Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 96

Jesu o Araba Mmuši yo a Humilego wa Lesogana

Jesu o Araba Mmuši yo a Humilego wa Lesogana

MATEO 19:16-30 MAREKA 10:17-31 LUKA 18:18-30

  • LESOGANA LA MOHUMI LE BOTŠIŠA MABAPI LE KAMOO LE KA HWETŠAGO BOPHELO BJO BO SA FELEGO

Jesu o sa dutše a sepela go phatša Perea go yela ka thokong ya Jerusalema. Lesogana la mohumi le kitimela go yena gomme la wa ka matolo pele ga gagwe. Lesogana le ke “yo mongwe wa babuši,” mohlomongwe le šoma e le molaodi yo a okamelago sinagoge goba ke setho sa lekgotla la Sanhedrine. Le botšiša ka gore: “Morutiši yo Botse, ke swanetše go dira’ng gore ke je bohwa bja bophelo bjo bo sa felego?”—Luka 8:41; 18:18; 24:20.

Jesu o araba ka gore: “Ke ka baka la’ng o mpitša yo botse? Ga go yo botse ge e se o tee, yena Modimo.” Mohlomongwe lesogana le le diriša polelwana e rego “yo botse” e le sereto se se tlwaelegilego, e lego seo borabi ba se dirišago. Gaešita le ge Jesu a na le bokgoni bja go ruta, o tsebiša lesogana le gore sereto se se rego “yo Botse,” se swanetše Modimo feela.

Jesu o le eletša ka gore: “Ge e ba o nyaka go tsena bophelong, gona boloka ditaelo ka go se kgaotše.” Ka gona lesogana le le mmotšiša le re: “Dife?” Jesu o tsopola e mehlano ya Melao e Lesome—yeo e lego mabapi le go bolaya, go hlotlola, go utswa, go nea bohlatse bja maaka le go godiša batswadi. Ke moka o oketša ka molao o mongwe o bohlokwa, o re: “O rate moagišani wa gago ka mokgwa wo o ithatago ka wona.”—Mateo 19:17-19.

Lesogana le le araba ka gore: “Tšeo ka moka ke di bolokile; ke sa hlaelelwa ke eng?” (Mateo 19:20) Le ka ba le nagana gore le swanetše go dira tiro e itšego yeo e tlago go le dira gore le swanelegele bophelo bjo bo sa felego. Ge Jesu a lemoga kgopelo e tšwago pelong ya lesogana le, ‘a kwa a le rata.’ (Mareka 10:21) Lega go le bjalo, lesogana le le na le lepheko pele ga lona.

Lesogana le le rata mahumo a lona, ka gona Jesu o re go lona: “Go na le selo setee se se hlaelelago go wena: Sepela o yo rekiša dilo tše o nago le tšona o nee badiidi gomme o tla ba le letlotlo legodimong, ke moka o tle o be molatedi wa ka.” Ee, lesogana le le be le ka abela badiidi tšhelete ya lona, bao ba ka se kgonego go le lefa gomme la ba morutiwa wa Jesu. Mohlomongwe Jesu o kwela lesogana le bohloko, o bona le emelela gomme le sepela le nyamile. Go rata ga lesogana le mahumo, e lego ‘dilo tše dintši’ tša lona, go dira gore le se bone letlotlo la kgonthe. (Mareka 10:21, 22) Jesu o re: “E tla ba selo se thata gakaakang go bao ba nago le tšhelete go tsena Mmušong wa Modimo!”—Luka 18:24.

Barutiwa ba makatšwa ke go kwa mantšu a le go makatšwa ke seo bjale Jesu a se bolelago, ge a re: “Ge e le gabotse, go bonolo gore kamela e tsene ka lešobana la nalete ya go roka go e na le gore mohumi a tsene Mmušong wa Modimo.” Seo se tutuetša barutiwa go botšiša gore: “Ke mang yo go ka kgonegago gore a phološwe?” Na go phološwa e tloga e le selo se thata seo motho a ka se se fihlelelego? Jesu o ba lebelela ka mahlong gomme a ba araba ka gore: “Dilo tše di sa kgonegego go batho di a kgonega go Modimo.”—Luka 18:25-27.

Petro o bontšha gore barutiwa ba dirile kgetho yeo e fapanego le ya lesogana la mohumi, o re: “Bona! Re tlogetše dilo ka moka gomme ra go latela; gabotsebotse re tla hwetša’ng?” Jesu o bolela ka mafelelo a phetho ya bona e botse, o re: “Nakong ya go mpshafatšwa ga dilo, ge Morwa wa motho a dula sedulong sa gagwe sa bogoši sa letago, lena ba le ntatetšego le lena le tla dula didulong tše lesomepedi tša bogoši, le ahlola meloko e lesomepedi ya Isiraele.”—Mateo 19:27, 28.

Go molaleng gore Jesu o nagana ka nako e tlago mo lefaseng ge go tla be go tsošološwa maemo ao a bego a le gona serapeng sa Edene. Ruri Petro le barutiwa ba bangwe ba tla putswa ka gore ba buše le Jesu godimo ga lefase la Paradeise, e lego moputso woo o tlogago o feta boikgafo le ge e le bofe bjoo ba ka bo dirago!

Lega go le bjalo, ga se gore meputso ka moka ba tla e hwetša nakong e tlago. Ga bjale barutiwa ba gagwe ba thabela e mengwe ya yona. Jesu o re: “Ga go yo a tlogetšego ntlo, mosadi, bana babo, batswadi goba bana ka baka la Mmušo wa Modimo, yo a ka palelwago ke go hwetša tše dintši kudu mo lebakeng le la nako gomme tshepedišong e tlago ya dilo a hwetša bophelo bjo bo sa felego.”—Luka 18:29, 30.

Ee, kae le kae moo barutiwa ba gagwe ba yago gona, ba ka thabela go ba le borwarre le barapedigotee le bona, e lego segwera sa kgauswiuswi le se bohlokwahlokwa go feta seo ba se thabelago le ditho tša malapa a bona. Ka manyami, go bonagala mmuši yo a humilego wa lesogana a tlo lahlegelwa ke tšhegofatšo yeo gotee le moputso wa bophelo Mmušong wa Modimo wa legodimong.

Jesu o oketša ka gore: “Eupša ba bantši ba e lego ba pele e tla ba ba morago gomme ba morago ya ba ba pele.” (Mateo 19:30) Jesu o ra go re’ng?

Mmuši yo a humilego wa lesogana o gare ga ba “pele,” ka ge a le gare ga baetapele ba Bajuda. Ka ge lesogana le le boloka ditaelo tša Modimo, le bonagala le holofetša kudu gomme go ka letelwa mo gontši go lona. Eupša le etiša mahumo le dilo tšeo le nago le tšona pele bophelong. Ka lehlakoreng le lengwe, batho feela ba naga ba bona therešo le tsela e išago bophelong go seo Jesu a se rutago. Go ka thwe e bile ba “morago,” eupša bjale e ba ba “pele.” Ba ka fagahlela go dula gotee le Jesu didulong tša bogoši legodimong gomme ba buša lefase la Paradeise.