Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 1 2017

Kotsi ya go se Kwešiše Beibele Gabotse

Kotsi ya go se Kwešiše Beibele Gabotse

Ngwanenyana yo monyenyane o bone muši o rotogela godimo go tšwa ditšhimeleng goba diphaepheng tša go ntšha muši tša feketori gomme o ipopa bjalo ka maru. O ile a phetha ka gore feketori yeo ke ya go dira maru. Go se kwešiše ga ngwana ka tsela yeo go ka segiša. Lega go le bjalo, go se kwešiše dilo go ka kgoma maphelo a rena kudu. Ka mohlala, go se bale ditaelo gabotse lepotlelong la sehlare go ka ba le mafelelo a go se kgahliše.

Go se kwešiše dithuto tša Beibele go ka ba kotsi le go feta. Ka mohlala, batho ba bangwe ba ile ba se kwešiše dithuto tša Jesu. (Johane 6:48-68) Go e na le gore ba ithute mo gontši, ba ile ba gana dilo ka moka tšeo Jesu a bego a di ruta. Ruri ba ile ba lahlegelwa kudu!

Na o bala Beibele gore e go hlahle? Ge e ba go le bjalo, o dira gabotse kudu. Lega go le bjalo, na go ka ba kotsi go se kwešiše seo o se balago? Seo se diragalela batho ba bantši. Ela hloko dilo tše tharo tšeo gantši batho ba sa di kwešišego.

  • Batho ba bangwe ga ba kwešiše taelo ya Beibele ya gore re ‘boife Modimo wa therešo.’ Ba nagana gore ba swanetše go boifa Modimo ka tsela e feteletšego. (Mmoledi 12:13) Eupša Modimo ga a nyake gore bao ba mo rapelago ba ikwe ka tsela yeo ka yena. O re: “O se ke wa boifa gobane ke na le wena. O se ke wa lealea gobane ke Modimo wa gago. Ke tla go matlafatša. Ruri ke tla go thuša.” (Jesaya 41:10) Go boifa Modimo go bolela go mo hlompha ka mo go tseneletšego.

  • Na lefase le tla fišwa ka mollo?

    Batho ba bangwe ba kwela thoko mantšu a ao a buduletšwego a rego: “Selo se sengwe le se sengwe se na le nako ya sona e beilwego, . . . go na le nako ya go tswalwa le nako ya go hwa.” Ba phetha ka gore Modimo o beetše motho yo mongwe le yo mongwe nako yeo a tlago go hwa ka yona. (Mmoledi 3:1, 2) Lega go le bjalo, ditemana tšeo ge e le gabotse di bolela ka modikologo wa bophelo le go bolela gore lehu ke selo seo se re welago ka moka. Lentšu la Modimo gape le re ruta gore botelele bja maphelo a rena bo ka kgongwa ke diphetho tša rena. Ka mohlala, re bala gore: “Go boifa Jehofa go tla atišetša motho matšatši.” (Diema 10:27; Psalme 90:10; Jesaya 55:3) Bjang? Ka mohlala, go hlompha Lentšu la Modimo go tla re tutuetša gore re pheme mekgwa e sa kgahlišego e bjalo ka botagwa le boitshwaro bjo bo gobogilego.—1 Bakorinthe 6:9, 10.

  • Ba bangwe ba tšea Beibele ka tsela ya kgonthe ge e bolela gore magodimo le lefase “di boloketšwe mollo,” gomme ba phetha ka gore Modimo o tlo fediša polanete ye. (2 Petro 3:7) Eupša Modimo o holofetša gore a ka se dumelele lefase la kgonthe le fedišwa. Modimo “o theile lefase godimo ga metheo ya lona; le ka se tsoge le thekesetše go iša mehleng ya neng le neng, le ka mo go sa felego.” (Psalme 104:5; Jesaya 45:18) Go tla fedišwa tshepedišo ye e kgopo ya dilo, bjalo ka ge eka e fedišwa ka mollo, e sego polanete ya kgonthe. Lentšu magodimo, ge go bolelwa ka lona ka go lebanya, le ka šupa leratadima, legohle leo le tletšego dinaledi, goba bodulo bja Modimo. Ga go le setee sa dilo tše seo se tlago go fedišwa.

KE KA BAKA LA ENG KA DINAKO TŠE DINGWE BEIBELE E SA KWEŠIŠWE?

Ka ge o ka iponela mehlaleng yeo go boletšwego ka yona, batho gantši ga ba kwešiše ditemana tšeo ba di balago ka Beibeleng. Eupša ke ka baka la’ng Modimo a ka dumelela seo gore se direge? Ba bangwe ba ka nea lebaka la gore: ‘Ge e ba Modimo e le yo bohlale kudu e bile a tseba dilo ka moka, nkabe a ile a re nea puku yeo e ngwadilwego ka tsela e kwagalago yeo e bego e tla kwešišwa gabonolo ke batho bohle. Ke ka baka la’ng a sa dira bjalo?’ Ela hloko mabaka a mararo ao ka ona gantši Beibele e sa kwešišwego.

  1. Beibele e hlametšwe gore e kwešišwe ke batho bao ba ikokobeditšego le bao ba ikemišeditšego go ithuta. Jesu o boditše Tatagwe gore: “Ke  go tumiša phatlalatša wena Tate, Morena wa legodimo le lefase, gobane o utetše ba bohlale le ba tlhaologanyo dilo tše ka kelohloko gomme wa di utollela bana.” (Luka 10:21) Beibele e ngwadilwe ka tsela yeo molaetša wa yona o kwešišwago feela ke bao ba nago le maikemišetšo a mabotse. Batho bao ba ikgogomošago—e lego mokgwa o tlwaelegilego wa “ba bohlale le ba tlhaologanyo”—ba na le go se kwešiše Beibele. Eupša batho bao ba balago Beibele ka moya wa go swana le wa “bana”—bao ba ikokobeditšego le ba ikemišeditšego go ithuta—ba putswa ka gore ba kwešiše molaetša wa Modimo gakaone. Ruri Modimo o hlamile Beibele ka bokgoni!

  2. Beibele e ngwaletšwe batho bao ba tlogago ba nyaka gore Modimo a ba thuše go e kwešiša. Jesu o bontšhitše gore batho ba be ba tla nyaka thušo ya gore ba kwešiše ka botlalo seo a ba rutago sona. Ba be ba tla hwetša thušo yeo bjang? Jesu o hlalositše gore: “Mothuši, e lego moya o mokgethwa woo Tate a tlago go o roma ka leina la ka, o tla le ruta tšohle.” (Johane 14:26) Ka gona, Modimo o nea moya wa gagwe o mokgethwa, e lego matla a gagwe a šomago, gore o thuše batho go kwešiša seo ba se balago ka Beibeleng. Lega go le bjalo, Modimo ga a nee moya wa gagwe go bao ba sa ithekgego ka yena. Ka gona, gantši ba bonagala ba thatafalelwa ke go kwešiša Beibele. Le gona moya o mokgethwa o tutuetša Bakriste bao ba nago le tsebo gore ba thuše bao ba nyakago go kwešiša Beibele kutšwanyana.Ditiro 8:26-35.

  3. Batho ba ka kwešiša ditemana tše dingwe tša Beibele feela ka nako e swanetšego historing. Ka mohlala, moporofeta Daniele o ile a botšwa gore a ngwale molaetša wa nakong e tlago. Morongwa o ile a mmotša gore: “Daniele, tswalelela mantšu a, o tiiše puku ye ka seka go fihlela mehleng ya bofelo.” Go theoša le mengwaga e makgolo, batho ba bantši ba ile ba bala puku ya Beibele ya Daniele eupša ba sa e kwešiše. Ge e le gabotse, gaešita le Daniele ka boyena o be a sa kwešiše tše dingwe tša dilo tšeo a di ngwadilego. Ka boikokobetšo o ile a dumela gore: “Ge e le nna ka kwa eupša ka se kwešiše.” Mafelelong, nakong e itšego historing yeo e beilwego ke Modimo, batho ba be ba tla kwešiša gabotse boporofeta bja Modimo bjo bo ngwadilwego ke Daniele. Morongwa o hlalositše gore: “Sepela Daniele, ka gobane mantšu a a tswaleletšwe gomme a tiišwa ka seka go fihla mehleng ya bofelo.” Ke bomang bao ba tlago go kwešiša molaetša wa Modimo? Beibele e re: “Ga go le o tee wa bona [ba kgopo] yo a tlago go kwešiša; eupša bao ba nago le temogo ba tla kwešiša.” (Daniele 12:4, 8-10) Ka gona, Modimo ga a utolle seo se bolelwago ke ditemana tše itšego tša Beibele go fihlela ge go fihla nako ya maleba.

Na go na le dinako tšeo ka tšona Dihlatse tša Jehofa di kilego tša se kwešiše ditaba tše itšego tša Beibele gabotse? Ee. Eupša ge go fihla nako ya gore Modimo a dire gore dilo di kwagale gabotse, Dihlatse di ile tša fetoša kwešišo ya tšona gateetee. Di dumela gore ka go dira bjalo di ekiša baapostola ba Kriste, bao ka boikokobetšo ba bego ba fetoša kgopolo ya bona nako le nako ge Jesu a be a ba phošolla.Ditiro 1:6, 7.

Go inaganela ga ngwanenyana yo monyenyane mabapi le gore maru a tšwa kae e ka no ba e le go se kwešiše dilo gabotse. Lega go le bjalo, seo Beibele e se rutago ke sa bohlokwa kudu go wena. Molaetša wa Beibele o bohlokwa kudu, moo e lego gore motho a ka se kgone go o kwešiša ka go ipalela ka boyena. Ka gona, tsoma thušo ya go kwešiša seo o se balago. Tsoma batho bao ba ithutago Beibele ka moya wa boikokobetšo, bao ba thušwago ke moya o mokgethwa wa Modimo gore ba kwešiše Beibele, e bile ba kgodišegile gore re phela nakong yeo go yona Modimo a nyakago gore re kwešiše Beibele go feta le ge e le neng peleng. O se ke wa dikadika go boledišana le Dihlatse tša Jehofa goba go bala nyakišišo ya tšona yeo e dirilwego ka kelohloko Wepesaeteng ya jw.org/nso. Beibele e holofetša gore: ‘Ge o ka goeletša kwešišo, o tla ba le tsebo ka ga Modimo.’Diema 2:3-5.

Ithute ka mo go oketšegilego

Na Beibele e a Ikganetša?

Hlahloba ditemana tša Beibele tšeo di bonagalago di ganetšana ke moka o diriše mekgwa e holago gore o kgone go kwešiša taba gabotse.