Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 95

O Ruta ka Tlhalo le go Rata Bana

O Ruta ka Tlhalo le go Rata Bana

MATEO 19:1-15 MAREKA 10:1-16 LUKA 18:15-17

  • JESU O HLALOSA PONO YA MODIMO KA TLHALO

  • MPHO YA GO SE TSENE LENYALONG

  • GO NYAKEGA GORE RE SWANE LE BANA BA BANYENYANE

Ge ba tloga Galilea, Jesu le barutiwa ba gagwe ba tshela Noka ya Jorodane gomme ba tšea tsela yeo e phatšago Perea yeo e yago borwa. La mafelelo ge Jesu a be a le Perea, o ile a botša Bafarisei molao wa Modimo wa mabapi le tlhalo. (Luka 16:18) Bjale ba tsoša taba yeo gape e le gore ba leke Jesu.

Moshe o ngwadile gore monna a ka hlala mosadi ka baka la “selo se sengwe seo a se bonego se sa hlomphege” go yena. (Doiteronomio 24:1) Go na le dipono tše di sa swanego mabapi le mabaka a tlhalo. Ba bangwe ba dumela gore motho a ka hlala le ka baka la dilo tše di sa rego selo. Ka gona Bafarisei ba botšiša gore: “Na go dumelelwa ke molao gore monna a hlale mosadi wa gagwe ka lebaka le lengwe le le lengwe?”—Mateo 19:3.

Go e na le gore Jesu a ye ka dikgopolo tša batho, ka bokgwari o hlalosa morero wa Modimo wa lenyalo. O re: “Na ga se la bala gore yo a ba bopilego mathomong o ba dirile e le yo motona le yo motshadi, gomme a re: ‘Ka lebaka le monna o tla tlogela tatagwe le mmagwe, a kgomarela mosadi wa gagwe gomme ba babedi ba e tla ba nama e tee’? Ka gona, ga e sa hlwa e le ba babedi, eupša ke nama e tee. Ka baka leo, se Modimo a se tlemagantšego jokong go se be le motho yo a se aroganyago.” (Mateo 19:4-6) Ge Modimo a be a nyadiša Adama le Efa, ga se a rulaganya gore lenyalo la bona le fele.

Bafarisei ba ngangišana le Jesu ka taba ye, ba botšiša gore: “Ka gona, ke ka baka la’ng Moshe a laetše gore mosadi a newe lengwalo la bohlatse la go mo raka le go mo hlala?” (Mateo 19:7) Jesu o re go bona: “Moshe o le dumeletše gore le hlale basadi ba lena ka baka la bopelothata bja lena, eupša go be go se bjalo go tloga mathomong.” (Mateo 19:8) Lentšu “mathomong” le be le sa šupe mehleng ya Moshe; le be le šupa ge Modimo a thoma lenyalo kua Edene.

Ke moka Jesu o tšweletša therešo e bohlokwa, o re: “Ke re go lena: Mang le mang yo a hlalago mosadi wa gagwe ge e se ka lebaka la bootswa [Segerika, por·neiʹa], a nyala yo mongwe, o a hlotlola.” (Mateo 19:9) Ka gona, boitshwaro bjo bo gobogilego bja botona le botshadi ke lebaka le nnoši la ka Mangwalong la gore motho a hlale.

Seo se tutuetša barutiwa gore ba re: “Ge e ba boemo bo le bjalo ka monna le mosadi wa gagwe, gona ga se bohlale go nyala.” (Mateo 19:10) Ga go pelaelo gore motho yo a naganago go tsena lenyalong o swanetše go lemoga gore ke tlemo ya sa ruri!

Ge e le tabeng ya go se tsene lenyalong, Jesu o hlalosa gore ba bangwe ba tswetšwe ba opafetše, ba ka se kgone go thabela ditswalano tša lenyalong. Ba bangwe ba opafaditšwe ke batho, ba golofatšwa ditho tša bona tša pelego. Lega go le bjalo, ba bangwe ba gatelela kganyogo ya bona ya go thabela dikopano tša botona le botshadi. Ba dira se e le gore ba gafe nako ya bona ka botlalo ditabeng tšeo di sepedišanago le Mmušo wa Modimo. Jesu o kgothaletša batheetši ba gagwe ka gore: ‘Yo a ka amogelago go se tsene lenyalong a a go amogele.’—Mateo 19:12.

Bjale batho ba thoma go tliša bana ba bona ba banyenyane go Jesu. Lega go le bjalo, barutiwa ba a ba kgalemela, mohlomongwe ba sa nyake gore ba tshwenye Jesu. Ge Jesu a bona se, o a galefa gomme o re go bona: “Lesang bana ba tle go nna; le se leke go ba thibela, gobane Mmušo wa Modimo ke wa ba bjalo ka bona. Ruri ke re go lena: Mang le mang yo a sa amogelego Mmušo wa Modimo go swana le ngwana, a ka se tsene go wona le gatee.”—Mareka 10:14, 15; Luka 18:15.

Ruri ye ke thuto e botse! E le gore re amogele Mmušo wa Modimo, re swanetše go ba ba ikokobeditšego le ba rutegago go swana le bana ba banyenyane. Bjale Jesu o bontšha gore o rata bana ka go ba gokarela le go ba šegofatša. Le gona o rata bohle bao ba “[amogelago] Mmušo wa Modimo go swana le ngwana.”—Luka 18:17.

Ithute ka mo go oketšegilego

Na Beibele e Dumelela Tlhalo?

Ithute ka seo Modimo a se dumelelago le seo a se hloilego.

Dipotšišo tše Tšwago go Babadi—November 2012

Mantšu a Jesu a mabapi le mpho ya go se be lenyalong ge e le gabotse a ra go re’ng?