Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 134

Lebitla Leo le se Nago Motho—Jesu o a Phela!

Lebitla Leo le se Nago Motho—Jesu o a Phela!

MATEO 28:3-15 MAREKA 16:5-8 LUKA 24:4-12 JOHANE 20:2-18

  • JESU O TSOŠITŠWE BAHUNG

  • DITIRAGALO TŠA LEBITLENG LA JESU

  • O IPONAGATŠA GO BASADI BA FAPAFAPANEGO

Ruri basadi ba maketše kudu ge ba hwetša lebitla leo le bonagalago le se na motho! Maria Magdalena o kitimela go “Simone Petro le go morutiwa yo mongwe yo Jesu a bego a mo rata,” e lego moapostola Johane. (Johane 20:2) Lega go le bjalo, basadi ba bangwe bao ba lego lebitleng ba bona morongwa. Ka lebitleng go na le morongwa yo mongwe, yo a “[aperego] seaparo se sešweu.”—Mareka 16:5.

Yo mongwe wa barongwa o re go bona: “Le se ke la boifa, gobane ke tseba gore le nyaka Jesu yo a bego a kokotetšwe koteng. Ga a gona, gobane o tsošitšwe bjalo ka ge a boletše. Tlang le boneng moo a bego a letše gona. Akgofang le ye le botše barutiwa ba gagwe gore o tsošitšwe bahung gomme o le etile pele go ya Galilea.” (Mateo 28:5-7) Ka gona “ba thothomela e bile ba tšhogile,” basadi ba kitimela go barutiwa go yo ba begela ditaba tše.—Mareka 16:8.

Ga bjale Maria o hweditše Petro le Johane. O ba begela a felelwa ke moya a re: “Ba ntšhitše Morena ka lebitleng gomme ga re tsebe moo ba mo laditšego gona.” (Johane 20:2) Petro le Johane ba thoma go kitima. Johane o šia Petro gomme o mo fihlela pele lebitleng. O lebelela ka lebitleng gomme a bona mašela, eupša ga a tsene.

Ge Petro a fihla, o tsena ka lebitleng. O bona mašela a leokodi ao a bego a tatile hlogo ya Jesu. Bjale Johane o a tsena ke moka a dumela pego ya Maria. Go sa šetšwe seo Jesu a se boletšego pejana, ka moka ga ba kwešiše gore o tsošitšwe bahung. (Mateo 16:21) Ba leba gae ba tlabegile. Eupša Maria yo a boetšego lebitleng, o šala moo.

Ge a sa le moo, basadi ba bangwe ba tseleng ya go yo botša barutiwa gore Jesu o tsošitšwe bahung. Ge ba le gare ba kitimela go yo ba begela, Jesu o gahlana le bona ke moka a re: “Dumelang!” Ba wela dinaong tša gagwe gomme “ba mo khunamela.” Ke moka Jesu o re: “Le se ke la boifa! Eyang le begele bana bešo, gore ba ye Galilea, ba tla mpona moo.”—Mateo 28:9, 10.

Pejana, ge tšhišinyego ya lefase e be e direga gomme morongwa a tšwelela, mašole kua lebitleng a ile ‘a roromela a ba bjalo ka bahu.’ Ka morago ga gore a theoše maswafo, a ile a tsena motseng gomme “[a] begela baperisita ba bagolo dilo ka moka tše di diregilego.” Ke moka baperisita ba ile ba ya go bagolo ba Bajuda. Go ile gwa dirwa phetho ya gore mašole a fiwe letsogo-le-kobong gore a ute taba yeo gomme a re: “Barutiwa ba gagwe ba tlile bošego ba mo utswa mola re robetše.”—Mateo 28:4, 11, 13.

Mašole a Baroma a ka bolawa ge e ba a ka robala mošomong wa ona, ka gona baperisita ba holofetša ka gore: “Ge e ba taba ye [maaka a bona a gore ba be ba robetše] e ka fihla ditsebeng tša mmuši re tla bolela le yena, ra dira gore le se sa tshwenyega.” (Mateo 28:14) Mašole a tšea letsogo-le-kobong gomme a dira seo baperisita ba rego ba se dire. Ka gona gare ga Bajuda go tlala maaka a gore setopo sa Jesu se utswitšwe.

Maria Magdalena o sa dutše a lla a le lebitleng. Ge a okamela a lebelela ka lebitleng, o bona barongwa ba babedi bao ba aperego bošweu! Yo mongwe o dutše ka dihlogong gomme yo mongwe o dutše ka maotong moo setopo sa Jesu se bego se laditšwe gona. Barongwa ba a botšiša ba re: “Wena mosadi, o llela’ng?” Maria o a araba o re: “Ba tšere Morena wa ka gomme ga ke tsebe moo ba mmeilego gona.” Ge Maria a retologa, o bona motho yo mongwe. Motho yoo o botšiša seo barongwa ba se botšišitšego gomme a oketša ka gore: “O nyaka mang?” Eupša ka ge yena a nagana gore motho yoo ke moloti wa serapa, o re: “Mohlomphegi, ge e ba o mo tšere, mpotše mo o mmeilego gona gomme ke tla ya go mo tšea.”—Johane 20:13-15.

Ge e le gabotse, Maria o bolela le Jesu yo a tsošitšwego bahung, eupša mo nakong ye ga a mo tsebe. Lega go le bjalo, ge a re, “Maria!” o bona gore ke Jesu, a mo lemoga ka tsela yeo a bolelago le yena ka yona. Maria o goeletša a thabile o re: “Raboni!” (yeo e bolelago gore “Morutiši!”). Lega go le bjalo, ka ge a tšhogile gore o tla tloga a rotogela legodimong, o a mo kgomarela. Fela Jesu o a mo kgopela o re: “Tlogela go nkgomarela. Gobane ga ke ešo ka rotogela go Tate. Eupša wena eya go bana bešo o ba botše gore: ‘Ke rotogela go Tate le go Tatago lena le go Modimo wa ka le go Modimo wa lena.’”—Johane 20:16, 17.

Maria o kitimela lefelong leo baapostola le barutiwa ba bangwe ba bokanego go lona. O re go bona: “Ke bone Morena!” gomme pego ya gagwe e tlaleletša seo ba šetšego ba se kwele go basadi ba bangwe. (Johane 20:18) Lega go le bjalo, dipego tšeo ‘di be di kwala e le tše se nago tlhaologanyo go bona.’—Luka 24:11.

Ithute ka mo go oketšegilego

Jesu o a Phela!

Barutiwa ba Jesu ba tsebile bjang gore Modimo o mo tsošitše?