Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 83

Go Laletša Batho Dijong—Modimo o Laletša Bomang?

Go Laletša Batho Dijong—Modimo o Laletša Bomang?

LUKA 14:7-24

  • THUTO MABAPI LE BOIKOKOBETŠO

  • BAENG BAO BA LALEDITŠWEGO BA NEA MABAKA A GO SE TLE

Ka morago ga gore a fodiše monna yo a bego a swerwe ke bolwetši bja go ruruga, Jesu o sa le ntlong ya Mofarisei. Jesu o bona baeng ba bangwe ba ikgethela dibaka tša ka pele dijong, gomme o diriša sebaka se go ruta thuto ya mabapi le boikokobetšo.

Jesu o re: “Ge o laleditšwe ke motho yo mongwe monyanyeng wa lenyalo, o se ke wa dula sebakeng sa ka pelepele. Mohlomongwe go ka ba go laleditšwe le motho yo mongwe yo a tsebegago kudu go go feta, gomme yo a go laleditšego le yena o tla tla a re go wena: ‘E re motho yo a dule mo.’ Ke moka, wena o tla tloga o swerwe ke dihlong wa ya sebakeng sa moragorago.”—Luka 14:8, 9.

Ka morago Jesu o re: “Ge o laleditšwe, eya o dule sebakeng sa moragorago gore ge motho yo a go laleditšego a etla a re go wena: ‘Mogwera, eya kua pelepele.’ Ke moka, o tla godišwa pele ga baenggotee le wena ka moka.” Se ga e fo ba go bontšha mekgwa e mebotse. Jesu o a hlalosa o re: “Gobane yo mongwe le yo mongwe yo a ikgodišago o tla kokobetšwa gomme yo a ikokobetšago o tla godišwa.” (Luka 14:10, 11) Ee, o kgothaletša batheetši ba gagwe gore ba hlagolele boikokobetšo.

Ke moka Jesu o bolela thuto e nngwe bakeng sa Mofarisei yo a mo laleditšego—ya kamoo a ka lokišago dijo tša mosegare tšeo di tlogago di amogelwa ke Modimo. O re: “Ge o lokiša dijo tša mosegare goba tša go lalela, o se ke wa bitša bagwera ba gago, bana beno, metswalo ya gago goba baagišani ba gago ba ba humilego. Mohlomongwe le bona ka nako e nngwe ba ka go laletša gomme seo e tla ba go go bušetša. Eupša ge o dira monyanya, o laletše badiidi, digole, dihlotša le difofu, wena o tla thaba gobane bona ga ba na seo ba tlago go go bušetša sona.”—Luka 14:12-14.

Go tlwaelegile go laletša bagwera, metswalo goba baagišani, gomme Jesu ga a bolele gore go dira bjalo go fošagetše. Lega go le bjalo, o gatelela gore go lokišetša dijo bakeng sa bahloki, ba bjalo ka badiidi, digole goba difofu go ka feleletša ka tšhegofatšo e humilego. Jesu o hlalosetša motho yo a mo laleditšego, o re: “O tla bušetšwa tsogong ya ba ba lokilego.” Moenggotee le yena o a dumela, o re: “Go thaba yo a jago senkgwa Mmušong wa Modimo.” (Luka 14:15) O bona kamoo seo e bego e tla ba tokelo ka gona. Lega go le bjalo, ga se bohle bao ba nago le tebogo e bjalo, ka ge Jesu a tšwela pele go bontšha ka taba yeo.

O re: “Motho yo mongwe o be a lokišetša selalelo se segolo gomme a laletša ba bantši. Ke moka a roma mohlanka wa gagwe . . . gore a ye a re go bao ba laleditšwego: ‘Etlang, gobane dilo bjale di lokišitšwe.’ Eupša ka moka ba thoma go nea mabaka a go se tle ga bona. Wa pele a re go yena: ‘Ke rekile tšhemo gomme ke swanetše go yo e bona; ke kgopela gore o ntokolle.’ Yo mongwe a re: ‘Ke rekile dijoko tše hlano tša dikgomo gomme ke yo di lekola; ke kgopela gore o ntokolle.’ Yo mongwe le yena a re: ‘Ke sa tšwa go nyala mosadi gomme ka lona lebaka le, nka se kgone go tla.’”—Luka 14:16-20.

Ruri mabaka ao a a fokola! Gantši motho o lekola tšhemo goba leruo pele ga ge a ka reka, ka gona go di lekola ka morago ga se gwa akgofa. Monna wa boraro ga a itokišetše go nyala. O šetše a nyetše, ka gona seo ga se sa swanela go mo thibela go amogela taletšo e bohlokwa. Ge a ekwa mabaka a a go se tle, mong wa mohlanka yoo a botša mohlanka a galefile a re:

“Tšwela ka ntle ka go akgofa ditseleng tše dikgolo le ditsejaneng tša motse gomme o tliše badiidi, digole, difofu le dihlotša.” Ka morago ga gore mohlanka a dire bjalo, go sa na le madulo. Ke moka mong wa mohlanka o botša mohlanka o re: “Tšwela ditseleng le mafelong a ageleditšwego gomme o ba gapeletše gore ba tle, gore ntlo ya ka e tlale. Gobane ke re go lena: Ga go le o tee wa batho ba bao ba bego ba laleditšwe yo a tlago go latswa dijo tša ka tša go lalela.”—Luka 14:21-24.

Seo Jesu a sa tšwago go se anega se bontšha kamoo Jehofa Modimo a dirilego gore Jesu Kriste a laletše batho gore ba tle ba hwetše Mmušo wa magodimong. Bajuda, kudukudu baetapele ba bodumedi, e bile ba pele ba go laletšwa. Ba bantši ba bona ba ile ba gana taletšo yeo nakong ka moka ya bodiredi bja Jesu. Eupša taletšo yeo e be e ka se felele go bona. Go molaleng gore Jesu o bontšha gore nakong e tlago go tla ntšhwa taletšo ya bobedi, ya go laletša babotlana ba Bajuda le bao ba sokologetšego tumelong ya Sejuda. Ka morago ga moo, go be go tla ba le taletšo ya boraro yeo e lego ya mafelelo, ya go laletša batho bao ba bego ba ba lebelela e le bao ba sa amogelegego pele ga Modimo.—Ditiro 10:28-48.

Ee, seo Jesu a se bolelago se tloga se gatelela mantšu a yo mongwe wa baenggotee le yena, yo a itšego: “Go thaba yo a jago senkgwa Mmušong wa Modimo.”

Ithute ka mo go oketšegilego

Mmušo wa Modimo ke Eng?

Kgoši ya Mmušo wa Modimo ke mang, gomme ke eng seo Mmušo woo o tlago go se fihlelela?