Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 110

Letšatši la Jesu la Mafelelo a le Tempeleng

Letšatši la Jesu la Mafelelo a le Tempeleng

MATEO 23:25–24:2 MAREKA 12:41–13:2 LUKA 21:1-6

  • JESU O TŠWELA PELE GO SOLA BAETAPELE BA BODUMEDI

  • TEMPELE E TLA FEDIŠWA

  • MOHLOLOGADI WA MODIIDI O NTŠHA DITŠHELETIANA TŠE PEDI TŠA TŠHIPI

Nakong ya ge Jesu a tšwelela la mafelelo tempeleng, o tšwela pele go pepentšha boikaketši bja bamangwalo le Bafarisei, gomme ka go lebanya o ba bitša baikaketši. O diriša mantšu a seswantšhetšo ao a rego: “Le hlwekiša bokantle bja senwelo le mogopo eupša ka gare di tletše tše di hutšwego le go hloka tekatekano. Wena mofarisei wa sefofu, hlwekiša pele bokagare bja senwelo le mogopo gore le bokantle bo hlweke.” (Mateo 23:25, 26) Gaešita le ge Bafarisei ba le šedi kudu ge go tliwa tabeng ya bohlweki bja Molao le ponagalo ya ka ntle, ba hlokomologa motho wa ka gare e bile ba palelwa ke go sekiša pelo ya bona ya seswantšhetšo.

Le gona boikaketši bja bona bo bonagala le go ikemišetšeng ga bona go aga le go kgabiša mabitla a baporofeta. Lega go le bjalo, go etša ge Jesu a bolela, ke “barwa ba bao ba bolailego baporofeta.” (Mateo 23:31) Se se bonagetše maitekong a bona a go nyaka go bolaya Jesu.—Johane 5:18; 7:1, 25.

Ke moka Jesu o bontšha seo se letetšego baetapele ba ba bodumedi ge e ba ba sa itshole, o re: “Lena dinoga, bana ba marabe, kahlolo ya Gehenna le tla e tšhabela bjang?” (Mateo 23:33) Moedi wa Hinomo wo o lego kgauswi le moo o dirišetšwa go fiša matlakala, e lego seo se swantšhetšago phedišo ya ka mo go sa felego yeo e letetšego bamangwalo le Bafarisei ba babe kudu.

Barutiwa ba Jesu ba tla mo emela e le “baporofeta le banna ba bohlale le bahlahli ba phatlalatša.” Ba tla swarwa bjang? Ge Jesu a bolela le baetapele ba bodumedi, o re: “Ba bangwe ba [barutiwa ba ka] le tla ba bolaya la ba kokotela koteng, ba bangwe ba bona le tla ba otla disinagogeng tša lena gomme la ba hlomara go tloga motseng o mongwe go ya go o mongwe, gore madi ohle a go loka a faladitšwego lefaseng a tle godimo ga lena, go tloga ka madi a Abele wa moloki go fihla ka madi a Sakaria . . . yo le mmolailego.” O ba lemoša ka gore: “Ruri ke re go lena: Dilo tše ka moka di tla tlela moloko wo.” (Mateo 23:34-36) Seo se direga ka 70 C.E. ge madira a Baroma a fediša Jerusalema gomme Bajuda ba diketekete ba ehwa.

Jesu o nyamišwa ke go naganišiša ka boemo bjo. Jesu o bolela a kwele bohloko, o re: “Hee Jerusalema, hee Jerusalema, wena mmolai wa baporofeta le yo a kgatlago ka maswika bao ba rometšwego go wena—ke gantši gakaakang ke nyaka go bokanya bana ba gago gotee ka tsela yeo kgogo e bokanyago matswiana a yona ka tlase ga diphego tša yona! Eupša lena ga se la ka la nyaka. Bonang! Modimo o tla lahla ntlo ya lena.” (Mateo 23:37, 38) Bao ba kwago mantšu a ba swanetše go ba ba ipotšiša gore o bolela ka “ntlo” efe. Na a ka ba a be a šupa tempele e botse yeo e lego Jerusalema, yeo go bonagalago Modimo a e šireletša?

Ke moka Jesu o oketša ka gore: “Ke re go lena: Le ka se hlwe le mpona go tloga bjale go ya pele go fihla ge le re: ‘Go šegofaditšwe yo a tlago ka leina la Jehofa!’” (Mateo 23:39) O tsopola mantšu a boporofeta a Psalme 118:26 a rego: “A go šegofatšwe Yo a tlago ka leina la Jehofa; re šegofaditše lena batho bao ba tšwago ntlong ya Jehofa.” Go molaleng gore gateetee ge tempele ye e fedišitšwe, ga go motho yo a tla tlago go yona ka leina la Modimo.

Bjale Jesu o ya karolong ya tempele yeo go nago le bobolokelo bja matlotlo bja sebopego sa phalafala. Batho ba tsenya meneelo lešobaneng le lenyenyane leo le lego ka godimo. Jesu o bona Bajuda ba fapafapanego ba dira sona seo, bahumi ba “lahlela ditšhelete tše dintši tša tšhipi” e le dimpho. Ke moka Jesu o bona mohlologadi wa modiidi a lahlela “ditšheletiana tša tšhipi tše pedi tša theko e nyenyane kudu.” (Mareka 12:41, 42) Ga go pelaelo gore Jesu o a tseba gore Modimo o thabela mpho ya mohlologadi yoo.

Jesu o bitša barutiwa ba gagwe, o re: “Ruri ke le botša gore mohlologadi yo wa modiidi o lahletše go feta bohle ba ba lahlelago tšhelete ka matloleng a matlotlo.” Seo se bjalo bjang? O a hlalosa o re: “Bohle ba lahletše ba ntšha go tše di ba tlaletšego, eupša yena bohloking bja gagwe, o lahletše sohle seo a bego a na le sona, sohle se a iphedišago ka sona.” (Mareka 12:43, 44) Ruri mohlologadi yo o nagana le go dira dilo ka tsela e tlogago e sa swane le ya baetapele ba bodumedi!

Ge letšatši la Nisani 11 le le gare le tšwela pele, Jesu o tloga tempeleng ka lekga la mafelelo. Yo mongwe wa barutiwa ba gagwe o goeletša ka gore: “Morutiši, anke o bone gore maswika a le meago ye di bjang!” (Mareka 13:1) Ke therešo gore a mangwe a maswika ao maboto a tempele a agilwego ka ona ke a magolo kudu, a dira gore e bonagale eka e tiile e bile e tla dulela sa ruri. Ka gona, go bonagala go makatša ge Jesu a re: “Na o lebeletše meago ye e megolo? Le gatee ga go leswika le le tlago go tlogelwa mo le le godimo ga leswika le lengwe la se ke la wišwa.”—Mareka 13:2.

Ka morago ga go bolela ditaba tše, Jesu le baapostola ba gagwe ba tshela Moedi wa Kidirone gomme ba ya lefelong tsoko ka godimo ga Thaba ya Mehlware. Nakong e nngwe o ikhwetša a na le baapostola ba bane, e lego Petro, Andrea, Jakobo le Johane. Ba kgona go bona tempele e botse kudu ba le moo.

Ithute ka mo go oketšegilego

Jesu o Porofeta ka Ditiragalo Tšeo di Tlago go Kgoma Lefase ka Moka

Pontšho yeo Jesu a e neilego baapostola ba gagwe e bolela’ng?