Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 98

Baapostola ba Tsoma Maemo Gape

Baapostola ba Tsoma Maemo Gape

MATEO 20:17-28 MAREKA 10:32-45 LUKA 18:31-34

  • JESU O A BUŠA O BOLELA E SA LE PELE KA LEHU LA GAGWE

  • O SWARAGANA LE TABA YA BAAPOSTOLA YA GO KGANYOGA MAEMO

Ge Jesu le barutiwa ba gagwe ba feleletša leeto la bona ka borwa kua Perea ba lebile Jerusalema, ba tshela Noka ya Jorodane kgauswi le Jeriko. Ba bangwe ba sepela le bona ba ya Pasekeng ya 33 C.E.

Jesu o etile barutiwa pele, o ikemišeditše go fihla motseng ka nako bakeng sa Paseka. Eupša barutiwa ba tšhogile. Pejana, ge Latsaro a be a hwile gomme Jesu a le kgauswi le go tloga Perea a eya Judea, Thomase o ile a botša ba bangwe a re: “Le rena a re yeng, gore re yo hwa le yena.” (Johane 11:16, 47-53) Ka gona go ya Jerusalema go bea bophelo kotsing gomme go a kwagala ge barutiwa ba boifa go ya moo.

E le ge a ba lokišetša seo se letšego ka pele, Jesu o iša baapostola ka thokwana gomme o re go bona: “Re rotogela Jerusalema, Morwa wa motho o tla gafelwa baperisita ba bagolo le bamangwalo, bona ba tla mo ahlolela lehu, ba tla mo gafela batho ba ditšhaba gore ba dire metlae ka yena le go mo otla le go mo kokotela koteng ke moka ka letšatši la boraro o tla tsošwa.”—Mateo 20:18, 19.

Le ke lekga la boraro leo ka lona Jesu a boditšego barutiwa ba gagwe ka lehu la gagwe le tsogo ya gagwe. (Mateo 16:21; 17:22, 23) Lega go le bjalo, lebakeng le o bolela gore o tla bolaelwa koteng. Ba mo theeditše, fela ga ba kwešiše seo a ba botšago sona. Mohlomongwe ba letetše gore mmušo wa Isiraele o tsošološwe lefaseng, e le ge ba nyaka go thabela letago le kgodišo mmušong wa lefaseng ba na le Kriste.

Mmago baapostola ba babedi e lego Jakobo le Johane, yo go bonagalago e le Salome, o gare ga bao ba sepelago le Jesu. Jesu o reile baapostola ba ba babedi leina leo le bolelago gore “barwa ba modumo,” gomme ga go pelaelo gore o ba reile ka baka la mokgwa wa bona wa go galefa. (Mareka 3:17; Luka 9:54) E šetše e le nakwana ba ba babedi ba fišegela go ba le maemo Mmušong wa Kriste. Mmago bona o tseba seo. Bjale o ba yela go Jesu, o khunama pele ga gagwe gomme a kgopela gore a mo direle selo se itšego. Jesu o a botšiša o re: “O nyaka’ng?” Yena o re: “Ntšha lentšu la gore mo go barwa ba ba ka ba babedi yo mongwe a dule ka letsogong la gago la le letona gomme yo mongwe ka go la le letshadi Mmušong wa gago.”—Mateo 20:20, 21.

Ge e le gabotse kgopelo ye ke ya Jakobo le Johane. Ka ge Jesu a sa tšwa go hlalosa dihlong le go kokobetšwa tšeo di tlago go mo wela, o re go bona: “Ga le tsebe se le se kgopelago. Na le ka nwa senwelo seo ke tla tlogago ke se nwa?” Ba araba ba re: “Re ka se nwa.” (Mateo 20:22) Lega go le bjalo, mohlomongwe ba tloga ba sa kwešiše seo se se se bolelago go bona.

Lega go le bjalo, Jesu o re go bona: “Ruri le tla nwa senwelo sa ka, eupša madulo a ka letsogong la ka la le letona le ka go la le letshadi ga se nna yo nka a neago, eupša ke a bao ba a lokišeditšwego ke Tate.”—Mateo 20:23.

Barutiwa ba bangwe ba a galefa ge ba ekwa ka kgopelo ya Jakobo le Johane. Na e ka ba e le gore Jakobo le Johane ba ile ba ipolelela ngangišanong ya pejana mabapi le gore yo mogolo ke mang? (Luka 9:46-48) Go sa šetšwe seo, kgopelo ya gona bjale e utolla gore ba Lesomepedi ga se ba diriša keletšo yeo Jesu a ba neilego yona mabapi le gore ba itshware bjalo ka ba banyenyane. Ba sa phegeletše kganyogo ya bona ya go nyaka maemo.

Jesu o phetha ka go swaragana le ngangišano yeo e tsogilego le lehloyo leo e le bakago. O kgoboketša ba Lesomepedi gomme a ba eletša ka lerato, a re: “Le a tseba gore bao go bonagalago ba buša ditšhaba ba a di buša gomme ba bagolo ba tšona ba a di laola. Ga go bjalo gare ga lena, eupša mang le mang yo a nyakago go ba yo mogolo gare ga lena e swanetše go ba modiredi wa lena, gomme mang le mang yo a nyakago go ba wa pele gare ga lena e swanetše go ba mohlanka wa bohle.”—Mareka 10:42-44.

Jesu o bolela ka mohlala woo ba swanetšego go o ekiša, e lego mohlala wa gagwe. O hlalosa gore: ‘Morwa wa motho ga se a tlela go hlankelwa, eupša o tletše go hlankela le go nea moya wa gagwe gore e be topollo bakeng sa ba bantši.’ (Mateo 20:28) Lebakeng la nywaga e ka bago e meraro, Jesu o be a dutše a hlankela ba bangwe. E bile o sa dutše a tla dira bjalo go fihla bokgoleng bja gore a hwele batho! Barutiwa ba swanetše go ba le pono e bjalo e swanago le ya Kriste ya go nyaka go hlankela ba bangwe go e na le go hlankelwa, gore ba itire ba banyenyane go e na le gore ba be maemong.

Ithute ka mo go oketšegilego

Eba yo Monyenyane ka go Hlagolela Boikokobetšo

Re ka bonagatša bjang boikokobetšo ditswalanong tša rena le ba bangwe?