Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 137

Batho ba Makgolo ba Mmona Pele ga Pentekoste

Batho ba Makgolo ba Mmona Pele ga Pentekoste

MATEO 28:16-20 LUKA 24:50-52 DITIRO 1:1-12; 2:1-4

  • JESU O IPONAGATŠA GO BA BANTŠI

  • O ROTOGELA LEGODIMONG

  • JESU O TŠHOLLELA MOYA O MOKGETHWA GODIMO GA BARUTIWA BA 120

Ka morago ga ge Jesu a tsošitšwe bahung, o rulaganya gore barutiwa ba gagwe ba 11 ba kopane le yena thabeng yeo e lego Galilea. Barutiwa ba bangwe le bona ba gona moo, mo e ka bago ba 500 ba bona, bao ba bangwe ba bona ba thomilego ba belaela. (Mateo 28:17; 1 Bakorinthe 15:6) Eupša bjale seo Jesu a se bolelago se thuša go kgodiša yo mongwe le yo mongwe wa bona gore ruri yena Jesu o a phela.

Jesu o hlalosa gore Modimo o mo neile matla ka moka legodimong le lefaseng. Jesu o ba kgothaletša ka gore: “Ka gona, eyang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.” (Mateo 28:18-20) Ee, ga se feela gore Jesu o a phela eupša o sa dutše a nyaka ditaba tše dibotse di bolelwa.

Balatedi ka moka ba Jesu—banna, basadi le bana—ba amogela thomo yona ye ya go dira barutiwa. Baganetši ba ka leka go ba thibela go bolela le go ruta, fela Jesu o ba kgonthišetša ka gore: “Ke neilwe matla ka moka legodimong le lefaseng.” Seo se bolela’ng go balatedi ba gagwe? O ba botša a re: “Tsebang gore ke na le lena matšatši ka moka go fihla bofelong bja tshepedišo ya dilo.” Jesu ga a bolele gore bohle bao ba bolelago ditaba tše dibotse ba tla kgona go dira mehlolo. Lega go le bjalo, ba tla thekgwa ke moya o mokgethwa.

Jesu o iponagatša go barutiwa ba gagwe “matšatši ka moka a masomenne” ka morago ga gore a tsošwe bahung. O ikapeša mebele e fapafapanego ya nama gomme a iponagatša “go bona a phela ka bohlatse bjo bontši bjo bo kgodišago,” a ba laela “mabapi le mmušo wa Modimo.”—Ditiro 1:3; 1 Bakorinthe 15:7.

Go bonagala ge baapostola ba sa le Galilea, Jesu a ba laela gore ba boele Jerusalema. Ge a kopana le bona motseng o re: “Le se ke la tloga Jerusalema eupša dulang le letetše seo Tate a se holofeditšego, seo le se kwelego go nna; gobane ruri Johane o kolobeditše ka meetse eupša lena le tla kolobetšwa ka moya o mokgethwa matšatši a sego kae ka morago ga se.”—Ditiro 1:4, 5.

Ka morago Jesu o kopana gape le baapostola ba gagwe. O ba eta pele “go fihla Bethania,” yeo e lego thitong ya ka bohlabela ya Thaba ya Mehlware. (Luka 24:50) Go sa šetšwe dilo ka moka tšeo Jesu a ba boditšego tšona mabapi le go tloga ga gagwe, ba sa dumela gore ka tsela e itšego Mmušo wa gagwe o tla ba lefaseng.—Luka 22:16, 18, 30; Johane 14:2, 3.

Baapostola ba botšiša Jesu ba re: “Morena, na o tsošološa mmušo wa Isiraele mo nakong ye?” O ba araba ka tsela e bonolo o re: “Ga se taba ya lena go tseba dinako goba mehla yeo Tate a e laolago.” Ke moka, a gatelela gape modiro woo ba swanetšego go o dira, o re: “Le tla amogela matla ge moya o mokgethwa o fihla godimo ga lena gomme le tla ba dihlatse tša ka Jerusalema, Judea ka moka le Samaria le go fihla karolong ya kgole ya lefase.”—Ditiro 1:6-8.

Baapostola ba na le Jesu yo a tsošitšwego bahung Thabeng ya Mehlware ge a thoma go rotogela legodimong. Go se go ye kae o širwa ke leru ba se sa mmona. Ka morago ga ge a tsošitšwe bahung, Jesu o be a ile a ikapeša mebele ya nama. Eupša bjale Jesu o apola mmele woo a o dirišitšego lebakeng le, gomme o rotogela legodimong e le sebopiwa sa moya. (1 Bakorinthe 15:44, 50; 1 Petro 3:18) Ge baapostola ba botegago ba sa dutše ba mo lebeletše, “banna ba babedi bao ba aperego diaparo tše tšhweu” ba tšwelela kgauswi le bona. Ba ke barongwa bao ba ikapešitšego mebele ya nama, bao ba botšišago gore: “Banna ba Galilea, le re’ng le eme le lebeletše godimo? Jesu yo yo a tšerwego go lena a išwa godimo o tla tla ka mokgwa o swanago le woo le mmonego a rotogela godimo ka wona.”—Ditiro 1:10, 11.

Jesu o tlogile lefaseng ntle le go bonwa ke batho bohle; o bonwe ke baapostola ba gagwe ba botegago feela. O tla boa “ka mokgwa o swanago”—ntle le go bonwa ke batho bohle, e le feela balatedi ba gagwe ba botegago bao ba lemogago go ba gona gagwe a le matleng a Mmušo.

Baapostola ba boela Jerusalema. Matšatšing ao a latelago, ba bokana le barutiwa ba bangwe, go akaretša le “Maria mmago Jesu le bana babo.” (Ditiro 1:14) Sehlopha se se phegelela thapelong. Taba e nngwe yeo e rapelelwago ke ya go kgetha morutiwa yo a tlago go tšeela Judase Isikariote legato gomme ka go re’alo palo ya baapostola e boele go ba 12. (Mateo 19:28) Ba nyaka morutiwa yo a ilego a bona mediro ya Jesu le go tsošwa ga gagwe bahung. La mafelelo ge go bolelwa ka matengwa ka Beibeleng, ke ge a lahlelwa bakeng sa gore go lemogwe gore thato ya Modimo ke efe. (Psalme 109:8; Diema 16:33) Mathiase, yo a ka bago e be e le yo mongwe wa ba 70 ba bao Jesu a ba romilego, o a kgethwa gomme o “balwa gotee le baapostola ba lesometee.”—Ditiro 1:26.

Matšatši a lesome ka morago ga ge Jesu a rotogetše legodimong, Monyanya wa Sejuda wa Pentekoste ya 33 C.E. o a ketekwa. Mo e ka bago barutiwa ba 120 ba bokane phapošing ya ka godimo Jerusalema. Gateetee, lešata le bjalo ka ledimo le matla la tlala ntlo ka moka. Ba bona dikgabo tša mollo tše e kego ke maleme, e tee e dula godimo ga yo mongwe le mongwe yoo a lego moo. Barutiwa ka moka ba thoma go bolela ka maleme a fapafapanego. Se ke go tšhollwa ga moya o mokgethwa woo Jesu a bego a o holofeditše!—Johane 14:26.