Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 123

O Rapela a le Bohlokong bjo Šoro

O Rapela a le Bohlokong bjo Šoro

MATEO 26:30, 36-46 MAREKA 14:26, 32-42 LUKA 22:39-46 JOHANE 18:1

  • JESU A LE SERAPENG SA GETSEMANE

  • KUDUMELA YA GAGWE E BJALO KA MAROTHI A MADI

Jesu o fetša go rapela le baapostola ba gagwe ba botegago. Ke moka, “ka morago ga go opela ditumišo, ba tšwa ba ya Thabeng ya Mehlware.” (Mareka 14:26) Ba leba ka bohlabela serapeng seo se bitšwago Getsemane, moo Jesu a tlwaetšego go ya gona.

Gateetee ge ba fihla lefelong le le lebotse gare ga dihlare tša mehlware, Jesu o šia baapostola ba seswai. Mohlomongwe ba šala kgauswi le kgorwana ya serapa, ka gobane o re go bona: “Dulang mo ge ke eya kua go yo rapela.” Ge Jesu a sepela le baapostola ba bararo—Petro, Jakobo le Johane—o fetela pejana ka serapeng. O tshwenyega kudu gomme o re go ba bararo ba: “Moya wa ka o kwele bohloko o šoro, gaešita le go iša lehung. Dulang mo gomme le dule le phakgame le nna.”—Mateo 26:36-38.

Ge a eya kgojana le bona, Jesu o “wela fase [gomme a thoma go] rapela.” O rapela Modimo mabapi le eng nakong ye e hlobaetšago? O a rapela o re: “Tate, dilo tšohle di a kgonega go wena; tloša senwelo se go nna. Eupša e se be kamoo go ratago nna, fela e be kamoo go ratago wena.” (Mareka 14:35, 36) Jesu o ra go re’ng? Na o tšhaba go kgatha tema ya gagwe ya go ba Molopolodi? Le gatee!

Jesu o bone tlaišo e šoro ya ba bangwe bao ba bolawago ke Baroma a le legodimong. Ka ge e le motho yoo a kgomegago maikwelong e bile a kgona go kwa bohloko, Jesu ga a thabele seo se letšego ka pele. Lega go le bjalo, sa bohlokwa kudu ke gore o tlalelong ka gobane o bona gore go hwa ga gagwe bjalo ka sesenyi se šoro go ka tliša kgobošo leineng la Tatagwe. Diiring tše sego kae tše di latelago, o tla fegwa koteng bjalo ka ge eka o rogakile Modimo.

Ka morago ga go rapela nako e telele, Jesu o boela go baapostola ba bararo gomme o ba hwetša ba robetše. O re go Petro: “Na ga se la kgona le go phakgama le nna iri e tee? Dulang le phakgame gomme le rapele le sa kgaotše, gore le se tsene molekong.” Jesu o lemoga gore baapostola le bona ba gateletšegile le gore ke bošego. O oketša ka gore: “Go ba gona, moya o mafolofolo eupša nama e a fokola.”—Mateo 26:40, 41.

Ke moka Jesu o tloga ka lekga la bobedi gomme a kgopela Modimo gore a tloše “senwelo se.” Ge a boa, le lekgeng le o hwetša baapostola ba bararo ba robetše, mola ba swanetše go ba ba be ba rapela gore ba se tsene melekong. Ge Jesu a bolela le bona, ba “se tsebe gore ba mo arabe ba reng.” (Mareka 14:40) Ge Jesu a tloga gape lekgeng la boraro, o a khunama gore a rapele.

Jesu o tshwenyegile kudu ka gore go hwa ga gagwe bjalo ka sesenyi go tla goboša leina la Tatagwe. Lega go le bjalo, Jehofa o kwa dithapelo tša Morwa wa gagwe gomme lebakeng le lengwe ge a dutše a rapela Modimo o romela morongwa gore a mo matlafatše. Lega go le bjalo, Jesu ga a tlogele go lopa Tatagwe, eupša o tšwela pele “a rapela go tšwa pelong.” O gateletšegile o šoro. Ruri Jesu o imetšwe kudu! Go phela ga gagwe ka mo go sa felego le ga batho bao ba dumelago go ithekgile ka yena. Ge e le gabotse, “kudumela ya gagwe ya ba bjalo ka marothi a madi a rothela fase.”—Luka 22:44.

Ge Jesu a boela go baapostola ba gagwe ka lekga la boraro, o ba hwetša ba robetše gape. O re: “Ka nako e bjalo ka ye le robetše e bile le ikhuditše! Bonang! Nako ya gore Morwa wa motho a ekelwe diatleng tša badiradibe e batametše. Tsogang, a re sepeleng. Bonang! Moeki wa ka o batametše.”—Mateo 26:45, 46.

 

Ithute ka mo go oketšegilego

Ke ka Baka La’ng o Swanetše go Rapela ka Leina la Jesu?

Ela hloko kamoo go rapela ka leina la Jesu go godišago Modimo e bile go bontšhago go hlompha Jesu.