Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 116

O Ruta Thuto ya Boikokobetšo Pasekeng ya Mafelelo

O Ruta Thuto ya Boikokobetšo Pasekeng ya Mafelelo

MATEO 26:20 MAREKA 14:17 LUKA 22:14-18 JOHANE 13:1-17

  • JESU O JA PASEKA YA GAGWE YA MAFELELO LE BAAPOSTOLA

  • O RUTA THUTO KA GO HLAPIŠA BAAPOSTOLA DINAO

Bjalo ka ge Jesu a ba laetše, Petro le Johane ba šetše ba fihlile Jerusalema e le gore ba lokišeletše Paseka. Ka morago Jesu le baapostola ba bangwe ba lesome ba leba moo. Ke thapama gomme letšatši le sobela ka bodikela ge Jesu le barutiwa ba gagwe ba theoga Thabeng ya Mehlware. Ke la mafelelo Jesu a bona motse wo mosegare a le moo go fihlela ka morago ga ge a tsošitšwe bahung.

Go se go ye kae Jesu le barutiwa ba gagwe ba fihla motseng gomme ba ya legaeng leo ba tlago go jela dijo tša Paseka go lona. Ba namelela phapošing e kgolo ya ka godimo. Ge ba fihla moo ba hwetša go dirilwe ditokišetšo ka moka bakeng sa dijo tša bona ba nnoši. Jesu o be a dutše a fagahletše tiragalo ye, ka gobane o re: “Ke kganyogile kudu go ja Paseka ye le lena pele ke tlaišega.”—Luka 22:15.

Nywageng e mentši pejana, go ile gwa thongwa mokgwa wa go fetiša dinwelo tše mmalwa tša beine gare ga bao ba tšeago karolo Pasekeng. Bjale, ka morago ga go amogela se sengwe sa dinwelo tšeo, Jesu o a leboga gomme a re: “Se tšeeng le se šielane, gobane ke le botša gore: Go tloga bjale go ya pele nka se nwe gape setšweletšwa sa morara go fihlela Mmušo wa Modimo o fihla.” (Luka 22:17, 18) Go molaleng gore o kgauswi le go hwa.

Ka nako e itšego dijong tša Paseka, go direga selo seo se sa tlwaelegago. Jesu o a emelela, a beela ka thoko diaparo tša gagwe tša ka ntle gomme a topa lešela. Ke moka a tšhela meetse ka sebjaneng seo se lego kgauswi. Ka tlwaelo, yo a amogelago baeng o tla hlapiša dinao tša baeng ba gagwe, mohlomongwe ba hlapišwa ke mohlanka. (Luka 7:44) Eupša tiragalong ye ga se ba amogelwa ke motho, ka gona Jesu o dira tiro ye. Moapostola le ge e le ofe a ka be a ile a tšea sebaka sa go dira seo, eupša ga go le o tee yo a dirago bjalo. Na lebaka e ka ba e le gore ba sa phenkgišana? Go sa šetšwe gore lebaka ke lefe, ba hlabja ke dihlong tša gore Jesu o ba hlapiša dinao.

Ge Jesu a fihla go Petro, o a gana o re: “Ruri o ka se ntlhapiše dinao.” Jesu o araba ka gore: “Ka ntle le gore ke go hlapiše, ga o na kabelo le nna.” Petro o araba ka mafolofolo o re: “Morena, a e se be dinao feela, eupša e be le diatla le hlogo.” Ka gona o swanetše go ba a makatšwa kudu ke karabo ya Jesu ge a re: “Yo a hlapilego ga go nyakege gore a hlapišwe mo gongwe ge e se dinao tša gagwe, eupša o hlwekile gohle. Lena le hlwekile, eupša e sego ka moka ga lena.”—Johane 13:8-10.

Jesu o hlapiša dinao tša ba 12 ka moka, go akaretša le dinao tša Judase Isikariote. Ka morago ga gore Jesu a apare diaparo tša gagwe tša ka ntle gomme a boetše a dutše tafoleng, o re: “Na le kwešiša seo ke se dirilego go lena? Le mpitša ‘Morutiši,’ le ‘Morena,’ gomme le a rereša gobane ke yena. Ka gona ge e ba nna gaešita le ge ke le Morena le Morutiši ke le hlapišitše dinao, le lena le swanetše go hlapišana dinao. Gobane ke le beetše mohlala gore go etša ge ke dirile go lena, le lena le dire bjalo. Ruriruri ke re go lena: Mohlanka ga a fete mong wa gagwe, le gona yo a romilwego ga a fete yo a mo romilego. Ge e ba le tseba dilo tše, le a thaba ge e ba le di dira.”—Johane 13:12-17.

A thuto e botse gakaakang ya mabapi le tirelo ya boikokobetšo! Balatedi ba Jesu ga se ba swanela go tsoma dibaka tša pele, e le ge ba nagana gore ba bohlokwa le gore ba swanetše go hlankelwa. Go e na le moo, ba swanetše go latela mohlala wa Jesu, e sego ka go fo hlapiša ba bangwe dinao go ya ka tlwaelo, eupša ka go ba bao ba ikemišeditšego go hlankela ba bangwe ka boikokobetšo le gona ba sa bebe sefahlego.

Ithute ka mo go oketšegilego

Petro o Ithutile ka Tebalelo go Mong wa Gagwe

Ke’ng seo Jesu a se rutilego Petro ka tebalelo? Jesu o ile a bontšha bjang gore o lebaletše Petro?