Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 107

Kgoši e Bitša Bao ba Laleditšwego Monyanyeng wa Lenyalo

Kgoši e Bitša Bao ba Laleditšwego Monyanyeng wa Lenyalo

MATEO 22:1-14

  • SESWANTŠHO SA MABAPI LE MONYANYA WA LENYALO

Ge bodiredi bja Jesu bo yela bofelong, o tšwela pele a diriša diswantšho go pepentšha bamangwalo le baperisita ba bagolo. Ka baka leo, ba nyaka go mmolaya. (Luka 20:19) Eupša Jesu ga se a fetša ka go ba pepentšha. O ba botša seswantšho se sengwe, o re:

“Mmušo wa magodimo o swana le motho yo e lego kgoši, yo a diretšego morwa wa gagwe monyanya wa lenyalo. A roma bahlanka ba gagwe gore ba yo bitša bao ba bego ba laleditšwe monyanyeng wa lenyalo, eupša ba be ba sa rate go tla.” (Mateo 22:2, 3) Jesu o thoma seswantšho sa gagwe ka go bolela ka “Mmušo wa magodimo.” Ka gona, go a kwagala gore “kgoši” ke Jehofa Modimo. Go thwe’ng ka morwa wa kgoši le bao ba laletšwago monyanyeng wa lenyalo? Le gona mo, ga go thata go hlaola morwa wa kgoši e le Morwa wa Jehofa, yoo a lego moo a bolela seswantšho se, le go kwešiša gore bao ba laleditšwego ke bao ba tlago go ba le Morwa Mmušong wa magodimo.

Ke bomang bao ba laletšwago pele? Go ba gona, ke bomang bao Jesu le baapostola ba bego ba dutše ba bolela le bona ka Mmušo? Ba be ba bolela le Bajuda. (Mateo 10:6, 7; 15:24) Setšhaba se se amogetše kgwerano ya Molao ka 1513 B.C.E., ka go re’alo ya ba sa mathomo sa go bopa “mmušo wa baperisita.” (Ekisodo 19:5-8) Eupša ge e le gabotse ba be ba tla bitšwa neng “monyanyeng wa lenyalo”? Go a kwagala gore taletšo yeo e tšwile ka 29 C.E. ge Jesu a be a thoma go bolela ka Mmušo wa magodimo.

Le gona Baisiraele ba bantši ba ile ba arabela bjang taletšong yeo? Go etša ge Jesu a boletše, “ba be ba sa rate go tla.” Bontši bja baetapele ba bodumedi le batho feela ba be ba sa mo amogele e le Mesia e bile e le Kgoši ya Modimo yeo e kgethilwego.

Lega go le bjalo, Jesu o bontšha gore Bajuda ba ba be ba tla fiwa sebaka se sengwe, ge a re: “[Kgoši] a buša a roma bahlanka ba bangwe, a re: ‘Botšang bao ba laleditšwego le re: “Bonang! Ke lokišitše dijo tša ka tša mosegare, dipoo tša ka le diphoofolo tše di nontšhitšwego di hlabilwe gomme dilo ka moka di lokile. Tlang monyanyeng wa lenyalo.”’ Eupša ba sepela ba se na taba le tšona, yo mongwe a ya tšhemong ya gagwe, yo mongwe a ya kgwebong ya gagwe; eupša ba bangwe ka moka, ba swara bahlanka ba gagwe ba ba hlompholla gomme ba ba bolaya.” (Mateo 22:4-6) Seo se sepedišana le seo se bego se tla direga ge phuthego ya Bokriste e šetše e hlomilwe. Ka nako yeo, Bajuda ba be ba sa na le sebaka sa go ka ba gona Mmušong, fela ba bantši ba ile ba gana taletšo ye, ba ba ba swara ‘bahlanka ba kgoši’ gampe.—Ditiro 4:13-18; 7:54, 58.

Setšhaba seo se feleditše kae? Jesu o re: “Kgoši ya galefa, ya romela madira a yona ya fediša babolai bao ya ba ya fiša motse wa bona.” (Mateo 22:7) Seo se ile sa wela Bajuda ka 70 C.E. ge Baroma ba be ba senya “motse wa bona,” e lego Jerusalema.

Na go gana ga bona taletšo ya kgoši go bolela gore go be go ka se sa laletšwa motho? E sego go ya ka seo Jesu a se boletšego seswantšhong sa gagwe. O tšwela pele o re: “Ke moka [kgoši] ya re go bahlanka ba yona: ‘Monyanya wa lenyalo wona o lokile, eupša bao ba laleditšwego ba be ba sa swanelege. Ka baka leo, eyang ditseleng tšeo di tšwelago ka ntle ga motse gomme motho yo le mo hwetšago le mo laletše monyanyeng wa lenyalo.’ Ka gona bahlanka bao ba ya ditseleng ba kgobokanya bohle bao ba ba hwetšago, ba kgopo gotee le ba ba lokilego; phapoši ya monyanya wa lenyalo ya tlala bao ba dutšego tafoleng.”—Mateo 22:8-10.

Sa bohlokwa ke gore moapostola Petro ka morago o be a tla thoma go thuša Bantle—bao e bego e se Bajuda ka tswalo goba bao ba sokologetšego bodumeding bja Sejuda—gore e be Bakriste ba therešo. Ka 36 C.E., molaodi wa madira a Baroma e lego Koronelio le ba lapa la gagwe ba ile ba amogela moya wa Modimo, ba ba boemong bja go ka tsena Mmušong wa magodimo woo Jesu a boletšego ka wona.—Ditiro 10:1, 34-48.

Jesu o bontšha gore ga se bohle bao ba tlago monyanyeng bao ba tla feleletšago ba amogetšwe ke “kgoši.” O re: “Ge kgoši e etla go lekola baeng, ya bona motho yo a bego a se a apara seaparo sa lenyalo moo. Ka gona ya re go yena: ‘Wešo, o tsene bjang mo o se wa apara seaparo sa lenyalo?’ A hloka molomo. Ke moka kgoši ya re go bahlanka ba yona: ‘Mo tlemeng maoto le matsogo le mo lahleleng leswiswing ka kua ntle. Moo ke mo go tlago go ba le dillo le ditsikitlano tša meno.’ Gobane ke ba bantši ba ba laleditšwego, eupša ke ba sego kae ba ba kgethilwego.”—Mateo 22:11-14.

Baetapele ba bodumedi bao ba theeditšego Jesu ba ka ba ba sa kwešiše seo a se bolelago. Lega go le bjalo, ga se ba thaba e bile ba tloga ba ikemišeditše go fediša motho yo a ba hlabišago dihlong ka tsela yeo.

Ithute ka mo go oketšegilego

Jehofa “ga a Bebe Sefahlego”

Modimo o theetša dithapelo tša barapedi ba gagwe go sa šetšwe gore ke ba morafo ofe, setšhaba sefe goba gore ba na le maemo afe setšhabeng. Re tseba seo bjang?