Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 125

Jesu o Išwa go Annase, ka Morago a Išwa go Kayafa

Jesu o Išwa go Annase, ka Morago a Išwa go Kayafa

MATEO 26:57-68 MAREKA 14:53-65 LUKA 22:54, 63-65 JOHANE 18:13, 14, 19-24

  • JESU O IŠWA GO ANNASE YO E KILEGO YA BA MOPERISITA YO A PHAGAMEGO

  • TSHEKO YEO E SEGO MOLAONG YA SANHEDRINE

Ka ge Jesu a tlemilwe bjalo ka sesenyi, o išwa go Annase, yo e bego e le moperisita yo a phagamego nakong ya ge Jesu a be a makatša barutiši tempeleng e sa le mošemanyana. (Luka 2:42, 47) Ka morago ga moo, ba bangwe ba barwa ba Annase ba ile ba hlankela e le baperisita ba phagamego, gomme mo nakong ye mokgonyana wa gagwe e lego Kayafa o hlankela boemong bjoo.

Ge Jesu a sa le legaeng la Annase, se se nea Kayafa sebaka sa go bokanya lekgotla la Sanhedrine. Lekgotla leo la ditho tše 71 le akaretša moperisita yo a phagamego le ba bangwe bao ba kilego ba ba maemong ao.

Bjale Annase o botšiša Jesu “ka barutiwa ba gagwe le ka thuto ya gagwe.” Jesu o araba ka tsela e bonolo, o re: “Ke boletše le lefase phatlalatša. Ke rutile ka mehla sinagogeng le tempeleng moo Bajuda ka moka ba phuthegelago gona; ga se ka bolela selo ka sephiring. Ke ka baka la’ng o mpotšiša dipotšišo? Botšiša bao ba kwelego seo ke ba boditšego sona.”—Johane 18:19-21.

Mohlankedi yo mongwe yo a bego a eme moo o phasola Jesu sefahlegong gomme o mo kgalema ka gore: “Na yeo ke tsela ye o arabago moperisita yo mogolo ka yona?” Ka ge Jesu a tseba gore ga se a dira phošo, o mo araba a re: “Ge e ba ke boletše se se fošagetšego, hlatsela phošo yeo; eupša ge e ba ke boletše therešo, gona o ntitiela’ng?” (Johane 18:22, 23) Ke moka Annase o rulaganya gore Jesu a išwe go mokgonyana wa gagwe e lego Kayafa.

Ga bjale go bokane ditho ka moka tša lekgotla moka la Sanhedrine—yo a hlankelago e le moperisita yo a phagamego, bagolo setšhabeng le bamangwalo. Ba bokane legaeng la Kayafa. Go seka molato o bjalo bošegong bja Paseka ga go molaong, eupša seo ga se ba thibele go phegelela morero wa bona o mobe kudu.

Ruri ditho tša lekgotla le di na le kgethollo! Ka morago ga gore Jesu a tsoše Latsaro bahung, lekgotla la Sanhedrine le ile la dira phetho ya gore Jesu a bolawe. (Johane 11:47-53) Le gona matšatšing a sego kae pejana baetapele ba bodumedi ba ile ba rera seng sa bona go swara Jesu ka boradia gore ba mmolaye. (Mateo 26:3, 4) Ee, le pele tsheko ya Jesu e ka thoma, o šetše a ahloletšwe lehu!

Go oketša tabeng ya gore ba bokane ka tsela yeo e sego ya molao, baperisita ba bagolo le ba bangwe ba lekgotla la Sanhedrine ba leka go nyaka dihlatse tšeo di tla neago bohlatse bja maaka e le gore ba latofatše Jesu. Ba hwetša dihlatse tše dintši, eupša bohlatse bja tšona ga bo dumelelane. Mafelelong, gwa tla dihlatse tše pedi gomme tša re: “Re kwele a re: ‘Ke tla phušola tempele ye yeo e dirilwego ka diatla gomme ka aga e nngwe yeo e sa dirwago ka diatla.’” (Mareka 14:58) Lega go le bjalo, dihlatse tše le tšona ga di dumelelane.

Kayafa o botšiša Jesu o re: “Na ga o fetole ka selo? Ke eng tše ba go latofatšago ka tšona?” (Mareka 14:60) Jesu o ikhomoletše ge a dutše a latofatšwa ka maaka ke dihlatse tšeo ditaba tša tšona di sa dumelelanego. Ka gona Moperisita yo a Phagamego e lego Kayafa o loga leano le lengwe.

Kayafa o tseba gabotse gore Bajuda ba kgopišwa kudu ke motho le ge e le ofe yo a ipolelago gore ke yena Morwa wa Modimo. Pejana, ge Jesu a be a biditše Modimo gore ke Tatagwe, Bajuda ba be ba nyaka go mmolaya ka gobane ba be ba re o “itekanya le Modimo.” (Johane 5:17, 18; 10:31-39) Ka ge a lemoga seo, bjale Kayafa ka boradia o laela Jesu o re: “Ke go eniša ka Modimo yo a phelago gore o re botše ge e ba o le Kriste Morwa wa Modimo!” (Mateo 26:63) Ke therešo gore Jesu o ile a dumela gore ke yena Morwa wa Modimo. (Johane 3:18; 5:25; 11:4) Ge e ba a sa dire seo gona bjale, go ka bonagala eka o gana gore ke yena Morwa wa Modimo e bile ke Kriste. Ka gona Jesu o re: “Ke nna yena, le tla bona Morwa wa motho a dutše ka letsogong la le letona la Ramatlaohle a etla ka maru a legodimo.”—Mareka 14:62.

Ge se se direga, Kayafa o gagola diaparo tša gagwe ka tsela e tlabago kudu gomme o goeletša ka gore: “O rogile Modimo! Re sa nyakela’ng dihlatse tše dingwe? Bonang! Bjale le kwele thogako. Le di bona bjang?” Lekgotla la Sanhedrine le ntšha kahlolo yeo e sego ya toka gomme le re: “O lebanwe ke lehu.”—Mateo 26:65, 66.

Ka morago ba thoma go kwera Jesu gomme ba mo itia ka difeisi. Ba bangwe ba mo phasola sefahlegong gomme ba mo tshwela ka mare. Ka morago ga ge ba mo khupeditše sefahlego ka moka gomme ba mo phasola, ba mo kodutla ka gore: “Porofeta! Ke mang yo a go otlilego?” (Luka 22:64) Ruri Morwa wa Modimo o gobošwa tshekong ya bošego yeo e sego molaong!