Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 109

O Sola Baganetši Bao e Lego Badumedi

O Sola Baganetši Bao e Lego Badumedi

MATEO 22:41–23:24 MAREKA 12:35-40 LUKA 20:41-47

  • KRISTE KE MORWA WA MANG?

  • JESU O PEPENTŠHA BAGANETŠI BA BAIKAKETŠI

Baganetši ba Jesu bao e lego badumedi ba palelwa ke go mo goboša goba go mo tanya ka polelo e le gore ba mo gafele Baroma. (Luka 20:20) Bjale ge Jesu a sa le tempeleng ka Nisani 11, o tšea lemanoga le lengwe gomme o bontšha seo a lego sona e le ka kgonthe. O gata mogato wa pele, o ba botšiša gore: “Le nagana’ng ka Kriste? Na ke morwa wa mang?” (Mateo 22:42) Go a tsebega gore Kriste goba Mesia o swanetše go tšwa lelokong la Dafida. Ye ke karabo yeo ba e neago.—Mateo 9:27; 12:23; Johane 7:42.

Jesu o botšiša gore: “Bjale, go tla bjang gore Dafida ka pudulelo a mmitše Morena, a re: ‘Jehofa o itše go Morena wa ka: “Dula ka letsogong la ka la le letona go fihla ke bea manaba a gago ka tlase ga dinao tša gago”’? Ka baka leo, ge e ba Dafida a mmitša Morena, gona ke morwa wa gagwe bjang?”—Mateo 22:43-45.

Bafarisei ba a homola, ka ge ba holofela gore Mesia ke setlogolo sa Dafida, seo se ka ba lokollago bokgobeng bja Baroma. Ge Jesu a diriša mantšu a Dafida ao a begilwego go Psalme 110:1, 2, o hlalosa gore Mesia ga e fo ba mmuši yo e lego motho. Jesu ke Morena wa Dafida, gomme o tla buša ka morago ga go dula ka letsogong la le letona la Modimo. Karabo ya Jesu e tswalela baganetši ba gagwe melomo.

Barutiwa le batho ba bangwe ba bantši ba be ba dutše ba theeditše. Bjale Jesu o bolela le bona, o ba lemoša ka bamangwalo le Bafarisei. Banna bao ba “ipeile sedulong sa Moshe” gore ba rute Molao wa Modimo. Jesu o laela batheetši ba gagwe o re: “Dilo ka moka tše ba le botšago tšona le di dire gomme le di boloke, eupša le se ke la dira go ya ka ditiro tša bona, gobane ba a bolela fela ga ba dire.”—Mateo 23:2, 3.

Ke moka Jesu o nea mehlala ya boikaketši bja bona, o re: “Ba oketša bophara bja mapokisana ao a nago le mangwalo ao ba a rwalago e le ditšhireletšo.” Bajuda ba bangwe diphatleng tša bona le matsogong a bona ba bea mapokisana a a manyenyane kudu, ao a swerego ditemana tše di kopana tšeo di tšwago Molaong. Bafarisei ba godiša mapokisana a bona e le ge ba leka go bontšha gore ba fišegela Molao. Le gona, ba “lelefatša merumo ya diaparo tša bona.” Baisiraele ba be ba swanetše go itirela merumo ya mašaphu diaparong tša bona, eupša Bafarisei bona ba itirela mašaphu a matelele kudu. (Numeri 15:38-40) Mediro ka moka ye ba e dirago ba e direla “go bonwa ke batho.”—Mateo 23:5.

Barutiwa ba Jesu le bona ba be ba ka kgongwa ke kganyogo ya go rata maemo, ka gona o ba eletša ka gore: “Le se ke la bitšwa Rabi gobane Morutiši wa lena ke o tee, mola lena ka moka le le bana ba motho. Go feta moo, le se ke la bitša motho mo lefaseng la re tate, gobane Tatago lena ke o tee, Yo a lego legodimong. Le gona le se ke la bitšwa baetapele, gobane Moetapele wa lena ke o tee, Kriste.” Ka gona, barutiwa ba swanetše go itebelela le go dira dilo bjang? Jesu o ba botša gore: “Yo mogolo go le feta ka moka mo gare ga lena e swanetše go ba modiredi wa lena. Mang le mang yo a ikgodišago o tla kokobetšwa gomme mang le mang yo a ikokobetšago o tla godišwa.”—Mateo 23:8-12.

Jesu gape o bolela lelokelelo la madimabe go bamangwalo le Bafarisei bao e lego baikaketši, o re: “Go madimabe lena bamangwalo le Bafarisei, lena baikaketši! Gobane le tswalelela batho Mmušo wa magodimo, gobane lena ga le tsene, le gona ga le dumelele bao ba nyakago go tsena.”—Mateo 23:13.

Jesu o sola Bafarisei ka baka la go se tšeele ga bona godimo dilo tšeo Jehofa a di lebelelago e le tša bohlokwahlokwa, ka ge se se bontšhwa ke dikgetho tše di feteletšego tšeo ba di dirago. Ka mohlala, ba re: “Ge e ba motho a ena ka tempele, ga se selo, eupša ge e ba motho a ena ka gauta ya tempele, o na le molato.” Ka go re’alo ba bontšha bofofu bja bona ditabeng tša boitshwaro, ka ge ba šetša kudu gauta ya tempele go feta go šetša gore tempeleng ke moo ba rapelago Jehofa le moo ba ka batamelago kgauswi le yena. Le gona ba “hlokomologile ditaba tše bohlokwa tša Molao, e lego, toka le kgaugelo le potego.”—Mateo 23:16, 23; Luka 11:42.

Jesu o bitša Bafarisei ba ‘bahlahli ba foufetšego, bao ba ntšhago monang ka dinong tša bona eupša ba kwametša kamela!’ (Mateo 23:24) Ba ntšha monang ka beineng ya bona ka gobane khunkhwane yeo ga se e hlweke go ya ka Molao. Lega go le bjalo, tsela yeo ba hlokomologago ditaba tše bohlokwa tša Molao go swana le gore ba metša kamela, e lego phoofolo yeo le yona e sego ya hlweka go ya ka Molao, yeo e fetago monang kgole.—Lefitiko 11:4, 21-24.

Ithute ka mo go oketšegilego

Jesu Kriste—Mesia yo a Holofeditšwego

Jesu o ile a phethagatša diporofeto ka moka tša Beibele ka Mesia. Kgonthišetša ka Beibeleng ya gago gore diporofeto tše di ile tša phethagala ka botlalo.

Na Bakriste ba Swanetše go Diriša Direto tša Bodumedi?

Direto “mohlomphegi” le “mopishopo” di tlwaelegile. Na direto tše bjalo le tše dingwe di dumelelwa ke Beibele?