Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 88

Phetogo Maemong a Mohumi le a Latsaro

Phetogo Maemong a Mohumi le a Latsaro

LUKA 16:14-31

  • SESWANTŠHO SA MABAPI LE MOHUMI LE LATSARO

Jesu o be a dutše a nea barutiwa ba gagwe keletšo e botse ya mabapi le go diriša mahumo a dilo tše di bonagalago. Eupša barutiwa ba gagwe ga se bona feela bao ba theeditšego. Bafarisei le bona ba gona moo, gomme ba swanetše go kgongwa kudu ke keletšo ya Jesu. Ka baka la’ng? Ka gobane ke “barati ba tšhelete.” Ge ba ekwa seo Jesu a se bolelago, “ba [a] mo šinyalalela.”—Luka 15:2; 16:13, 14.

Lega go le bjalo, seo ga se tšhoše Jesu. O re go bona: “Ke lena bao le ipolelago gore le lokile pele ga batho, eupša Modimo o tseba dipelo tša lena, gobane seo batho ba bonago e le se segolo, ke selo sa makgapha mahlong a Modimo.”—Luka 16:15.

Ke kgale Bafarisei ba ‘godišwa ke batho,’ eupša bjale ke nako ya gore dilo di fetoge, di tšee lemanoga le lengwe. Batho ba ba godišwago kudu bao ba humilego ka dilo tša lefase, bao ba nago le matla dipolitiking le tutuetšo bodumeding ba swanetše go kokobetšwa. Batho feela bao ba lemogago go nyaka ga bona dilo tša moya ba tla godišwa. Jesu o bolela phaa gore phetogo e kgolo e a direga, o re:

“Molao le Baporofeta di bile gona go fihla go Johane. Go tloga ka nako yeo go ya pele, Mmušo wa Modimo o bolelwa e le ditaba tše dibotse, gomme mohuta o mongwe le o mongwe wa motho o phegelela go tsena go wona. Ruri, go bonolo gore legodimo le lefase di fete go e na le gore karolwana e tee ya tlhaka ya Molao e se ke ya phethagatšwa.” (Luka 3:18; 16:16, 17) Mantšu a Jesu a bontšha bjang gore phetogo yeo e a direga?

Baetapele ba bodumedi ba Bajuda ba ipolela ka boikgogomošo gore ba kgomaretše Molao wa Moshe. Gopola gore ge Jesu a be a budulla mahlo a sefofu kua Jerusalema, Bafarisei ka boikgogomošo ba itše: “Rena re barutiwa ba Moshe. Re tseba gore Modimo o boletše le Moshe.” (Johane 9:13, 28, 29) Morero o mongwe wa Molao wo o neilwego ka Moshe e be e le go lebiša bao ba ikokobetšago go Mesia, e lego Jesu. Johane Mokolobetši o ile a lemoga gore Jesu ke Kwana ya Modimo. (Johane 1:29-34) Go thoma ka bodiredi bja Johane, Bajuda bao ba ikokobeditšego, kudukudu gare ga badiidi, ba be ba botšwa ka “Mmušo wa Modimo.” Ee, go na le “ditaba tše dibotse” bakeng sa bohle bao ba nyakago go ba balata ba Mmušo wa Modimo le gore o ba hole.

Ga se gore Molao wa Moshe ga o phethagale; go e na le moo, o lebišitše batho go Mesia. Go oketša moo, ga go sa nyakega gore batho ba o boloke. Ka mohlala, Molao o be o dumelela motho gore a hlale ka mabaka a fapafapanego, eupša bjale Jesu o hlalosa gore “yo mongwe le yo mongwe yo a hlalago mosadi wa gagwe gomme a nyala yo mongwe, o a hlotlola; yo a nyalago mosadi yo a hladilego monna wa gagwe, o a hlotlola.” (Luka 16:18) Ruri mantšu a bjalo a galefiša Bafarisei bao ba ratago go bea molao selong se sengwe le se sengwe!

Bjale Jesu o anega seswantšho seo se gatelelago bogolo bja phetogo yeo e diregago. Se mabapi le banna ba babedi—bao yo mongwe le yo mongwe wa bona maemo a gagwe a fetogago ka tsela e makatšago. Ge o dutše o ela hloko seswantšho se, gopola gore gare ga bao ba theeditšego go na le Bafarisei bao e lego barati ba tšhelete bao ba godišwago ke batho.

Jesu o re: “Go be go na le mohumi yo mongwe yo a bego a fela a apara seaparo sa mmala o mophepolo le sa linene, a ipshina ka mahumo a gagwe letšatši le letšatši. Eupša mokgopedi yo mongwe yo a bitšwago Latsaro o be a fela a bewa kgorong ya gagwe, a tletše dišo a bile a kganyoga go khorišwa ke dilo tše di wago tafoleng ya mohumi. Ee, dimpša le tšona di be di etla di latswa dišo tša gagwe.”—Luka 16:19-21.

Ka ge Bafarisei e le barati ba tšhelete, na go na le pelaelo le ge e le efe ya gore Jesu o lebišitše go mang ge a bolela ka “mohumi yo”? Baetapele ba ba bodumedi ba Bajuda le bona ba rata go apara diaparo tša mabonwa tša go bitša. Go ba gona, go sa šetšwe mahumo le ge e le afe ao ba ka bago ba na le ona, ba bonagala ba thabela ditokelo tše dintši le maemo ao ba lego go ona. Ee, go ba swantšha le monna yo a aperego seaparo sa mmala o mophepolo wa ka bogošing go bonagatša maemo ao ba a ratago gomme linene e tšhweu e bonagatša go itira ga bona baloki.—Daniele 5:7.

Baetapele ba bao ba ikgogomošago ba bahumi ba lebelela bjang batho feela? Ka lenyatšo ba ba bitša am ha·’aʹrets, goba batho ba naga (lefase), bao ba sa tsebego Molao goba bao ba sa swanelwego ke go o rutwa. (Johane 7:49) Seo se bonagatša boemo bja “mokgopedi yo mongwe yo a bitšwago  Latsaro,” yo a kganyogago “dilo tše di wago tafoleng ya mohumi.” Go swana le Latsaro yo a tletšego dišo, batho feela ba lebelelwa fase go le bjalo ka ge eka ga ba kgahle Modimo.

Boemo bjoo bjo bo nyamišago bo bile gona ka nako e telele, eupša Jesu o a tseba gore go fihlile nako ya gore go direge phetogo e kgolo boemong bja bao ba swanago le monna wa mohumi le bao ba swanago le Latsaro.

PHETOGO MAEMONG A MOHUMI LE A LATSARO

Jesu o tšwela pele go hlalosa phetogo ye e makatšago yeo e diregago maemong a bona. O re: “Bjale ge nako e dutše e feta, mokgopedi a hwa gomme a rwalwa ke barongwa a išwa sehubeng sa Aborahama. Mohumi le yena a hwa gomme a bolokwa. Ge a le Bodulabahu, a emišetša mahlo a gagwe godimo a le bohlokong, a bona Aborahama a le kgole gomme Latsaro a le sehubeng a na le yena.”—Luka 16:22, 23.

Bao ba theeditšego Jesu ba a tseba gore ke kgale Aborahama a hwile e bile o Bodulabahu. Mangwalo a hlalosa gabotse gore ga go motho yo a lego Bodulabahu goba Sheole yo a ka kgonago go bona goba go bolela, go akaretša le Aborahama. (Mmoledi 9:5, 10) Ka gona, baetapele ba ba bodumedi ba nagana gore Jesu o ra go re’ng ka seswantšho se? A ka ba a bontšha’ng mabapi le batho feela le baetapele ba bodumedi bao ba ratago tšhelete?

Jesu o sa tšwa go šupa phetogo ya boemo ka go bolela gore “Molao le Baporofeta di bile gona go fihla go Johane. [Eupša] go tloga ka nako yeo go ya pele, Mmušo wa Modimo o bolelwa e le ditaba tše dibotse.” Ka gona, boboledi bja Johane le Jesu Kriste bo dira gore mohumi le Latsaro ba hwe maemong goba boemong bja bona bja pele, gomme ba thabela maemo a mafsa a tšwago go Modimo.

Ke kgale ba sehlopha sa bao ba ikokobeditšego goba bao ba diilago se tingwa ditaba tša moya. Eupša ba a thušwa e bile ba arabela molaetšeng wa mabapi le Mmušo woo pele o bolelwago ke Johane Mokolobetši ke moka wa bolelwa ke Jesu. Peleng, ba ile ba swanelwa ke go ikhoriša ka marathana a ‘dilo tše di wago tafoleng ya moya’ ya baetapele ba bodumedi. Bjale ba fepša ka ditherešo tše bohlokwa tša Mangwalo, kudukudu dilo tše di makatšago tšeo Jesu a di hlalosago. Go ba bjalo ka ge eka ba feleletša ba le boemong bjo bo amogelegago mahlong a Jehofa Modimo.

Ka lehlakoreng le lengwe, bao ba bopago sehlopha sa baetapele ba bodumedi bao ba humilego le ba nago le tutuetšo ba gana go amogela molaetša wa Mmušo woo Johane a bego a o tsebatša le woo Jesu a bego a bolela ka wona nageng ka moka. (Mateo 3:1, 2; 4:17) Ge e le gabotse, ba galefišwa goba go tlaišwa ke molaetša woo, wo o lego mabapi le kahlolo ya mollo e tlago yeo e tšwago go Modimo. (Mateo 3:7-12) Baetapele ba bodumedi bao ba ratago  tšhelete ba be ba ka imollwa ke ge e ba Jesu le barutiwa ba gagwe ba be ba ka tlogela go tsebatša molaetša wa Modimo. Baetapele bao ba swana le mohumi yo go bolelwago ka yena seswantšhong, yo a rego: “Tate Aborahama, nkgaugele gomme o rome Latsaro gore a ine ntlha ya monwana wa gagwe meetseng a timole leleme la ka, gobane ke tlalelong mo mollong wo o tukago.”—Luka 16:24.

Eupša seo se ka se direge. Ba bantši ba baetapele ba bodumedi ba ka se fetoge. Ba ile ba gana go ‘theetša Moshe le Baporofeta,’ e lego mangwalo ao a ka bago a ile a ba tutuetša gore ba amogele Jesu e le Mesia le Kgoši yeo e kgethilwego ke Modimo. (Luka 16:29, 31; Bagalatia 3:24) E bile ga ba ikokobetše le go tutuetšwa ke badiidi bao ba amogetšego Jesu gomme bjale e le bao ba amogelwago ke Modimo. Barutiwa ba Jesu bona ba ka se fetoše therešo goba go e tswaka e le feela gore ba kgotsofatše baetapele ba bodumedi goba go ba imolla. Jesu seswantšhong sa gagwe o hlalosa therešo ye ka mantšu ao “Tate Aborahama” a a boditšego mohumi, ge a re:

“Ngwanaka, gopola gore o be o na le dilo tša gago tše dibotse nakong ya ge o be o phela, fela Latsaro yena o be a welwa ke dilo tše mpe. Lega go le bjalo, yena o a homotšwa mo, eupša wena o tlalelong. Le gona ka ntle ga dilo tše ka moka, go epilwe lengope le legolo magareng ga rena le lena, moo e lego gore bao ba nyakago go tshelela go lena ba tloga mo ga ba kgone, le gona batho ba ka se tshele go tšwa moo go tla go rena.”—Luka 16:25, 26.

Ruri ke mo go swanetšego gore phetogo e bjalo e makatšago e direge! Phetogo ye e swana le go fetoga ga boemo magareng ga baetapele ba bodumedi bao ba ikgogomošago le batho ba ikokobetšago bao ba amogelago joko ya Jesu gomme ba feleletša ka go lapološwa le go fepša moyeng. (Mateo 11:28-30) Phetogo ye e tla bonagala kudu dikgweding tše sego kae ge kgwerano ya Molao e tšeelwa legato ke kgwerano e mpsha. (Jeremia 31:31-33; Bakolose 2:14; Baheberu 8:7-13) Ge Modimo a tšhollela moya o mokgethwa go bahlanka ba gagwe letšatšing la Pentekoste ya 33 C.E., go tla ba molaleng gore barutiwa ba Jesu ke bona ba amogelwago ke Modimo, e sego Bafarisei le bagwera ba bona ba badumedi.