Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 91

Latsaro o a Tsošwa

Latsaro o a Tsošwa

JOHANE 11:38-54

  • GO TSOŠWA GA LATSARO BAHUNG

  • DITHO TŠA KGORO YA SANHEDRINE DI LOGA MAANO A GO BOLAYA JESU

Ka morago ga gore Jesu a gahlane le Mareta le Maria kgauswi le Bethania, ba ya lebitleng la Latsaro. Lona ke legaga leo le tswaletšwego ka leswika. Jesu o a laela o re: “Tlošang leswika le.” Mareta o bontšha go tshwenyega, a sa kwešiše seo Jesu a ikemišeditšego go se dira. O re: “Morena ga bjale o swanetše go ba a nkga, gobane e šetše e le matšatši a mane.” Eupša Jesu o mmotša gore: “Na ga se ka go botša gore ge e ba o ka dumela o tla bona letago la Modimo?”—Johane 11:39, 40.

Ka gona leswika le a tlošwa. Ke moka Jesu o lebelela godimo gomme a rapela a re: “Tate, ke a go leboga ka ge o nkwele. Ke therešo gore ke be ke tseba gore o nkwa ka mehla; eupša ke boletše ka baka la lešaba leo le emego mo, e le gore le dumele gore o nthomile.” Thapelo ya Jesu ya phatlalatša e bontšha bao ba lebeletšego gore seo a tlago go se dira o se dira ka matla a Modimo. Ke moka Jesu a goeletša ka lentšu le le hlabošago a re: “Latsaro, tšwaa!” Ka gona Latsaro o a tšwa, diatla le dinao tša gagwe di sa tateditšwe ka mašela a go tatetša bahu gomme sefahlego sa gagwe se tateditšwe ka lešela. Jesu a re: “Mo tatolleng, le mo lese a sepele.”—Johane 11:41-44.

Bajuda ba bantši bao ba tlilego go tlo homotša Maria le Mareta ba bona mohlolo wo gomme ba dumela go Jesu. Eupša ba bangwe ba a sepela ba yo botša Bafarisei seo Jesu a se dirilego. Bafarisei le baperisita ba bagolo ba swara seboka le ditho tša kgorokgolo ya Bajuda, e lego Sanhedrine. Sehlopha seo se akaretša moperisita yo a phagamego e lego Kayafa. Ba bangwe ba bona ba lla ka gore: “Re tla dira’ng, gobane motho yo o dira dipontšho tše dintši? Ge e ba re mo tlogela ka tsela ye, ka moka ba tla dumela go yena gomme Baroma ba tla tla ba tšea tempele ya rena le setšhaba sa rena.” (Johane 11:47, 48) Le ge ba kwele ka dihlatse tšeo di bonego ka mahlo gore Jesu “o dira dipontšho tše dintši,” banna ba ga ba thabele seo Modimo a se dirago a diriša Jesu. Ba tshwenyegile kudu ka boemo bja bona le matla a bona a bolaodi.

Taba ya gore Latsaro o tsošitšwe bahung e nyamišitše Basadutsei e le ka kgonthe, e lego bao ba sa dumelego tsogong ya bahu. Kayafa, yo e lego Mosadutsei, bjale o bolela ka go hlaboša, o re: “Ga le tsebe selo le gatee, gomme ga le lemoge gore ke mo go holago lena gore motho o tee a hwele batho ka moka go e na le gore setšhaba ka moka se fedišwe.”—Johane 11:49, 50; Ditiro 5:17; 23:8.

Ka ge Kayafa a šoma boemong bjo bokgethwa, Modimo o dira gore a bolele se—ga a bolele “ka la gagwe.” Kayafa o ra gore Jesu o swanetše go bolawa e le gore a thibelwe go tšwela pele a nyatša matla a taolo a baetapele ba bodumedi ba Bajuda le gore a se sa fokodiša tutuetšo ya bona. Lega go le bjalo, boporofeta bja Kayafa bo šupa therešo ya gore ka go hwa ga gagwe, Jesu o tla nea topollo, e sego feela bakeng sa Bajuda, eupša bakeng sa “bana ba Modimo [ka moka] bao ba phatlaletšego.”—Johane 11:51, 52.

Kayafa o a atlega tabeng ya go tutuetša ditho tša Sanhedrine go loga maano a go bolaya Jesu. Na Nikodemo, yo e lego setho sa kgoro ya Sanhedrine seo se bontšhago Jesu bogwera, a ka utollela Jesu maano a bona? Ka baka leo, Jesu o tloga tikologong ya Jerusalema, ka go re’alo a efoga go hwa pele ga nako yeo Modimo a e beilego.

Ithute ka mo go oketšegilego

Tsogo ya Bahu ke Eng?

O ka makatšwa ke go tseba gore ke bomang bao ba tlago go tsošwa.

Lehu ga se Mafelelo a Dilo ka Moka!

Ke ka baka la’ng Jesu a ile a bapiša lehu le boroko? Re ka ithuta’ng ka dipego tša go tsošwa ga batho tšeo di ngwadilwego ka Beibeleng?

Kholofelo ya Kgonthe Bakeng sa Baratiwa ba Gago ba ba Hwilego

Na o hlokofaletše ke motho yo o mo ratago? Na go a kgonega go ba bona gape? Ithute seo Beibele e se bolelago ka tsogo.