Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 108

Jesu o Palediša Maiteko a go mo Tanya

Jesu o Palediša Maiteko a go mo Tanya

MATEO 22:15-40 MAREKA 12:13-34 LUKA 20:20-40

  • NEANG KESARA TŠA KESARA

  • NA LENYALO LE GONA TSOGONG YA BAHU?

  • DITAELO TŠE DIKGOLOKGOLO

Manaba a Jesu a bodumedi a galefile. Jesu o sa tšwa go bolela ka seswantšho seo se pepentšhago bobe bja bona. Bjale Bafarisei ba rerišana seng sa bona gore ba mo tanye. Ba leka go mo dira gore a bolele selo seo se ka dirago gore a išwe go mmuši wa Roma, gomme ba lefa ba bangwe ba barutiwa ba bona gore ba mo tanye.—Luka 6:7.

Bona ba re: “Morutiši, re tseba gore o bolela le go ruta ka mo go nepagetšego gomme ga o bebe sefahlego, eupša o ruta tsela ya Modimo ka go dumelelana le therešo. Na ke mo go dumeletšwego ke molao gore re ntšhetše Kesara lekgetho goba ga go bjalo?” (Luka 20:21, 22) Jesu ga a forwe ke ge ba mo tšhela phori mahlong, ka gobane ge e le gabotse ke baikaketši e bile ba na le bomenetša. Ge a ka re: ‘Aowa, go lefa lekgetho ga go a swanela,’ a ka latofatšwa ka molato wa go menola mmušo wa Roma. Eupša ge a ka re: ‘Ee, lefang lekgetho,’ batho, bao ba sa ratego go ba balata ba mmušo wa Roma, ba ka no se mo kwešiše gomme ba mo hlasela. Ka gona o ba araba bjang?

Jesu o arabela ka gore: “Le ntekela’ng, lena baikaketši? Mpontšheng tšhelete ya lekgetho.” Ba mo tlišetša tenariase gomme a ba botšiša gore: “Seswantšho se le mongwalokgwaro wo ke tša mang?” Ba araba ba re: “Ke tša Kesara.” Ke moka Jesu o ba laela ka bokgwari o re: “Ka baka leo, neang Kesara tša Kesara eupša Modimo le mo nee tša Modimo.”—Mateo 22:18-21.

Batho ba makatšwa ke mantšu a Jesu. Ka ge a ba tswaletše melomo ka karabo ya gagwe e botse, ba a tloga. Eupša e sa le mosegare gomme ba sa tlo leka go mo tanya. Ka morago ga ge Bafarisei ba paletšwe ke go mo tanya, baetapele ba sehlopha se sengwe sa bodumedi ba tla go Jesu.

Basadutsei, bao ba rego ga go na tsogo ya bahu, ba rotoša potšišo yeo e lego mabapi le tsogo le gore mosadi a nyalwe ke ngwanabo monna. Ba a botšiša ba re: “Morutiši, Moshe o itše: ‘Ge e ba motho a ehwa a se na bana, ngwanabo a tšee mosadi wa gagwe gomme a be le bana le yena bakeng sa ngwanabo.’ Bjale re be re na le bana ba motho ba šupago, wa pele a nyala gomme a hwa, fela ka ge a be a se na bana, a tlogelela ngwanabo mosadi wa gagwe. Gwa direga ka tsela e swanago ka wa bobedi le wa boraro go ba go fihla go bona ka moka e le ba šupago. Mafelelong mosadi yoo le yena a hwa. Ka baka leo, tsogong, e tla ba mosadi wa mang go bao ba šupago? Gobane ka moka ba be ba mo nyetše.”—Mateo 22:24-28.

A diriša mangwalo a Moshe, ao Basadutsei ba a amogelago, Jesu o araba ka gore: “Na le ga se lebaka leo ka lona le fošitšego, ka ge le sa tsebe Mangwalo goba matla a Modimo? Gobane ge ba tsoga bahung, banna ba ka se nyale le basadi ba ka se nyalwe, eupša ba tla ba bjalo ka barongwa magodimong. Eupša ge e le mabapi le go tsošwa ga bahu, na ga se la ka la bala pukung ya Moshe, pegong ya mabapi le sehlare sa meetlwa, kamoo Modimo a ilego a re go yena: ‘Ke nna Modimo wa Aborahama, Modimo wa Isaka le Modimo wa Jakobo’? Ke Modimo wa ba phelago, e sego wa bahu. Le fošitše kudu.” (Mareka 12:24-27; Ekisodo 3:1-6) Mašaba a makatšwa ke karabo yeo.

Jesu o tswaletše Bafarisei gotee le Basadutsei melomo. Bjale baganetši ba ba bodumedi ba kopane ba tla go leka Jesu gape. Yo mongwe wa bamangwalo o a botšiša o re: “Morutiši, taelo e kgolokgolo Molaong wa Moshe ke efe?”—Mateo 22:36.

Jesu o a araba o re: “Ya pele ke ye: ‘Kwaa, wena Isiraele, Jehofa Modimo wa rena ke yena Jehofa a nnoši, gomme o rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.’ Ya bobedi ke ye: ‘O rate moagišani wa gago ka mokgwa wo o ithatago ka wona.’ Ga go na taelo e nngwe e fetago tše.”—Mareka 12:29-31.

Ge bamangwalo ba ekwa karabo yeo, ba re: “Morutiši, o boletše gabotse ka go dumelelana le therešo. ‘Modimo ke o tee gomme ga go yo mongwe ka ntle le Yena,’ le gona, go mo rata mo ka pelo ka moka, ka tlhaologanyo ka moka le ka matla ka moka le go rata moagišani mo go etša ge motho a ithata go feta dihlabelo le dibego ka moka tše di feletšego tša go fišwa.” Ge Jesu a lemoga gore yo mongwe wa bamangwalo o arabile ka bohlale, o re go yena: “Ga o kgole le Mmušo wa Modimo.”—Mareka 12:32-34.

Jesu o tšere matšatši a mararo (Nisani 9, 10 le 11) a ruta tempeleng. Batho ba bangwe, ba bjalo ka yo yo mongwe wa bamangwalo, ba be ba thabela go mo theetša. Eupša go be go se bjalo ka baetapele ba bodumedi, bao bjale ba se nago “sebete sa go mmotšiša dipotšišo.”

Ithute ka mo go oketšegilego

Dipotšišo tše Tšwago go Babadi—August 2014

Na Jesu o be a bolela ka bao ba tlago go tsošetšwa mo lefaseng ge a be a re batho bao ba tsošitšwego “ba ka se nyale le ge e le go nyalwa?”

Go na le Kholofelo Efe ka Bahu?

Go direga eng ka rena ge re ehwa? Na re tla ka ra bona baratiwa ba rena bao ba hwilego?