Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 94

Dinyakwa tše Pedi tše Bohlokwa—Thapelo le Boikokobetšo

Dinyakwa tše Pedi tše Bohlokwa—Thapelo le Boikokobetšo

LUKA 18:1-14

  • SESWANTŠHO SA MABAPI LE MOHLOLOGADI YO A PHEGELELAGO

  • MOFARISEI LE MOLEKGETHO

Jesu o šetše a boditše barutiwa ba gagwe seswantšho sa mabapi le go phegelela thapelong. (Luka 11:5-13) Go ka direga gore bjale o kua Samaria goba Galilea, gomme o sa buša a gatelela go nyakega ga go phegelela thapelong. O dira bjalo ka go anega seswantšho se se latelago, o re:

“Motseng o mongwe go be go na le moahlodi yo a bego a sa boife Modimo e bile a sa hlomphe motho. Gona moo motseng woo go be go na le mohlologadi yo a bego a dula a eya go yena a re: ‘Kgonthišetša gore ke hwetša toka go moganetši wa ka kgorong.’ Ee, o ile a tšea lebakanyana a sa rate go dira bjalo, eupša ka morago a ipotša a re: ‘Le ge ke sa boife Modimo goba go hlompha motho, fela ka baka la ge mohlologadi yo a ntshwenya ka mehla, ke tla bona gore o hwetša toka, e le gore a se ke a dulela go tla gomme a nngamola hlogo ka go nkgopela dilo tše dintši.’”—Luka 18:2-5.

Ge Jesu a bolela kamoo seswantšho se se šomago ka gona, o re: “Ekwang seo moahlodi yo le ge a se a loka a se boletšego! Ruri, na Modimo a ka se ke a dira gore toka e direlwe bakgethwa ba gagwe bao ba mo goeletšago mosegare le bošego? Le gona a ka se ba felele pelo.” (Luka 18:6, 7) Ka go re’alo, Jesu o bontšha’ng ka Tatagwe?

Go molaleng gore Jesu ga a bolele gore Jehofa Modimo o swana le moahlodi yo yo a sa lokago. Ntlha ya gagwe e akaretša go se swane ga bona: Ge e ba moahlodi yo a sa lokago a tla arabela ge mohlologadi a phegelela dikgopelong tša gagwe, gona ga go na pelaelo ya gore Modimo o tla dira bjalo. O lokile e bile o botho gomme o tla araba ge e ba batho ba gagwe ba sa lape go rapela. Re ka bona se go seo Jesu a se bolelago, ge a re: “Ruri ke a le botša: [Modimo] o tla dira gore toka e dirwe go bona ka bjako.”—Luka 18:8.

Gantši babotlana le badiidi ga ba hwetše toka, mola batho ba matla le ba humilego gantši ba direlwa dilo gabotse. Eupša yeo ga se tsela ya Modimo ya go dira dilo. Ge nako ya maleba e fihla, Modimo o tla kgonthišetša gore batho ba babe ba a otlwa gomme bahlanka ba gagwe bona ba hwetša bophelo bjo bo sa felego.

Ke bomang bao ba nago le tumelo e swanago le ya mohlologadi yoo? Ke batho ba bakae bao ba tlogago ba dumela gore Modimo o tla “dira gore toka e dirwe go bona ka bjako”? Jesu o sa tšwa go bontšha go nyakega ga go phegelela thapelong. Bjale, ge e le mabapi le go ba le tumelo matleng a thapelo, Jesu o botšiša gore: “Ge Morwa wa motho a fihla, na ruri o tla hwetša tumelo ya mohuta wo mo lefaseng?” (Luka 18:8) Seo se bolelwago ke gore tumelo e bjalo e tla be e se ya ata ge Kriste a fihla.

Ba bangwe bao ba theeditšego Jesu ba ikwa ba kgodišegile ka tumelo ya bona. Ba a ikholofela gore ba lokile, mola ba lebelela ba bangwe ka go ba nyatša. Jesu o lebiša seswantšho se go bona, o re:

“Banna ba babedi ba ile ba rotogela tempeleng go yo rapela, yo mongwe e le Mofarisei gomme yo mongwe e le molekgetho. Mofarisei a ema a rapela ka dilo tše mo pelong a re: ‘Modimo, ke a go leboga gobane ga ke bjalo ka batho ba bangwe, bao e lego bahlakodi, ba sa lokago, dihlotlolo goba gaešita le bjalo ka molekgetho yo. Ke ikona dijo gabedi ka beke; ke ntšha sa lesome sa dilo ka moka tšeo ke di hwetšago.’”—Luka 18:10-12.

Bafarisei ba tsebja ka go itira ba lokilego ka tsela ya bomponeng. Ba dira bjalo gore ba kgahle batho ba bangwe. Matšatši ao ba tlwaetšego go ikona dijo ao ba ipeetšego ona ke ka Mošupologo le ka Labone, e lego matšatši a leemaema mebarakeng, a ge ba tla bonwa ke batho ba bantši. E bile ga ba fetwe ke go lefa karolo ya lesome gaešita le dimeleng tše dinyenyane. (Luka 11:42) Dikgwedi tše sego kae pejana, ba be ba nyatša batho feela, ba re: “Lešaba le leo le sa tsebego Molao [go ya ka pono ya Bafarisei] ke batho ba rogakilwego.”—Johane 7:49.

Jesu o tšwela pele ka seswantšho sa gagwe, o re: “Eupša molekgetho a eme kgole, a sa rate gaešita le go emišetša mahlo a gagwe legodimong, eupša a duletše go itshetla sehuba a re: ‘Modimo, ntšhokele, nna modiradibe.’” Ka boikokobetšo molekgetho o amogela dibe tša gagwe. Jesu o phetha ka gore: “Ruri ke a le botša: Monna yo o ile a theogela ntlong ya gagwe a hlatsetšwe e le yo a lokilego kudu go feta monna yola yo mongwe [wa Mofarisei], gobane yo mongwe le yo mongwe yo a ikgodišago o tla kokobetšwa, eupša yo a ikokobetšago o tla godišwa.”—Luka 18:13, 14.

Ka go re’alo, Jesu o hlalosa gabotse taba ya go nyakega ga gore motho a ikokobetše. Yeo ke keletšo e holago bakeng sa barutiwa ba gagwe, bao ba goletšego lekokong leo go lona Bafarisei bao ba itirago baloki ba ratago maemo. E bile ke keletšo e bohlokwa go bohle bao e lego balatedi ba Jesu.