Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 92

Go Balephera ba Lesome ba Fodišitšwego, go Leboga o Tee

Go Balephera ba Lesome ba Fodišitšwego, go Leboga o Tee

LUKA 17:11-19

  • JESU O FODIŠA BALEPHERA BA LESOME

Jesu o folodiša maano a ditho tša kgoro ya Sanhedrine a go mmolaya ka go ya motseng wa Efuraime, wo o lego ka leboabohlabela bja Jerusalema. O dula moo le barutiwa ba gagwe, kgole le manaba a gagwe. (Johane 11:54) Lega go le bjalo, nako ya Paseka ya 33 C.E. e a batamela, ka gona go se go ye kae Jesu o tla be a ya moo. O ya ka leboa a phatša Samaria gomme a tsena Galilea, e lego ketelo ya gagwe ya mafelelo lefelong le pele ga lehu la gagwe.

Pejana leetong, ge Jesu a sepela go tloga motsaneng o mongwe go ya go o mongwe, o gahlana le banna ba lesome bao ba nago le lephera. Dibopego tše dingwe tša bolwetši bjo ganyenyane-ganyenyane di ka ja ditlhalenama tša mmele, tše bjalo ka tša menwana ya diatla, menwana ya dinao goba tša ditsebe. (Numeri 12:10-12) Molao wa Modimo o laela gore molephera a goeletše ka gore: “Ga se ka hlweka, ga se ka hlweka!” E bile o swanetše gore a dule thokwana.—Lefitiko 13:45, 46.

Ka baka leo, balephera ba lesome ba emela kgole le Jesu. Lega go le bjalo, ba goeletša ka go hlaboša ba re: “Jesu, Morutiši, re gaugele!” Ge Jesu a bona balephera, o a ba laela o re: “Eyang le iponagatše go baperisita.” (Luka 17:13, 14) Ka gona o bontšha go hlompha Molao wa Modimo, wo o dumelelago baperisita gore ba tsebiše batho gore balephera bao ba fodile. Ka go re’alo ba ka buša ba phela le batho bao ba phetšego gabotse mmeleng.—Lefitiko 13:9-17.

Balephera ba ba lesome ba bota matla a Jesu a go dira mehlolo. Ba ya go baperisita le pele ba ka fodišwa. Ge ba le tseleng, ba putswa ka baka la go dumela ga bona go Jesu. Ba thoma go lemoga le go kwa gore ba fodile!

Balephera ba senyane bao ba fodišitšwego ba a itshepelela. O tee ga a sepele. Monna yo yo e lego Mosamaria, o boela morago go yo nyaka Jesu. Ka baka la’ng? Monna yo o tloga a leboga Jesu ka baka la seo se diregilego. Monna yo e bego e le molephera o “reta Modimo ka lentšu le le hlabošago,” a lemoga gore ge e le gabotse Modimo ke yena yo a mo fodišitšego. (Luka 17:15) Ge a hwetša Jesu, o wela pele ga gagwe, a mo leboga.

Jesu o botša bao a nago le bona, o re: “Na ga se gwa hlwekišwa ba lesome? Bjale ba bangwe ba senyane ba kae? Na go hlokile ba ba boago go tla go reta Modimo, ge e se motho yo wa setšhaba se sengwe?” Ke moka Jesu o botša Mosamaria yo o re: “Ema o sepele; tumelo ya gago e go fodišitše.”—Luka 17:17-19.

Ka go fodiša balephera ba lesome, Jesu o bontšha gore o thekgwa ke Jehofa Modimo. Ga se feela gore o tee wa ba lesome o ile a fodišwa ka tiro ya Jesu eupša o ile a tsena tseleng ya go tlo hwetša bophelo. Ga re phele nakong yeo Modimo a dirišago Jesu go dira diphodišo tše bjalo. Lega go le bjalo, ka go dumela go Jesu, re ka ba tseleng ya go tlo hwetša bophelo, e lego bophelo bjo bo sa felego. Na re bontšha gore re a leboga, go swana le ge monna yola wa Mosamaria a dirile?