadeo le “morwa wa Jakobo”), Simone wa Mokananaya, Thomase, Jakobo morwa wa Alifeose le Judase Isikariote.—Mateo 10:2-4; Luka 6:16.

Mo nakong ye ba ba 12 ba sepetše le Jesu gomme o ba tseba gabotse. Ba bantši ba bona ke metswalo ya gagwe. Jakobo le Johane ngwanabo go bonala e le batswala ba Jesu. Le gona ge e ba Alifeose e be e le ngwanabo Josefa, yoo e lego tatago Jesu wa mogodiši, ka ge ba bangwe ba nagana bjalo, gona moapostola Jakobo e tla ba motswala wa Jesu.

Ke therešo gore Jesu ga a na bothata bja go gopola maina a baapostola ba gagwe. Eupša na o ka a gopola? Se se ka go thušago ke go gopola gore go na le ba babedi bao ba bitšwago ka la Simone, ba babedi bao ba bitšwago ka la Jakobo le ba babedi bao ba bitšwago ka la Judase. Simone (Petro) o na le ngwanabo e lego Andrea, gomme Jakobo (morwa wa Tsebedeo) o na le ngwanabo e lego Johane. Yeo ke tsela ya go gopola baapostola ba seswai. Ba bangwe ba bane ba akaretša molekgetho (Mateo), yo mongwe yoo ka morago a belaelago (Thomase), yo a ilego a bitšwa a le ka tlase ga sehlare (Nathaniele) le mogwera wa Nathaniele (Filipi).

Ba lesometee ba baapostola ba tšwa Galilea, e lego seleteng sa gabo Jesu. Nathaniele o tšwa Kana. Filipi, Petro le Andrea bona ba tšwa Betsaida. Ge nako e dutše e eya, Petro le Andrea ba hudugela Kaperenaume, e lego moo go bonalago Mateo a be a dula gona. Jakobo le Johane le bona ba dula Kaperenaume goba kgauswi le gona, gomme ba be ba na le kgwebo ya go rea dihlapi kgauswi le gona. Judase Isikariote, yoo ka morago a ekago Jesu, go bonagala e le moapostola a nnoši yo a tšwago Judea.