Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 115

Paseka ya Jesu ya Mafelelo e a Batamela

Paseka ya Jesu ya Mafelelo e a Batamela

MATEO 26:1-5, 14-19 MAREKA 14:1, 2, 10-16 LUKA 22:1-13

  • JUDASE ISIKARIOTE O LEFELWA GO EKA JESU

  • BAAPOSTOLA BA BABEDI BA LOKIŠETŠA PASEKA

Jesu o sa tšwa go ruta baapostola ba bane Thabeng ya Mehlware, a araba potšišo ya bona ya mabapi le go ba gona ga gagwe ga nakong e tlago le bofelo bja tshepedišo ya dilo.

Letšatši la Nisani 11 e bile la leemaema! Mohlomongwe ge ba le tseleng ba boela Bethania go yo lala gona, Jesu o botša baapostola ba gagwe o re: “Le a tseba gore matšatši a mabedi go tloga bjale ke Paseka gomme Morwa wa motho o tla gafelwa go kokotelwa koteng.”—Mateo 26:2.

Mohlomongwe Jesu o fetša letšatši le le latelago la Laboraro a ituletše le baapostola ba gagwe. Ka Labobedi, o be a ile a kgalema baetapele ba bodumedi le go ba pepentšha phatlalatša. Ka gona ba nyaka go mmolaya. Ka baka leo, ga a iponagatše ka Nisani 12 e le gore go se ke gwa ba le seo se mo šitišago go keteka Paseka le baapostola ba gagwe ka morago ga ge letšatši le sobetše mantšiboeng ao a latelago, ge Nisani 14 e thoma.

Eupša baperisita ba bagolo le bagolo setšhabeng ba duletše go bolela pele Paseka e thoma. Ba bokana lapeng la moperisita yo a phagamego e lego Kayafa. Ba bokanela’ng? Ba befetšwe ka gobane Jesu o be a dutše a ba pepentšha. Bjale ba rerišana seng sa bona gore “ba sware Jesu ka boradia ba mmolaye.” Ba tla dira seo neng le gona bjang? Ba re: “E sego monyanyeng, e le gore go se ke gwa tsoga mpherefere gare ga batho.” (Mateo 26:4, 5) Ba a boifa ka gobane Jesu o ratwa ke batho ba bantši.

Ge ba sa letile seo, baetapele ba bodumedi ba hwetša moeng. Ba makatšwa ke gore moeng yoo ke yo mongwe wa baapostola ba Jesu e lego Judase Isikariote. Ruri Sathane o bjetše ka go yena kgopolo ya gore a eke Mong wa gagwe! Judase o a ba botšiša o re: “Le tla nnea eng gore ke le ekele Yena?” (Mateo 26:15) Ka ge se se ba thabiša, ba “dumelelana go mo nea tšhelete ya silifera.” (Luka 22:5) Ba mo nea bokae? Ba dumelelana ba thabile gore ba tla mo nea ditsekana tše 30 tša tšhelete ya tšhipi. Taba ya gore lekgoba le bitša dishekele tše 30 ke ya bohlokwa. (Ekisodo 21:32) Ka gona baetapele ba bodumedi ba nyatša Jesu, ba re ga a bohlokwa. Judase bjale o thoma “go nyaka sebaka se sebotse sa go mo ekela bona go se na lešaba le le ba dikologilego.”—Luka 22:6.

Nisani 13 e thoma ka Laboraro ge letšatši le sobela, gomme bjo ke bošego bja Jesu bja botshelela le bja mafelelo bjoo a bo fetšago a le Bethania. Letšatšing le le latelago, go tla nyakega gore go dirwe ditokišetšo tša mafelelo bakeng sa Paseka. Go swanetšwe go hwetšwe kwana gore e hlabje le go bešwa e feletše ka morago ga ge Nisani 14 e thomile. Ba tla jela kae, le gona go tla apea mang? Jesu ga se a hlalosa ditaba ka botlalo mabapi le seo. Ka gona, Judase ga a kgone go botša baperisita ba bagolo ditaba tšeo.

Mohlomongwe e sa le ka pela thapameng ya Labone, Jesu o roma Petro le Johane Bethania, o re: “Sepelang le re lokišetše Paseka gore re tle re je.” Ba araba ba re: “O nyaka gore re e lokišetše kae?” Jesu o a hlalosa o re: “Ge le tsena motseng, monna yo a rwelego moeta wa meetse o tla gahlana le lena. Le mo latele ntlong yeo a tsenago go yona. Le re go mong wa ntlo: ‘Morutiši o re: “E kae phapoši ya baeng yeo nka jelago Paseka le barutiwa ba ka go yona?”’ Ke moka monna yoo o tla le bontšha phapoši e kgolo ya ka godimo yeo e nago le dilo tše re di nyakago. Le e lokišetše moo.”—Luka 22:8-12.

Ga go pelaelo gore mong wa ntlo ke morutiwa wa Jesu. A ka ba a letetše gore Jesu a kgopele go diriša ntlo ya gagwe bakeng sa tiragalo ye. Ge baapostola ba babedi ba fihla Jerusalema, ba hwetša dilo ka moka feela bjalo ka ge Jesu a ba boditše. Ka gona ba swarega ka go lokiša kwana le go dira dithulaganyo tše dingwe bakeng sa dijo tša Paseka tšeo di tla lekanago batho ba 13, e lego Jesu le baapostola ba gagwe ba 12.

Ithute ka mo go oketšegilego

Modimo o Phološa Baisiraele

Modimo ile a diriša Moshe bjang go phološa Baisiraele bokgobeng kua Egipita? Ke ka baka la’ng go be go binwa Paseka?