Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 132

“Ka Kgonthe yo e be e le Morwa wa Modimo”

“Ka Kgonthe yo e be e le Morwa wa Modimo”

MATEO 27:45-56 MAREKA 15:33-41 LUKA 23:44-49 JOHANE 19:25-30

  • JESU O HWELA KOTENG

  • GO DIREGA DITIRAGALO TŠE DI SA TLWAELEGAGO GE JESU A EHWA

Bjale ke “iri ya botshelela,” goba thapama. Leswiswi le le sa tlwaelegago le “aparela naga ka moka go ba go fihla ka iri ya senyane,” e lego iri ya boraro thapama. (Mareka 15:33) Leswiswi le leo le boifišago ga se la bakwa ke go swifala ga letšatši. Seo se direga ge kgwedi e mpsha e dula, eupša bjale ke sehla sa Paseka, nakong ya ge kgwedi e tletše. Le gona leswiswi le le tšea nako e telele go feta metsotso e sego kae ya go swifala ga letšatši. Ka gona Modimo ke yena a bakilego leswiswi le!

Nagana kamoo se se kgomago bao ba kwerago Jesu. Nakong ya ge go swifetše, basadi ba bane ba tla koteng ya tlhokofatšo. Bona ke mmago Jesu, Salome, Maria Magdalena le Maria mmago moapostola Jakobo yo Monyenyane.

Moapostola Johane o na le mmago Jesu yo a llago ‘hleng ga kota ya tlhokofatšo.’ Maria o bogetše morwa wa gagwe yo a mmelegego le yo a mo hlokometšego ge a le gare a lekeletše koteng a ekwa bohloko. Go yena, go bjalo ka ge eka o hlabja ke “tšhoša e telele.” (Johane 19:25; Luka 2:35) Lega go le bjalo, go sa šetšwe gore Jesu o kwa bohloko kudu, o nagana ka go hlokomelwa ga mmagwe. O leka go dumela ka hlogo a lebeletše Johane gomme o botša mmagwe o re: “Wena mosadi, bona morwa wa gago!” Ke moka, e le ge a dumela ka hlogo a lebeletše Maria, o botša Johane o re: “Bona mmago!”—Johane 19:26, 27.

Jesu o laela moapostola wa gagwe yo a mo ratago kudu gore e be yena a hlokomelago mmagwe yo go bonagalago e le mohlologadi. Jesu o tseba gore bana babo ka motswadi o tee, e lego barwa ba Maria, ga se ba hlwa ba dumela go yena. Ka gona o dira ditokišetšo tša gore mmagwe a hlokomelwe mmeleng le gore a hlokomelwe ka dilo tša moya. Ruri o bea mohlala o mobotse kudu!

Ge leswiswi le yela go fela, Jesu o re: “Ke nyorilwe.” Ge a re’alo o phethagatša mangwalo. (Johane 19:28; Psalme 22:15) Go ka thwe Jesu o a lemoga gore Tatagwe ga a sa mo šireleditše e le gore potego ya Morwa wa gagwe e lekwe ka botlalo. Kriste o goeletša ka Searama seo mohlomongwe e lego mmolelo wa Galilea, o re: “Eli, Eli, lama sabakthani?” yeo e bolelago gore: “Modimo wa ka, Modimo wa ka, o ntlogeletše’ng?” Ba bangwe bao ba emego kgauswi ga ba mo kwe gabotse gomme ba re: “Ekwang! O bitša Eliya.” Yo mongwe wa bona o a kitima, a hlomela sepontšhe seo se innwego ka beineng ya bodila lehlakeng, gomme a e nweša Jesu. Eupša ba bangwe ba re: “Mo tlogeleng! A re boneng ge e ba Eliya a tla tla a mo theoša.”—Mareka 15:34-36.

Ke moka Jesu o a goeletša o re: “Go phethegile!” (Johane 19:30) Ee, o phethile tšohle tšeo Tatagwe a bego a mo rometše go tlo di dira lefaseng. Mafelelong, Jesu o re: “Tate, ke gafela moya wa ka diatleng tša gago.” (Luka 23:46) Ka gona Jesu o gafela Jehofa bophelo bja gagwe, a kgodišegile gore Modimo o tla mmušetša bjona. E le ge Kriste a botile Modimo ka mo go feletšego, o inamiša hlogo ke moka a hwa.

Ge seo se direga, go ba le tšhišinyego e kgolo kudu ya lefase yeo e phatlolago maswika. Ke e matla kudu moo e lego gore mabitla ao a lego ka ntle ga Jerusalema a a bulega gomme ditopo tšeo di lego ka go ona di tšwela ka ntle. Bafeti ka tsela bao ba bonago ditopo di le ka ntle ba tsena “motseng o mokgethwa” gomme ba bega seo ba sa tšwago go se bona.—Mateo 12:11; 27:51-53.

Ge Jesu a ehwa, seširo se setelele se boima seo se aroganyago Lefelo le Lekgethwa le Sekgethwakgethwa ka tempeleng se a gagoga sa tšwa diripa tše pedi, go tloga godimo go ya fase. Tiragalo ye e makatšago e bonagatša kgalefo ya Modimo go bao ba bolailego Morwa wa gagwe gomme e bontšha gore bjale go a kgonega go tsena ka Sekgethwakgethweng, e lego legodimo ka bolona.—Baheberu 9:2, 3; 10:19, 20.

Go a kwagala ge batho ba tšhoga kudu. Molaodi wa madira yo a bego a mo hlokometše ge a bolawa o re: “Ka kgonthe motho yo e be e le Morwa wa Modimo.” (Mareka 15:39) A ka ba a be a le gona ge Jesu a be a sekišwa ke Pilato nakong ya ge go be go ahlaahlwa taba ya ge e ba Jesu e le Morwa wa Modimo goba go se bjalo. Bjale o kgodišegile gore Jesu o lokile le gore ge e le gabotse ke Morwa wa Modimo.

Ba bangwe bao ba makaditšwego ke ditiragalo tše tšeo di sa tlwaelegago ba ya magae, ba “itshetla dihuba” e le leswao la gore ba nyamile kudu e bile ba lewa ke dihlong. (Luka 23:48) Gare ga bao ba bogetšego ba le kgojana go na le barutiwa ba bantši ba basadi bao ka dinako tše dingwe ba bego ba sepela le Jesu. Le bona ba kwešitšwe bohloko kudu ke ditiragalo tše ka moka tše bohlokwa kudu.

 

Ithute ka mo go oketšegilego

Jesu—Lebaka Leo ka Lona a Ilego a hwa

Ke ka baka la’ng Jesu a ile a swanelwa ke go tlaišega le go hwa? Lebaka la gona le ka kgoma bophelo bja gago kudu.

Maria o Ile a Kgotlelela Tšhoša

Mohlala wa Maria, mmago Jesu, o ka go thuša ge e ba o lebeletšane le “tšhoša e telele” ya manyami.