Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 126

O a Latolwa Ntlong ya Kayafa

O a Latolwa Ntlong ya Kayafa

Ka morago ga gore Jesu a golegwe serapeng sa Getsemane, baapostola ba a mo tlogela le go tšhaba ka baka la poifo. Lega go le bjalo, ba babedi ba bona ga ba sa tšhaba. Bona ke Petro “gotee le morutiwa yo mongwe,” yo go bonagalago e le moapostola Johane. (Johane 18:15; 19:35; 21:24) Ba ka ba ba nyaka go bona ge Jesu a išwa legaeng la Annase. Ge Annase a romela Jesu go Moperisita yo a Phagamego e lego Kayafa, Petro le Johane ba latela ba le kgojana. Mohlomongwe ba tšhogetše maphelo a bona gomme ba tshwenyegile ka seo se tlago go diragalela Mong wa bona.

Johane o tsena ka lapeng leo le lego ntlong ya Kayafa ka ge a tsebja ke moperisita yo a phagamego. Petro o dula ka ntle mojakong a bolela le ngwanenyana yo e lego mohlanka yo e bilego e le moletamojako go fihlela ge Johane a boa. Ke moka Petro o dumelelwa gore a tsene.

Bošegong bjoo go a tonya, ka gona bao ba lego ka lapeng ba goditše mollo. Petro o dula le bona e le gore a ikomoše ge a dutše a letile “gore a tle a bone pheletšo” ya tsheko ya Jesu. (Mateo 26:58) Bjale ge mollo o dutše o tuka, moletamojako yo a dumeletšego Petro go tsena, o mo lebeledišiša gabotse. Moletamojako yo a mmotšiša a re: “Na le wena ga o yo mongwe wa barutiwa ba motho yo?” (Johane 18:17) Le gona ga se yena feela yo a lemogago Petro gomme a mo latofatša gore o be a na le Jesu.—Mateo 26:69, 71-73; Mareka 14:70.

Se se tloga se nyamiša Petro. O leka ka matla gore a se bonwe, e bile o boela kgorong. Ka gona Petro o latola gore o be a na le Jesu, moo nakong e nngwe a ilego a re: “Ga ke mo tsebe e bile ga ke kwešiše se o se bolelago.” (Mareka 14:67, 68) Ke moka o thoma “go ena le go bolela gore o tla rogakwa,” seo se bolelago gore o ikemišeditše go dira keno ya gore mantšu a gagwe a a rereša le gore a otlwe ge e ba a sa rereše.—Mateo 26:74.

Go sa dutše go le bjalo, tsheko ya Jesu e tšwela pele gomme go bonagala e swaretšwe karolong ya ntlo ya Kayafa yeo e lego ka godimo ga lapa. Petro le ba bangwe bao ba letilego ka tlase ba ka ba ba bona ge dihlatse tše di fapafapanego tšeo di tlišitšwego gore di tlo nea bohlatse di tsena le go tšwa.

Mmolelo wa Petro wa Galilea o laetša gore o bolela maaka ge a latola Jesu. Go oketša moo, yo mongwe sehlopheng seo o tswalane le Malekose, yoo Petro a ilego a mo kgaola tsebe. Ka gona Petro o latofatšwa ka gore: “Na ga se ka go bona serapeng o na le yena?” Ge Petro a latola se ka lekga la boraro, mogogonope o a lla, go etša ge go boletšwe e sa le pele.—Johane 13:38; 18:26, 27.

Ka yona nako yeo, go bonagala Jesu a dutše mathuding ao a ukametšego lapa. Morena o a retologa ke moka a lebelela Petro ka mahlong gomme seo se swanetše go ba se ile sa hlaba Petro e le ruri. O gopola seo Jesu a se boletšego diiring tše sego kae pejana ge ba be ba le ka phapošing ya ka godimo. Akanya kamoo Petro a ikwago ka gona ge a bona seo a se dirilego! Petro a tšwela ka ntle a lla gabohloko.—Luka 22:61, 62.

Se se diregile bjang? Go tlile bjang gore Petro—yo a bego a tiile tswalanong ya gagwe le Modimo e bile a botega—a latole Mong wa gagwe? Therešo e a kgopamišwa gomme Jesu o dirwa gore a bonagale e le sesenyi se šoro. Petro nkabe a ile a emelela monna yo a se nago molato, eupša o ile a furalela Yena yoo a nago le “mantšu a bophelo bjo bo sa felego.”—Johane 6:68.

Phihlelo e kwešago bohloko ya Petro e bontšha gore gaešita le motho yo a nago le tumelo e bile a ineetše go Modimo, a ka wa ge e ba a se a itokišeletša gabotse diteko tšeo di sa letelwago. Eka seo se diragaletšego Petro e ka ba temošo go bahlanka ka moka ba Modimo!