Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 133

Setopo sa Jesu se a Lokišeletšwa le go Bolokwa

Setopo sa Jesu se a Lokišeletšwa le go Bolokwa

MATEO 27:57–28:2 MAREKA 15:42–16:4 LUKA 23:50–24:3 JOHANE 19:31–20:1

  • SETOPO SA JESU SE FEGOLLWA KOTENG

  • SETOPO SE LOKIŠELETŠWA GO BOLOKWA

  • BASADI BA HWETŠA GO SE NA MOTHO LEBITLENG

Leswiswi le thoma go swara thapameng ya Labohlano, Nisani 14. Sabatha ya Nisani 15 e tla thoma ge letšatši le sobela. Jesu o šetše a hwile, eupša bahlakodi ba babedi bao ba lego hleng ga gagwe ba sa phela. Molao o re ditopo ‘di se ke tša lala koteng’ eupša go e na le moo di bolokwe “letšatšing lona leo.”—Doiteronomio 21:22, 23.

Go feta moo, thapama ya Labohlano e bitšwa letšatši la Tokišetšo ka gobane batho ba a apea gomme ba feleletša mešomo le ge e le efe yeo ba swanetšego go e fetša pele ga Sabatha. Ge letšatši le sobela, go tla thoma Sabatha e ‘kgolo.’ (Johane 19:31) Go bjalo ka gobane Nisani 15 e tla ba letšatši la mathomo la Monyanya wa Dinkgwa tše di sa Omelwago wa matšatši a šupago, woo ka mehla letšatši la wona la mathomo e lego Sabatha. (Lefitiko 23:5, 6) Nakong ye letšatši leo la mathomo le wela go Sabatha ya beke le beke, e lego letšatši la bošupa.

Ka gona Bajuda ba kgopela Pilato gore a akgofiše lehu la Jesu le la bahlakodi ba babedi bao ba lego hleng ga gagwe. Bjang? Ka gore maoto a bona a robje. Seo se tla ba palediša go diriša maoto a bona go kuka mebele ya bona gore ba kgone go hema. Mašole a a tla gomme a roba maoto a bahlakodi ba babedi. Eupša Jesu o bonagala a hwile, gomme ka go re’alo ga ba robe maoto a gagwe. Se se phethagatša Psalme 34:20 e rego: “O šireletša marapo ka moka a yena yoo; ga go le letee la ona leo le robegilego.”

E le go kgonthišetša gore Jesu o hwile e le ruri, lešole le mo hlaba ka lerumo lehlakoreng, la hlaba kgauswi le pelo. Beibele e re: “Gwa napa gwa tšwa madi le meetse.” (Johane 19:34) Se se phethagatša lengwalo le lengwe le le rego: “Ba tla lebelela Yo ba mo hlabilego.”—Sakaria 12:10.

Josefa yo a tšwago motseng wa Arimathea, e lego “monna wa mohumi” le setho se se tumilego sa lekgotla la Sanhedrine, le yena o gona ge Jesu a bolawa. (Mateo 27:57) O hlaloswa e le “monna yo a lokilego le wa toka,” yo a “[letetšego] Mmušo wa Modimo.” Ge e le gabotse, ka ge e le “morutiwa wa Jesu ka sephiring ka baka la go boifa ga gagwe Bajuda,” ga se a thekga kahlolo yeo lekgotla le e filego Jesu. (Luka 23:50; Mareka 15:43; Johane 19:38) Josefa o rapa sebete gomme o kgopela setopo sa Jesu go Pilato. Pilato o bitša molaodi wa madira yo a hlokometšego moo gomme o kgonthišetša gore Jesu o hwile. Ge molaodi a re’alo, Pilato o phethagatša kgopelo ya Josefa.

Josefa o reka lešela le le hlwekilego le lebotse la leokodi gomme a fegolla setopo sa Jesu koteng. O phuthela setopo ka lešela e le ge a se lokišeletša go bolokwa. Nikodemo, “yo a ilego a tla go yena bošego ka lekga la pele,” o thuša go lokišetša setopo bakeng sa poloko. (Johane 19:39) O tla le motswako o bitšago kudu wa setlolo sa mira le dikgopha wa boima bja diponto tša Baroma tše lekgolo (dikhilograma tše 33). Setopo sa Jesu se phuthetšwe ka mašela ao a nago le dinoko tše, go ya ka tsela ya Bajuda ya go boloka.

Josefa o na le lebitla leo le sa kago la dirišwa leo le epilwego leswikeng kgauswi le moo, gomme setopo sa Jesu se latšwa ka go lona. Ke moka leswika le legolo le kgokološetšwa molomong wa lebitla. Se se dirwa ka lebelo, pele ga ge Sabatha e thoma. Maria Magdalena le Maria mmago Jakobo yo Monyenyane ba ka ba ba be ba thuša go lokišeletša setopo sa Jesu bakeng sa go bolokwa. Bjale ba kitimela gae “go yo lokišetša dinoko le makhura a monko o bose,” gore ba tlotše setopo sa Jesu gape ka morago ga Sabatha.—Luka 23:56.

Letšatšing le le latelago, e lego la Sabatha, baperisita ba bagolo le Bafarisei ba ya go Pilato ba re: “Re gopotše gore moikgakanyi yola ge a be a sa phela o ile a re: ‘Ke tla tsošwa ka morago ga matšatši a mararo.’ Ka gona laela gore lebitla le hlapetšwe go fihlela letšatšing la boraro, gore le ka mohla barutiwa ba gagwe ba se ke ba tla ba mo utswa gomme ba re go batho: ‘O tsošitšwe bahung!’ Ke moka boikgakanyo bjo bja mafelelo e tla ba bjo bobe go feta bja pele.” Pilato a re go bona: “Le na le baleti. Eyang go le hlapetša kamoo le tsebago ka gona.”—Mateo 27:63-65.

Ka masa a Sontaga, Maria Magdalena, Maria mmago Jakobo le basadi ba bangwe ba tla le dinoko lebitleng go tlo tlotša setopo sa Jesu. Ba a boledišana ba re: “Ke mang a tlago go re pshikološetša leswika a le tloša molomong wa lebitla?” (Mareka 16:3) Eupša go bile le tšhišinyego ya lefase. Godimo ga moo, morongwa wa Modimo o pshikološitše leswika, bahlapetši ba sepetše gomme go bonagala go se na motho ka lebitleng!