Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 120

Go ba Makala ao a Enywago le go ba Bagwera ba Jesu

Go ba Makala ao a Enywago le go ba Bagwera ba Jesu

JOHANE 15:1-27

  • MORARA WA KGONTHE LE MAKALA

  • KAMOO O KA DULAGO LERATONG LA JESU

Jesu o be a kgothatša baapostola ba gagwe bao ba botegago ka go ntšhetšana sa mafahleng le bona. Mohlomongwe e šetše e le ka morago ga bošegogare. Bjale Jesu o anega seswantšho se se kgothatšago.

O thoma ka gore: “Ke nna morara wa kgonthe gomme Tate ke molemi.” (Johane 15:1) Seswantšho sa gagwe se emela seo se boletšwego mabapi le setšhaba sa Isiraele nywagakgolong e fetilego. Setšhaba seo se be se bitšwa morara wa Jehofa. (Jeremia 2:21; Hosea 10:1, 2) Lega go le bjalo, Jehofa o lahla setšhaba seo. (Mateo 23:37, 38) Ka gona Jesu o rotoša kgopolo e nngwe. Jesu ke morara woo Tatagwe a bego a dutše a o thenela go tloga nakong ya ge yena Jesu a tlotšwa ka moya o mokgethwa ka 29 C.E. Eupša Jesu o hlalosa gore morara ga o emele yena feela, o re:

“Lekala le lengwe le le lengwe le le lego go nna leo le sa enywego dienywa [Tate] o a le tloša, le lengwe le le lengwe leo le enywago dienywa o a le thenela gore le enywe dienywa tše dintši. . . . Go etša ge lekala le ka se kgone go enywa dienywa le nnoši ka ntle le ge le dula morareng, ka tsela e swanago le ka se kgone ka ntle le ge le dula boteeng le nna. Ke nna morara, lena le makala.”—Johane 15:2-5.

Jesu o holofeditše barutiwa ba gagwe ba botegago gore ka morago ga ge a tlogile, o be a tla romela mothuši, e lego moya o mokgethwa. Matšatši a 51 ka morago, ge baapostola le ba bangwe ba amogela moya woo, bona e ba makala a morara. Le gona “makala” ka moka a be a tla swanelwa ke go dula boteeng le Jesu. Ka morero ofe?

Jesu o a hlalosa o re: “Yo a dulago boteeng le nna gomme nna ke dula boteeng le yena, yena yo o enywa dienywa tše dintši; gobane ka ntle le nna le ka se kgone go dira selo le gatee.” “Makala” a, e lego balatedi ba gagwe ba botegago, a be a tla enywa dienywa tše dintši, a ekiša dika tša Jesu, a bolela ka mafolofolo le ba bangwe ka Mmušo wa Modimo le go dira barutiwa ba oketšegilego. Go direga’ng ge e ba motho a sa dule boteeng le Jesu e bile a sa enywe dienywa? Jesu o a hlalosa o re: “Ge e ba motho le ge e le ofe a sa dule boteeng le nna, o lahlelwa ka ntle.” Ka lehlakoreng le lengwe, Jesu o re: “Ge e ba le dula boteeng le nna gomme dipolelo tša ka di dula go lena, kgopelang se sengwe le se sengwe seo le se kganyogago gomme se tla le diragalela.”—Johane 15:5-7.

Bjale Jesu o bolela ka seo a boletšego ka sona gabedi, e lego go boloka ditaelo tša gagwe. (Johane 14:15, 21) O hlalosa tsela e bohlokwa yeo ka yona barutiwa ba ka bontšhago gore ba dira seo, ge a re: “Ge e ba le boloka ditaelo tša ka, le tla dula leratong la ka go etša ge ke bolokile ditaelo tša Tate gomme ke dula leratong la gagwe.” Lega go le bjalo, go fo rata Jehofa Modimo le Morwa wa gagwe ga se gwa lekana. Jesu o re: “Ye ke taelo ya ka, gore le ratane go etša ge ke le ratile. Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe. Lena le bagwera ba ka ge e ba le dira seo ke le laelago sona.”—Johane 15:10-14.

Lebakeng la diiri tše sego kae, Jesu o tla bontšha lerato la gagwe ka go gafa bophelo bja gagwe bakeng sa bohle bao ba dumelago go yena. Mohlala wa gagwe o swanetše go tutuetša balatedi ba gagwe go ratana ka lerato lona leo la boikgafo. Lerato le le tla ba hlaola, bjalo ka ge Jesu a boletše pejana ge a be a re: “Bohle ba tla tseba ka se gore le barutiwa ba ka, ge e ba le ratana.”—Johane 13:35.

Baapostola ba swanetše go ela hloko gore Jesu o ba bitša “bagwera.” O hlalosa lebaka leo ka lona e lego bagwera ba gagwe, ge a re: “Ke le biditše bagwera gobane dilo ka moka tšeo ke di kwelego go Tate ke le tsebišitše tšona.” Ruri ye ke tswalano e bohlokwa yeo ba ka bago le yona, e lego ya go ba bagwera ba kgauswiuswi ba Jesu le go tseba seo Tate a mmoditšego sona! Lega go bjalo, ba swanetše go ‘tšwela pele ba enywa dienywa’ e le gore ba thabele tswalano ye. Ge ba ka dira bjalo, Jesu o re: ‘Selo le ge e le sefe seo le se kgopelago Tate ka leina la ka, o tla le nea sona.’—Johane 15:15, 16.

Go ratana ga “makala” a, e lego barutiwa ba gagwe, go tla ba thuša go kgotlelela seo se letšego ka pele. O ba lemoša gore lefase le tla ba hloya, fela o a ba homotša o re: “Ge e ba lefase le le hloya, le tsebe gore le ntlhoile pele ga ge le hloya lena. Ge nkabe le be le le karolo ya lefase, lefase le ka be le rata seo e lego sa lona. Ka ge le se karolo ya lefase, . . . ka baka leo lefase le le hloile.”—Johane 15:18, 19.

Ge Jesu a tšwela pele a hlalosa lebaka leo ka lona lefase le tlago go ba hloya, o re: “Ba tla le dira dilo tše ka moka ka baka la leina la ka, gobane ga ba tsebe yo a nthomilego.” Jesu o bolela gore ge e le gabotse mediro ya gagwe ya mehlolo e sola bao ba mo hloilego, ge a re: “Ge nkabe ke se ka ba direla mediro ye go sego motho yo a e dirilego, ba ka be ba se na sebe; eupša bjale ba mpone gomme ba ntlhoya, nna gotee le Tate.” Ge e le gabotse, lehloyo la bona le phethagatša boporofeta.—Johane 15:21, 24, 25; Psalme 35:19; 69:4.

Jesu o ba holofetša gape gore o tla romela mothuši, e lego moya o mokgethwa. Matla ao a magolo a hwetšwa ke balatedi ba gagwe ka moka gomme a kgona go ba thuša go enywa dienywa, e lego ‘go nea bohlatse.’—Johane 15:27.