Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 106

Diswantšho tše Pedi tša Mabapi le Dirapa tša Merara

Diswantšho tše Pedi tša Mabapi le Dirapa tša Merara

MATEO 21:28-46 MAREKA 12:1-12 LUKA 20:9-19

  • SESWANTŠHO SA MABAPI LE BARWA BA BABEDI

  • SESWANTŠHO SA MABAPI LE BALEMI BA SERAPENG SA MERARA

Kua tempeleng, Jesu o sa tšwa go gakantšha baperisita ba bagolo le bagolo setšhabeng, bao ba mmotšišitšego gore o dira dilo ka matla afe. Karabo ya Jesu e ba tswalela melomo. Ke moka o bolela ka seswantšho seo se pepentšhago mohuta wa batho bao ge e le gabotse ba lego wona.

Jesu o a anega o re: “Monna yo mongwe o be a na le bana ba babedi. A ya go wa pele a re: ‘Ngwanaka, eya go šoma serapeng sa merara lehono.’ Yena ge a araba a re: ‘Ke tla ya, Tate,’ eupša a se ke a ya. A batamela wa bobedi, a mmotša se se swanago. Yena ge a fetola a re: ‘Nka se ye.’ Ka morago a itshola gomme a ya. Mo go ba babedi ba ke ofe yo a dirilego thato ya tatagwe?” (Mateo 21:28-31) Karabo e molaleng—morwa wa bobedi ke yena yoo a feleleditšego a dirile thato ya tatagwe.

Ka gona Jesu o botša baganetši ba gagwe o re: “Ruri ke a le botša, balekgetho le bagweba-ka-mmele ba le tsenela pele Mmušong wa Modimo.” Balekgetho le bagweba-ka-mmele mathomong ba be ba sa nyake go hlankela Modimo. Lega go le bjalo, ka go swana le morwa wa bobedi, ka morago ba ile ba itshola gomme ga bjale ba a mo hlankela. Go fapana le bona, baetapele ba bodumedi ba swana le morwa wa pele, bao ba ipolelago gore ba hlankela Modimo eupša ge e le gabotse ba sa mo hlankele. Jesu o re: “Johane [Mokolobetši] o tlile go lena ka tsela ya toko, eupša ga se la ka la mo dumela. Lega go le bjalo, balekgetho le bagweba-ka-mmele ba mo dumetše, eupša lena, gaešita le ge le bone se, ga se la ka la itshola ka morago e le gore le mo dumele.”—Mateo 21:31, 32.

Jesu o bolela seswantšho se sengwe gape. Mo nakong ye, Jesu o bontšha gore go palelwa ga baetapele ba bodumedi ga go felele feela tabeng ya go hlokomologa go hlankela Modimo. Ge e le gabotse, ke ba babe kudu. Jesu o anega ka gore: “Motho yo mongwe o ile a lema serapa sa merara, a se ageletša ka legora, a epa segatelo sa morara a aga tora; ke moka a se gafela balemi, a ya nageng ya kgole. Bjale ka lebaka la gona a roma mohlanka go balemi gore a hwetše tše dingwe tša dienywa tša serapa sa merara go balemi. Eupša ba mo swara ba mo itia gomme ba mmušetša morago a sa swara selo. A romela mohlanka yo mongwe gape go bona, yoo le yena ba mo otla hlogong gomme ba mo goboša. A romela yo mongwe gape, yena ba mmolaya, le ba bangwe ba bantši, bao ba bangwe ba bona ba ilego ba ba itia gomme ba bangwe ba bona ba ba bolaya.”—Mareka 12:1-5.

Na bao ba theeditšego Jesu ba tla kwešiša seswantšho se? Go ba gona, ba ka gopola mantšu a Jesaya ge a ba sola a re: “Serapa sa merara sa Jehofa wa madira ke ba ntlo ya Isiraele, ge e le batho ba Juda ke tšhemo yeo a bego a e rata. O be a holofetše gore ba tla ahlola ka toka, fela ba roba molao; a holofetše gore ba tla dira go loka, fela ba baka dillo.” (Jesaya 5:7) Seswantšho sa Jesu se swana le seo. Mong wa serapa ke Jehofa gomme serapa sa merara ke setšhaba sa Isiraele, seo se ageleditšwego le go šireletšwa ke Molao wa Modimo. Jehofa o ile a romela baporofeta gore ba yo ruta batho ba gagwe le go ba thuša go tšweletša dienywa tše dibotse.

Lega go le bjalo, “balemi” ba ile ba swara ‘bahlanka’ bao ba romilwego go bona gampe le go ba bolaya. Jesu o a hlalosa o re: “[Mong wa serapa sa merara] o be a na le yo mongwe gape, e lego morwa yo a rategago. A romela yena mafelelong, a re: ‘Ba tla hlompha morwa wa ka.’ Eupša balemi bao ba boledišana seng sa bona ba re: ‘Yo ke yena mojabohwa. Tlang re mmolayeng ke moka bohwa e tla ba bja rena.’ Ka gona ba mo tšea ba mmolaya.”—Mareka 12:6-8.

Bjale Jesu o a botšiša o re: “Mong wa serapa sa merara o tla dira’ng?” (Mareka 12:9) Baetapele ba bodumedi ba a araba ba re: “O tla ba fediša ka sehlogo ka ge e le ba babe gomme a gafela balemi ba bangwe serapa sa merara, e lego bao ba tlago go mo nea dienywa ge e eba lebaka la tšona.”—Mateo 21:41.

Ka go re’alo, ba ikahlola ba sa tsebe, ka gobane ba gare ga “balemi” ba “serapa sa merara” sa Jehofa, e lego setšhaba sa Isiraele. Dienywa tšeo Jehofa a di letetšego ka tshwanelo go balemi ba bjalo di akaretša go dumela go Morwa wa gagwe, e lego Mesia. Jesu o tsepelela baetapele ba bodumedi ka mahlong gomme a re: “Na ga se la ka la bala lengwalo le le rego: ‘Leswika leo baagi ba le gannego, ke lona le fetogilego leswika le legolo la sekhutlo? . . . Se se tšwa go Jehofa gomme ke se se makatšago mahlong a rena’?” (Mareka 12:10, 11) Ke moka Jesu o hlalosa ntlha ya gagwe gabotse o re: “Ke ka baka leo ke rego go lena: Le tla amogwa Mmušo wa Modimo wa newa setšhaba seo se tšweletšago dienywa tša wona.”—Mateo 21:43.

Bamangwalo le baperisita ba a lemoga gore Jesu “o boletše seswantšho se a gopotše ka bona.” (Luka 20:19) Ba tloga ba nyaka go mmolaya go feta le ge e le neng pele, yena “mojabohwa” wa maleba. Eupša ba boifa mašaba, ao a tšeago Jesu e le moporofeta, ka gona ga ba leke go mmolaya ka yona nako yeo.

Ithute ka mo go oketšegilego

Mmušo wa Modimo ke Eng?

Kgoši ya Mmušo wa Modimo ke mang, gomme ke eng seo Mmušo woo o tlago go se fihlelela?