Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 87

Rulaganya e sa le Pele—Diriša Bohlale bjo bo Holago

Rulaganya e sa le Pele—Diriša Bohlale bjo bo Holago

LUKA 16:1-13

  • SESWANTŠHO SA MABAPI LE MOLAKI YO A SA LOKAGO

  • “ITIRELENG BAGWERA” KA MAHUMO A LENA

Seswantšho sa mabapi le morwa yo a timetšego, seo Jesu a sa tšwago go se anega, se swanetše go ba se bontšhitše gabotse balekgetho, bamangwalo gotee le Bafarisei bao ba theeditšego gore Modimo o ikemišeditše go lebalela badiradibe bao ba itsholago. (Luka 15:1-7, 11) Bjale Jesu o bolela le barutiwa ba gagwe. O anega seswantšho se sengwe, gomme sona se mabapi le monna wa mohumi yo a kwago gore molaodi goba molaki wa ntlo ya gagwe ga se a dira dilo ka tsela ya maleba.

Jesu o anega gore molaki o be a latofatšwa ka go senya dithoto tša mong wa gagwe. Ka gona mong wa gagwe o re molaki o tla rakwa. Molaki o ipotšiša gore: “Ke eng seo ke tlago go se dira ge e le mo mong wa ka a tla ntšeela bolaki? Ga ke na matla ka mo go lekanego go ka lema gomme ke hlabja ke dihlong tša go kgopela.” E le gore a swaragane le seo se letšego ka pele, o phetha ka gore: “Ke tseba seo ke tlago go se dira, e le gore ge ke tlošwa bolaking, batho ba tle ba nkamogele magaeng a bona.” Gateetee o bitša bao ba kolotago mong wa gagwe, a ba botšiša gore: “O kolota mong wa ka bokae?”—Luka 16:3-5.

Wa pele o araba ka gore: “Tekanyo ya magapa a lekgolo a makhura a mohlware.” Tšeo ke dilithara tše e ka bago tše 2 200 tša makhura. Motho yo a kolotago a ka no ba a be a na le tšhemo e kgolo kudu ya mehlware goba e be e le motho yo a rekišago makhura. Molaki o mmotša gore: “Boela morago le tumelelano ya gago e ngwadilwego o dule fase gomme o ngwale ka pela tše masomehlano [dilithara tše 1 100].”—Luka 16:6.

Molaki o botšiša yo mongwe o re: “Bjale wena o kolota bokae?” Yena o araba a re: “Tekanyo ya dipitša tše lekgolo tša korong.” Tšeo ke dilithara tše e ka bago tše 22 000. Molaki o botša motho yo yo a kolotago, o re: “Boela morago le tumelelano ya gago e ngwadilwego gomme o ngwale tše masomeseswai.” Ka go re’alo o fokotša sekoloto seo ka tekanyo ya 20 lekgolong.—Luka 16:7.

Molaki o sa dutše a laola ditšhelete tša mong wa gagwe, ka gona go ka thwe o na le matla a go ka fokotša dilo tšeo ba bangwe ba di kolotago mong wa gagwe. Ka go fokotša tekanyo ya dilo tšeo di kolotwago, molaki o itira mogwera wa bao ba ka mo swarago ka botho ka morago ga ge a lahlegetšwe ke mošomo.

Ge nako e dutše e eya mong wa gagwe o kwa ka seo se diregilego. Gaešita le ge seo se diregilego se mo lobišitše, o kgahlilwe ke molaki e bile o a mo reta ka gobane “le ge e be e le yo a sa lokago,” molaki “o dirišitše bohlale bjo bo holago.” Jesu o oketša ka gore: “Bana ba tshepedišo ye ya dilo ba hlalefile ka tsela e holago molokong wa bona go feta kamoo bana ba seetša ba lego ka gona.”—Luka 16:8.

Jesu ga a kgothaletše mekgwa ya molaki, e bile ga a kgothaletše mekgwa ya boradia ya kgwebo. Ka gona, thuto ya gagwe ke efe tabeng ye? O kgothaletša barutiwa ka gore: “Itireleng bagwera ka mahumo a sa lokago, e le gore ge a fela, ba le amogele mafelong a bodulo a sa felego.” (Luka 16:9) Ee, thuto tabeng ye e mabapi le go bonela dilo pele le go diriša bohlale bjo bo holago. Bahlanka ba Modimo e lego “bana ba seetša,” ba swanetše go diriša dithoto tša bona tša dilo tše di bonagalago ka tsela e bohlale, ba naganne ka bokamoso bja ka mo go sa felego.

Ke feela Jehofa Modimo le Morwa wa gagwe bao ba ka amogelago motho Mmušong wa magodimong goba Paradeiseng mo lefaseng ka tlase ga Mmušo woo. Re swanetše go hlagolela segwera le bona ka mafolofolo ka go diriša mahumo a rena a dilo tše di bonagalago go thekga dikgahlego tša Mmušo. Ka go re’alo re tla hwetša bokamoso bja ka mo go sa felego ge gauta, silifera le mahumo a mangwe di senyega goba di fedišwa.

Jesu gape o re bao ba botegago tabeng ya go hlokomela le go diriša mahumo le ge e le afe goba dilo tše di bonagalago tšeo ba nago le tšona ba tla botega tabeng ya go hlokomela ditaba tše bohlokwa kutšwanyana. Jesu o hlalosa gore: “Ka gona ge e ba le se la itlhatsela le botega mabapi le mahumo a sa lokago, gona ke mang yo a tlago go le gafela sa kgonthe [se bjalo ka dikgahlego tša Mmušo]?”—Luka 16:11.

Jesu o bontšha barutiwa ba gagwe gore ba tla nyakwa go gontši ge e ba ba nyaka go amogelwa “mafelong a bodulo a sa felego.” Motho a ka se kgone go ba mohlanka wa therešo wa Modimo gomme ka nako e swanago a ba mohlanka wa mahumo a sa lokago a dilo tše di bonagalago. Jesu o phetha ka gore: “Ga go na mohlanka wa lapa yo a ka hlankelago marena a mabedi, gobane o tla hloya yo mongwe gomme a rata yo mongwe goba o tla kgomarela yo mongwe gomme a nyatša yo mongwe. Le ka se be bahlanka ba Modimo le ba mahumo.”—Luka 16:9, 13.