Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 3 2017

Ke thabela go fetša nako le bafsa ka phuthegong

 BEIBELE E FETOŠA MAPHELO

Ke be ke Rata Baseball go Feta Dilo ka Moka!

Ke be ke Rata Baseball go Feta Dilo ka Moka!
  • NGWAGA WA MATSWALO: 1928

  • NAGA: COSTA RICA

  • BOPHELO BJA PELE E EBA MOKRISTE: O BE A NWELETŠE DIPAPADING LE GO PETŠHENG

BOPHELO BJA KA BJA NAKONG E FETILEGO

Ke goletše Puerto Limón le lefelong la kgauswi le yona. Puerto Limón ke motse o nago le boemakepe wo o lego lebopong la ka bohlabela bja Costa Rica. Batswadi ba ka ba be ba na le bana ba seswai gomme nna ke le wa bošupa go bana bao. Tate o hlokofetše ke na le mengwaga e seswai. Ka morago ga moo, mma o ile a swanelwa ke go re godiša a le noši.

Ke tšwa kgole le papadi ya baseball. Ke thomile go e bapala ke sa le ngwana. Ge ke le mengwageng ya mafelelo ya mahlalagading, ke ile ka thoma go bapalela sehlopha sa tlasana sa baseball. Ge ke dutše ke bapala moo ke le mengwageng ya ka ya bo-20, monna yo a bego a nyaka dibapadi o ile a nkgopela gore ke tle ke bapalele sehlopha sa maemo a godimo sa kua Nicaragua. Eupša ke be ke sa nyake go ya Nicaragua ka gobane ka nako yeo mma o be a lwala gomme ke mo hlokometše. Ka gona ke ile ka gana go bapalela sehlopha seo sa maemo a godimo. Ge nako e dutše e eya, monna yo mongwe yo le yena a bego a nyaka dibapadi o ile a nkgopela go tlo bapalela sehlopha sa baseball sa naga ya Costa Rica. Sehlopha seo sa naga se be se bopša ke dibapadi tšeo di bego di bapalela dihlopha tša tlasana. Nakong ye ke ile ka dumela go bapalela sehlopha sa naga. Ke bapetše sehlopheng sa naga go tloga ka 1949 go fihla ka 1952. Ke ile ka bapala dipapadi tša go latelelana kua Cuba, Mexico le Nicaragua. Ke be ke bapala sekhutlong sa bobedi le sa boraro (ke le baseman) gomme ke ile ka bapala dipapadi tše 17 ntle le go dira phošo. Ke be ke ekwa bose ge mašaba a goeletša leina la ka.

Sa go nyamiša ke gore ke be ke itshwere gampe. Le ge ke be ke na le kgarebe e tee, eupša ke be ke dula ke ikutswa le banenyana ba bangwe. E bile ke be ke le setagwa. Ka letšatši le lengwe ke ile ka tagwa kudu moo e lego gore ge ke tsoga ke be ke sa gopole gore ke fihlile bjang gae. Le gona, ke be ke petšha lotto le go bapala mataese.

Ge ke sa dutše ke phela ka tsela yeo, mma o ile a ba Hlatse ya Jehofa. O ile a leka go nthuta tumelo ya gagwe, eupša mathomong ke ile ka mo palela ka ge ke be ke nweletše kudu papading ya baseball. Ke be ke sa kwe tlala ge ke be ke itlwaeletša go bapala, le ge e be e le nako ya go ja. Ke be ke nagana ka papadi feela. Ke be ke rata baseball go feta dilo ka moka!

 Lega go le bjalo, ge ke be ke na le mengwaga e 29 ke ile ka gobala kudu ge ke be ke leka go kama kgwele ge re be re bapala. Ka morago ga gore ke fole ke ile ka tlogela go bapala sehlopheng sa maemo a godimo. Eupša ke ile ka thoma go tlwaetša dibapadi tšeo di bego di bapalela sehlopha sa tlasana sa baseball sa kgauswi le gae.

KAMOO BEIBELE E FETOTŠEGO BOPHELO BJA KA

Ka 1957 ke ile ka amogela taletšo ya go ya kopanong ya selete ya Dihlatse tša Jehofa. Kopano yeo e be e swaretšwe lepatlelong leo ke bego ke bapala baseball go lona. Ge ke dutše moo, ke ile ka lemoga gore Dihlatse di itshwara ka tsela e hlomphegago, go fapana kudu le batho ba mašata bao ke bego ke ba bona dipapading tša baseball. Seo ke se bonego kopanong yeo se ile sa dira gore ke thome go ithuta Beibele le Dihlatse le go ya dibokeng tša tšona tša phuthego.

Dithuto tše dintši tšeo ke bego ke ithuta tšona ka Beibeleng di be di nkgahla. Ka mohlala, Jesu o ile a bolela e sa le pele gore mehleng ya bofelo, barutiwa ba gagwe ba be ba tla bolela ditaba tše dibotse tša Mmušo wa Modimo lefaseng ka moka. (Mateo 24:14) Le gona, ke ithutile gore Bakriste ba therešo ga se ba swanela go ruta batho Beibele ka morero wa gore ba dire tšhelete. Jesu o itše: “Le amogetše feela, neang feela.”—Mateo 10:8.

Ge ke le gare ke ithuta Beibele, ke be ke bapetša seo e se bolelago le seo Dihlatse tša Jehofa di se dirago. Ke be ke kgahlwa ke maiteko a magolo ao di bego di a dira a go phatlalatša ditaba tše dibotse tša Mmušo wa Modimo lefaseng ka moka. Ke be ke bona di na le moya wa go nea woo Jesu a laetšego gore Bakriste ba be le wona. Ka gona, ge ke be ke bala lengwalo la Mareka 10:21 gomme ke bona taletšo ya Jesu e rego ‘Etla o be molatedi wa ka,’ ke ile ka nyaka go ba Hlatse ya Jehofa.

Ke tšere nako e teletšana pele ke dira phetho ya go ba Hlatse. Ka mohlala, ke tšere mengwaga e mentši ke iteka mahlatse ka go bapala nomoro e tee ya lotto beke e nngwe le e nngwe. Lega go le bjalo, Beibele e ile ya nthuta gore Modimo o hloile batho ba go rapela “modimo wa Mahlatse” le batho ba megabaru. (Jesaya 65:11; Bakolose 3:5) Ka gona, ke ile ka kgaotša go petšha. Sontageng sa mathomo ka morago ga gore ke kgaotše go petšha lotto, nomoro ya ka yeo ke bego ke iteka mahlatse ka yona ile ya wina. Batho ba ile ba nkwera ka ge ke se ka bapala lotto bekeng yeo. Ba ile ba leka go nkgapeletša gore ke boele ke bapale lotto, eupša ke ile ka gana. Go tloga nakong yeo ga se ka ka ka petšha gape.

Letšatšing leo ke kolobeditšwego ka lona kopanong ya selete ya Dihlatse tša Jehofa, “semelo se sefsa” sa ka se ile sa lekwa. (Baefeso 4:24) Mantšiboeng ao, ge ke be ke boela hoteleng yeo ke bego ke dula go yona, ke ile ka hwetša ngwanenyana yo ke ilego ka ratana le yena a eme pele ga lebati la phapoši ya ka. O ile a nthapeletša ka gore: “Sammy, etla re ipshine,” eupša ke ile ka gana. Ke ile ka mo gopotša gore ga bjale ke phela ka melao ya motheo ya Beibele ya mabapi le boitshwaro. (1 Bakorinthe 6:18) O ile a galefa a re: “O re’ng?” O ile a nyenyefatša seo Beibele e se bolelago ka go itshwara gampe ka thobalano e bile a gapeletša gore re boelane. Go sa šetšwe seo a se boletšego, ke ile ka tsena ka phaphošing gomme ka notlela lebati. Lehono, ke thabile kudu gore ga e sa le ke eba Hlatse go tloga ka 1958, ke ile ka dula ke botega gomme ga se ka ka ka boela mekgweng ya ka e mebe.

KAMOO KE ILEGO KA HOLEGA KA GONA

Ke ikwa eka nka ngwala puku mabapi le kamoo ke hotšwego kudu ke go latela tlhahlo ya Beibele. Ke holegile ka go ba le bagwera ba kgonthe, bophelo bja go ba le morero le go hwetša lethabo la kgonthe.

Ke sa rata baseball, eupša ga e sa tla pele bophelong bja ka. Ge ke be ke bapala baseball, ke be ke tumile e bile ke na le tšhelete e ntši, eupša dilo tšeo e be e be e le tša nakwana. Eupša segwera seo ke nago le sona le Jehofa le batho bao ba mo hlankelago bao ke lego karolo ya bona e tla ba sa ka mo go sa felego. Beibele e re: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Johane 2:17) Ga bjale ke rata Jehofa Modimo le batho ba gagwe go feta dilo ka moka!