Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 1 2017

 TABA YA LETLAKALA LA KA NTLE | KAMOO O KA HOLWAGO KE GO BALA BEIBELE

Ke ka Baka la Eng o Swanetše go Bala Beibele?

Ke ka Baka la Eng o Swanetše go Bala Beibele?

“Ke be ke nagana gore go ka se be bonolo go kwešiša Beibele.”—Jovy

“Ke be ke nagana gore go tlo ntšwafiša.”—Queennie

“Ge ke be ke bona kamoo Beibele e lego e kgolo ka gona, ke ile ka felelwa ke kgahlego ya go e bala.”—Ezekiel

Na o kile wa nagana ka go bala Beibele gomme wa tlogela ka ge o be o ikwa go swana le batho bao go boletšwego ka bona ka mo godimo? Ba bantši ba bona eka go bala Beibele go a tšwafiša. Eupša go thwe’ng ge e ba o kwele gore Beibele e ka go thuša gore o thabe le go kgotsofala bophelong? Le gona go thwe’ng ge e ba o hwetša gore go na le mekgwa yeo e ka dirago gore o thabele go bala Beibele? Na o ka ikemišetša go hlahloba seo Beibele e go swaretšego sona?

Ela hloko ditlhaloso tše sego kae tša bao ba ilego ba holwa ke Beibele ge ba be ba thoma go e bala.

Ezekiel, yo a lego mengwageng ya bo-20, o re: “Mathomong ke be ke swana le motho yo a otlelago koloi a sa tsebe mo a yago gona. Eupša go bala Beibele go nthušitše go ba le morero bophelong. E na le dikeletšo tše di holago tšeo nka di dirišago letšatši le letšatši.”

Frieda, yo le yena a lego mengwageng ya bo-20, o hlalosa gore: “Ke be ke na le hlogo e thata. Eupša go bala Beibele go nthušitše gore ke kgone go ba le boitshwaro. Seo se nthušitše gore ke kgone go phedišana le batho gabotse. Ka gona, ga bjale ke na le bagwera ba bantši.”

Mosadi yo a lego mengwageng ya bo-50 yo a bitšwago Eunice ge a bolela ka Beibele o re: “E nthuša gore ke tlogele mekgwa ya ka ya go se kgahliše, le go ba motho yo kaone.”

Go swana le ge babadi bao le ba bangwe ba dimilione ba ithutile, go bala Beibele go ka go thuša gore o thabele bophelo. (Jesaya 48:17, 18) Gare ga dilo tše dingwe, e ka go thuša go (1) dira diphetho tše di botse, (2) go dira bagwera ba kgonthe, (3) go lebeletšana le kgateletšego, gomme (4) ka godimo ga tšohle, e ka go thuša go ithuta therešo ka Modimo. Keletšo yeo e lego ka Beibeleng e tšwa go Modimo, ka gona o tla atlega ge o e latela. Modimo ga a ke a nea keletšo e fošagetšego.

Sa bohlokwa ke gore o thome go e bala. Ke ditšhišinyo dife tšeo di ka dirago gore go be bonolo go thoma go e bala le go e thabela?