Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 103

Tempele e Hlwekišwa Gape

Tempele e Hlwekišwa Gape

MATEO 21:12, 13, 18, 19 MAREKA 11:12-18 LUKA 19:45-48 JOHANE 12:20-27

  • JESU O ROGAKA MOGO LE GO HLWEKIŠA TEMPELE

  • JESU O SWANETŠE GO HWA E LE GORE A NEE BA BANTŠI BOPHELO

Jesu le barutiwa ba gagwe ba feditše mašego a mararo Bethania ga e sa le go tloga mola ba fihlago ba etšwa Jeriko. Bjale, ka masa a Mošupologo, Nisani 10, ba lebile Jerusalema. Jesu o swerwe ke tlala. Ka gona ge a bona mogo, o ya go wona. Na o na le mago?

Bjale ke mafelelong a March, eupša sehla sa mago se ka June. Lega go le bjalo, o na le matlakala ka ge a hlogile ka pela. Ka go re’alo, Jesu o nagana gore go ka ba go na le mago a pele. Lega go le bjalo, o hwetša gore ga a gona. Matlakala a a dirile gore ponagalo ya sehlare se e fore batho. Ke moka Jesu o re: “A go se be le motho yo a jago seenywa sa gago le ka mohla.” (Mareka 11:14) Gateetee sehlare sa thoma go omelela, gomme tlhaloso ya seo e tla ithutwa mesong e latelago.

Go se go ye kae, Jesu le barutiwa ba gagwe ba fihla Jerusalema. Jesu o ya tempeleng yeo a ilego a e hlahloba thapameng e fetilego. Lehono ga a fo e hlahloba feela; o dira se se swanago le seo a kilego a se dira nywageng e meraro pejana ka Paseka ya 30 C.E. (Johane 2:14-16) Nakong ye Jesu o raka “bao ba bego ba rekiša le go reka ka tempeleng.” Gape o menola “ditafola tša baananyi ba tšhelete le dipanka tša bao ba rekišago maeba.” (Mareka 11:15) Ga a dumelele motho le ge e le mang a kgaoletša ka go phatša lapeng la tempele ge a iša dilo karolong e nngwe ya motse.

Ke ka baka la’ng Jesu a dira phetho e bjalo kgahlanong le baananyi ba tšhelete le bao ba rekišago diphoofolo ka tempeleng? O re: “Na ga go a ngwalwa gwa thwe: ‘Ntlo ya ka e tla bitšwa ntlo ya thapelo ya ditšhaba ka moka’? Eupša lena le e dirile lewa la bahlakodi.” (Mareka 11:17) Lebaka la gagwe la go bitša banna ba bahlakodi ke gore ba nyaka ditefo tše di fetago tekanyo go bao ba swanetšego go reka diphoofolo tšeo di nyakegago bakeng sa go dira dihlabelo. Jesu o lebelela kgwebo ya bona e le go amoga batho dilo, goba bohlakodi.

Ke therešo gore baperisita ba bagolo, bamangwalo le ba bagolo setšhabeng ba kwa ka seo Jesu a se dirilego, gomme ba leka gape go mmolaya. Lega go le bjalo, ba lebeletšane le bothata. Ga ba tsebe gore ba ka bolaya Jesu bjang ka gobane batho ba kgeregela go yena gore ba yo mo theetša.

Pasekeng ga se gwa tla feela Bajuda ba tlhago eupša go tlile le bao ba sokologetšego bodumeding bja Sejuda. Gare ga bona go na le Bagerika bao ba tlilego go rapela monyanyeng wo. Bona ba ba tla go Filipi, mohlomongwe ba tantšwe ke leina la gagwe la Segerika, gomme ba kgopela go bona Jesu. Filipi a ka ba a sa kgodišege ge e ba ba dumeletšwe go ka mmona, ka gona o ahlaahla taba ye le Andrea. Bobedi bja bona ba iša taba ye go Jesu, yo go bonagalago a sa dutše a le tempeleng.

Jesu o tseba gore o swanetše go hwa matšatšing a sego kae ao a tlago, ka gona ye ga se nako ya gore a kgotsofatše kganyogo ya batho ya go nyaka go tseba goba go ikhweletša botumo. O araba baapostola ba babedi ka go ba botša seswantšho, a re: “Nako ya gore Morwa wa motho a tagafatšwe e fihlile. Ruriruri ke re go lena: Ntle le gore thoro ya korong e wele mmung gomme e hwe, e dula e le thoro e tee feela; eupša ge e ba e ehwa, gona e enywa dienywa tše dintši kudu.”—Johane 12:23, 24.

Thoro e tee ya korong e ka bonagala e se na mohola. Lega go le bjalo, ge e ba e ka bjalwa mmung gomme ya ‘hwa’ e le peu, e ka mela gomme ge nako e dutše e eya ya gola ya ba lehlaka le le enywago la go ba le dithoro tše dintši. Ka mo go swanago, Jesu ke motho o tee yo a phethagetšego. Lega go le bjalo, ka go botegela ga gagwe Modimo go fihlela lehung, o tla nea ba bantši bao ba nago le moya o swanago wa boikgafo bophelo bjo bo sa felego. Ka go re’alo, Jesu o re: “Yo a ratago moya wa gagwe o a o bolaya, eupša yo a hloyago moya wa gagwe lefaseng le, o tla o šireletša bakeng sa bophelo bjo bo sa felego.”—Johane 12:25.

Jesu ga a nagane ka yena feela, ka gobane o re: “Ge e ba motho a rata go ntirela, anke a ntatele, gomme moo ke lego gona, modiredi wa ka le yena o tla ba gona. Ge e ba motho a rata go ntirela, Tate o tla mo godiša.” (Johane 12:26) A moputso o mobotse gakaakang! Bao ba godišwago ke Tate ba tla ba badirišanigotee le Kriste Mmušong.

Jesu a naganne ka tlaišego e kgolo le lehu le bohloko tšeo di tla mo welago, o re: “Bjale moya wa ka o tshwenyegile gomme ke tla re’ng? Tate, mphološe nakong ye.” Eupša Jesu ga a nyake go efoga go phethagatša thato ya Modimo. O oketša ka gore: “Lega go le bjalo, ke ka baka leo ke tlilego nakong ye.” (Johane 12:27) Jesu o dumelelana le sohle seo Modimo a se rerilego, go akaretša le lehu la gagwe la sehlabelo.