Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 111

Baapostola ba Kgopela Pontšho

Baapostola ba Kgopela Pontšho

MATEO 24:3-51 MAREKA 13:3-37 LUKA 21:7-38

  • BARUTIWA BA BANE BA KGOPELA PONTŠHO

  • PHETHAGALO YA DIPOROFETO LEKGOLONG LA PELE LA NYWAGA LE KA MORAGO GA MOO

  • RE SWANETŠE GO DULA RE PHAKGAME

Ke Labobedi thapama gomme Nisani 11 e kgauswi le go fela. Le matšatši a Jesu a go swarega kudu modirong mo lefaseng a a fela. Mosegare o be a ruta tempeleng gomme mantšiboa a dula ka ntle ga motse. Batho ba be ba dutše ba kgahlegela kudu modiro wa gagwe, e lego bao ba bego “ba etla go yena e sa le mesong ka tempeleng gore ba mo kwe.” (Luka 21:37, 38) Bjale seo se fetile, gomme Jesu o dutše Thabeng ya Mehlware a na le baapostola ba gagwe ba bane e lego Petro, Andrea, Jakobo le Johane.

Baapostola ba ba bane ba tlile go yena ka thopeng. Ba tshwenyegile ka tempele ka gobane Jesu o sa tšwa go porofeta gore ga go leswika le le tlago go tlogelwa godimo ga leswika le lengwe. Lega go le bjalo, ba nagana ka dilo tše dintši kudu. Pejana Jesu o be a ile a ba kgothaletša ka gore: “Le duleng le itokišitše, gobane Morwa wa motho o tla ka nako yeo le sa naganego gore e ka ba yona.” (Luka 12:40) O be a bile a boletše ka ‘letšatši la ge Morwa wa motho a utollwa.’ (Luka 17:30) Na ditlhaloso tšeo di tswalana ka tsela e itšego le seo a sa tšwago go se bolela ka tempele? Baapostola ba tloga ba nyaka go tseba. Ba re: “Re botše gore dilo tše di tla direga neng, le gona pontšho ya go ba gona ga gago le ya bofelo bja tshepedišo ya dilo e tla ba eng?”—Mateo 24:3.

Ba ka ba ba naganne ka bofelo bja tempele yona yeo ye ba e bonago yeo e sego kgole. Le gona, ba botšiša ka go ba gona ga Morwa wa motho. Ba ka ba ba gopola gore Jesu o boletše seswantšho sa mabapi le “motho yo mongwe wa go tswalelwa bogošing” yo a ‘ilego a yo tšea matla a bogoši gomme a boa.’ (Luka 19:11, 12) Sa mafelelo seo ba ipotšišago sona ke gore “bofelo bja tshepedišo ya dilo” bo tla akaretša eng.

Ge Jesu a ba araba ka mo go nabilego, o nea pontšho yeo e hlaolago nako yeo ka yona tshepedišo ya nakong yeo ya Sejuda, go akaretša le tempele ya yona, e tlago go fela ka yona. Eupša o hlalosa mo go oketšegilego. Pontšho ye e tla thuša Bakriste ba nakong e tlago go tseba gore ke neng ba tla bego ba phela mehleng ya “go ba gona” ga gagwe le go yela bofelong bja tshepedišo ka moka ya dilo mo lefaseng.

Ge nywaga e dutše e feta, baapostola ba bona boporofeta bja Jesu bo phethagala. Ee, dilo tše dintši tšeo a di boletšego e sa le pele di thoma go direga mehleng ya bona. Ka go re’alo, Bakriste bao ba phakgamego ba ba phelago nywageng e 37 ka morago, e lego ka 70 C.E., ba dula ba itokišeditše tshenyego yeo e batamelago ya tshepedišo ya Sejuda le tempele ya yona. Lega go le bjalo, ga se dilo ka moka tšeo Jesu a di bolelago e sa le pele tšeo di diregago nakong yeo e lebišago go 70 C.E. le yeo e e akaretšago. Lega go le bjalo, ke’ng se sengwe seo se tla swayago go ba gona ga gagwe matleng a Mmušo? Jesu o utollela baapostola karabo.

Jesu o bolela e sa le pele gore go tla ba le “dintwa le dipego tša dintwa” le gore “setšhaba se tla tsogela setšhaba gomme mmušo wa tsogela mmušo.” (Mateo 24:6, 7) E bile o re “go tla ba le ditšhišinyego tše dikgolo tša lefase, go be le leuba la malwetši le tlhaelelo ya dijo lefelong le lengwe ka morago ga le lengwe.” (Luka 21:11) Jesu o lemoša barutiwa ba gagwe o re: “Batho ba tla le swara ba le tlaiše.” (Luka 21:12) Go tla tsoga baporofeta ba maaka gomme ba tla aroša ba bantši. Go hloka molao go tla oketšega, gomme lerato la ba bantši le tla fola. Go oketša moo, o bolela gore “ditaba . . . tše dibotse tša Mmušo di tla bolelwa lefaseng ka  moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

Gaešita le ge boporofeta bja Jesu bo phethagala ka ditsela tše itšego pele le nakong ya go senywa ga Jerusalema ke Baroma, na Jesu a ka ba a akaretša phethagalo ya ka morago e kgolwanyana? Na wena o bona bohlatse bja gore boporofeta bjo bohlokwa bja Jesu bo be bo dutše bo phethagala ka tekanyo e kgolo mehleng yeno?

Selo se sengwe seo Jesu a se akaretšago pontšhong ya go ba gona ga gagwe ke go tšwelela ga “makgapha a bakago tšhwalalanyo.” (Mateo 24:15) Ka 66 C.E., makgapha a a tšwelela e le “madira a hlomilego ditente” a Roma, a swere difolaga tša ona tša medimo ya diswantšho, goba difoka. Baroma ba dikologa Jerusalema gomme ba epa ka tlase ga e mengwe ya merako ya yona. (Luka 21:20) Ka go re’alo, “makgapha” a eme moo a sa swanelago go ema gona, moo Bajuda ba go tšeago e le “lefelong le lekgethwa.”

Jesu o bolela gape e sa le pele, o re: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” Ka 70 C.E., Baroma ba senya Jerusalema. Lesolo leo la go senya ‘motse o mokgethwa’ wa Bajuda, go akaretša le tempele ya wona, e ba masetlapelo a magolo ao go ona go bolawago batho ba dikete. (Mateo 4:5; 24:21) Tshenyo yeo e feta kgole tshenyo le ge e le efe yeo e kilego ya wela motse le Bajuda, gomme e fediša tshepedišo e rulagantšwego ya borapedi yeo Bajuda ba bego ba e latela ka nywaga e makgolo a mantši. Ka gona, phethagalo e kgolwanyane ya mantšu a Jesu yeo e tla diregago le ge e le neng ka morago, ruri e tla ba e tšhošago kudu.

GO BA LE KGODIŠEGO MATŠATŠING AO A BOLETŠWEGO E SA LE PELE

Poledišano ya Jesu le baapostola ba gagwe mabapi le pontšho ya go ba gona ga gagwe matleng a Mmušo le ya bofelo bja tshepedišo ya dilo e kgole le go fela. Bjale o ba botša mabapi le go kitimiša “bo-Kriste ba maaka le baporofeta ba maaka.” O re go tla dirwa maiteko a gore “ge e ba go kgonega, ba timetše le bona bakgethwa.” (Mateo 24:24) Eupša bakgethwa ba ba ka se timetšwe. Bo-Kriste ba maaka ba kgona feela go iponagatša. Ka mo go fapanego, go ba gona ga Jesu e tla ba mo go sa bonagalego.

Ge Jesu a bolela ka masetlapelo a magolo ao a tlago go ba gona bofelong bja tshepedišo ya gona bjale ya dilo, o re: “Letšatši le tla swifala, kgwedi ya se ntšhe seetša sa yona, dinaledi tša wa legodimong gomme matla a magodimo a šišinyega.” (Mateo 24:29) Ge baapostola ba ekwa mantšu ao a tšhošago ga ba tsebe gore gabotse go tlo direga eng, eupša ga go pelaelo gore e tla ba selo se tšhošago.

Ditiragalo tše tše di tšhošago di tla kgoma batho bjang? Jesu o re: “Batho ba [tla] idibala ka baka la poifo le go letela dilo tše di tlelago lefase le, gobane matla a magodimo a tla šišinyega.” (Luka 21:26) Ruri Jesu o hlalosa seo e tlago go ba nako e tšhošago kudu historing ya batho.

Se se kgothatšago ke gore Jesu o hlalosetša baapostola gabotse gore ga se bohle bao ba tla bego ba lla ge “Morwa wa motho a etla ka . . . matla le letago le legolo.” (Mateo 24:30) O be a šetše a bontšhitše gore Modimo o be a tla tsena ditaba gare “ka baka la bakgethwa.” (Mateo 24:22) Ka gona barutiwa bao ba botegago ba swanetše go itshwara bjang mabapi le ditiragalo tšeo tše di tšhošago tšeo Jesu a di hlalosago? Jesu o kgothatša balatedi ba gagwe o re: “Ge dilo tše di thoma go direga, gona le inamologe le emišetše dihlogo tša lena godimo, gobane topollo ya lena e a batamela.”—Luka 21:28.

Lega go le bjalo, barutiwa ba Jesu bao ba bego ba tla be ba phela nakong yeo go boletšwego e sa le pele ka yona ba be ba tla lemoga bjang gore bofelo bo kgauswi? Jesu o bolela seswantšho sa mabapi le mogo, o re: “Gateetee feela ge lekalana la wona e eba le lenanana gomme le hloga matlakala, le tseba gore selemo se batametše. Ka mo go swanago, ge le bona dilo tše ka moka, le tsebe gore Morwa wa motho o kgauswi mejakong. Ruri ke le botša gore moloko wo o ka se fete le ka mohla go fihla ge dilo tše ka moka di direga.”—Mateo 24:32-34.

 Ka gona, ge barutiwa ba gagwe ba bona dibopego tše dintši tša pontšho di phethagala, ba swanetše go lemoga gore bofelo bo kgauswi. Ge Jesu a lemoša barutiwa bao ba tla bego ba phela nakong yeo e bohlokwa, o re:

“Ge e le mabapi le letšatši leo le iri, ga go na yo a tsebago, gaešita le barongwa ba magodimo le ge e le Morwa ga ba tsebe, eupša ke Tate feela yo a tsebago. Gobane go etša feela kamoo mehla ya Noa e bego e le ka gona, le go ba gona ga Morwa wa motho go tla ba bjalo. Gobane go etša ge ba be ba le bjalo mehleng yeo ya pele ga Meetsefula, ba eja ba enwa, banna ba nyala le basadi ba nyalwa, go fihla letšatšing leo Noa a tsenego ka lona arekeng, ba se ele hloko go fihla Meetsefula a etla a ba gogola ka moka, le go ba gona ga Morwa wa motho go tla ba bjalo.” (Mateo 24:36-39) Tiragalo yeo Jesu a bapišago ka yona—Meetsefula a mehleng ya Noa—e ile ya kgoma lefase ka moka.

Ga go pelaelo gore baapostola bao ba theeditšego Jesu Thabeng ya Mehlware ba swanetše go ba ba lemoga go nyakega ga gore ba dule ba phakgame. Jesu o re: “Itlhokomeleng gore dipelo tša lena di se ke tša imelwa ke bojagobe, go nwa kudu le dipelaelo tša bophelo gomme ka tšhoganyetšo letšatši leo la le wela ka bjako go etša molaba. Gobane le tla tlela bohle bao ba dulago lefaseng. Ka gona, dulang le phakgame ka dinako tšohle le lopa gore le atlege ka go phonyokga dilo tše ka moka tše di reretšwego go direga, le go ema pele ga Morwa wa motho.”—Luka 21:34-36.

Le mo Jesu o bontšha gore seo a se bolelago e sa le pele se tla direga ka tekanyo e kgolo. Ga a porofete ka ditiragalo tšeo di bego di tla direga ka nywaga e masome a sego kae le tšeo di bego di tla kgoma feela motse wa Jerusalema goba setšhaba sa Bajuda. Go e na le moo, o bolela ka ditiragalo tšeo di “tla [tlelago] bohle bao ba dulago lefaseng.”

O bolela gore barutiwa ba gagwe ba tla swanelwa ke gore ba dule ba phakgame e bile ba itokišitše. Jesu o gatelela temošo ye ka go bolela seswantšho se sengwe, o re: “Se le swanetšego go se tseba se se: Ge e ba mong wa ntlo a ka be a tsebile nako yeo lehodu le bego le tla tla ka yona, o be a tla dula a phakgame a se dumelele gore ntlo ya gagwe e thubje. Ka baka leo le lena le itlhatsele le le ba itokišitšego, gobane Morwa wa motho o tla ka nako yeo le sa e naganego.”—Mateo 24:43, 44.

Jesu o tšwela pele go nea barutiwa ba gagwe lebaka la gore ba be le kholofelo. O ba kgonthišetša gore ge boporofeta bja gagwe bo phethagala, go tla be go na le “mohlanka” yo a phakgamego le yo a šomago. Jesu o diriša boemo bjoo baapostola ba gagwe ba kgonago go bo nagana kapejana, o re: “Ke mang yo ruri e lego mohlanka yo a botegago le wa temogo, yo Mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego? Go thaba mohlanka yoo ge e ba Mong wa gagwe a fihla a mo hwetša a dira bjalo. Ruri ke re go lena: O tla mmea gore a hlokomele dilo tša gagwe ka moka.” Lega go le bjalo, ge e ba “mohlanka” yoo a ka thoma go ba le kgopolo e mpe gomme a swara ba bangwe gampe, mong wa gagwe o tla “mo otla o šoro kudu.”—Mateo 24:45-51; bapiša le Luka 12:45, 46.

Lega go le bjalo, Jesu ga a bolele gore sehlopha sa balatedi ba gagwe se tla thoma go ba le kgopolo e mpe. Ka gona, Jesu o nyaka go gatelela thuto efe go barutiwa ba gagwe? O nyaka gore ba dule ba phakgame e bile ba šoma, ka ge a hlalosa se gabotse ka go bolela seswantšho se sengwe gape.

Ithute ka mo go Oketšegilego

MOROKAMI—KGATIŠO E ITHUTWAGO

“Re Botše Gore Dilo tše di tla Direga Neng?”

Ke kwešišo efe ya rena yeo e lokišitšwego ka nako ya go phethagala ga ditiragalo tšeo di lego go boporofeta bja Jesu go Mateo kgaolo 24 le 25?

Ke Eng Seo ge e le Gabotse Beibele e se Rutago?

Na re Phela “Mehleng ya Bofelo”?

Ela hloko kamoo ditiro le boitshwaro bja batho bjo bo re dikologilego bo hlatselago gore ga bjale re phela “mehleng ya bofelo” yeo Beibele e boletšego ka yona e sa le pele.

BEIBELE—E NA LE MOLAETŠA OFE?

Jesu o Porofeta ka Ditiragalo Tšeo di Tlago go Kgoma Lefase ka Moka

Pontšho yeo Jesu a e neilego baapostola ba gagwe e bolela’ng?