Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 1 2017

 BEIBELE E FETOŠA MAPHELO

Ke be ke sa Nyake go hwa!

Ke be ke sa Nyake go hwa!
  • NGWAGA WA MATSWALO: 1964

  • NAGA: ENGELANE

  • BOPHELO BJA PELE E EBA MOKRISTE: MMA YO E SA LEGO MOFSA YO E BEGO E LE LERABELE

BOPHELO BJA KA BJA NAKONG E FETILEGO

Ke belegetšwe Paddington, e lego lefelo leo le nago le badudi ba bantši kudu la London, Engelane. Nna le bosesi ba ka ba bararo re be re dula le mma. Tate o be a sa dule le rena ka mehla ka baka la bothata bja gagwe bja go nwa kudu.

Ge ke be ke sa le ngwana, mma o ile a nthuta gore ke rapele bošego bjo bongwe le bjo bongwe. Ke be ke na le Beibele e nyenyane yeo e nago le Dipsalme feela, gomme ke ile ka itlhamela dikopelo ka Dipsalme tšeo. Ke gopola ke bala pukung yeo e sego ya bodumedi mantšu a mangwe ao a ilego a ntšhalela monaganong, ao a rego: “Ka letšatši le lengwe bophelo bo tlo fela.” Mantšu ao e be e le tlhobaboroko go nna ge ke nagana ka bokamoso. Ke ile ka nagana gore: ‘Bophelo bo swanetše go ba bo na le morero.’ ‘Ke ka baka la’ng ke phela?’ Ke be ke sa nyake go hwa!

Ke ile ka thoma go kgahlegela go dirišana le meoya. Ke ile ka leka go boledišana le bahu, ke eya mabitleng le bagwera ba ka ba sekolong, e bile re bogela le dimubi tša go tšhoša. Go ya ka rena dimubi tšeo di be di thabiša e bile di tšhoša.

Ke be ke na le mengwaga e lesome ge ke thoma go se sa laolega. Ke ile ka thoma go kgoga motšoko, gomme ka nakwana ke ge ke šetše ke o lemaletše. Ka morago, ke ile ka thoma go kgoga patše. Ge ke na le mengwaga e 11, ke be ke šetše ke enwa bjala. Le ge ke be ke sa rate tatso ya bjona, ke be ke kgahlwa ke go tagwa. Gape ke be ke rata mmino le go bina. Ge sebaka se be se bulega, ke be ke eya meletlwaneng le di-nightclub. Ke be ke tlwaetše go tšwa bošego gomme ke boe ka masa. Letšatšing le le latelago ke be ke sa ye sekolong ka baka la go lapa. Ge ke le sekolong, ke be ke enwa bjala ka nako ya sekolo.

Ke ile ka se šome gabotse ngwageng wa ka wa mafelelo sekolong. Ka baka la ge mma a be a sa tsebe gore ke lerabele go fihla kae, o ile a nyama a ba a galefa. Re ile ra ngangišana ke moka ka tšhaba gae. Ke ile ka tšea nakwana ke dula le lesogana la ka Tony, yo e bego e le le-Rasta. E be e le sekebekwa, a rekiša diokobatši e bile a tumile ka go galefa o šoro. Go se go ye kae, ke ile ka ima gomme ka belega morwa wa rena ke na le mengwaga e 16.

 KAMOO BEIBELE E FETOTŠEGO BOPHELO BJA KA

Ke kopane le Dihlatse tša Jehofa la mathomo ge ke be ke dula hosetele yeo go dulago bomma bao ba sa nyalwago le bana ba bona. Bahlankedi ba mmušo ba be ba mphile phapoši moo. Basadi ba babedi ba Dihlatse ba be ba fela ba etela bomma ba bangwe bao e sa lego bafsa. Ka letšatši le lengwe ke ile ka ba le bona ge ba boledišana. Ke be ke ikemišeditše go bontšha Dihlatse gore di fošitše. Lega go le bjalo, di ile tša araba dipotšišo tša ka tše dintši gabotse di diriša Beibele. Dihlatse di be di le botho e bile di le bonolo, e lego selo seo se bego se nkgahla. Ka gona ke ile ka dumela go ithuta Beibele le tšona.

Ke ile ka ithuta selo se sengwe ka Beibeleng seo se ilego sa fetoša bophelo bja ka. Ke be ke tšhaba go hwa go tloga ge ke be ke sa le ngwana. Ga bjale ke ithutile seo se rutilwego ke Jesu ka tsogo! (Johane 5:28, 29) Ke ithutile gape gore Modimo o na le taba le nna. (1 Petro 5:7) Ke ile ka kgongwa kudu ke mantšu a Jeremia 29:11, ao a rego: “‘Ka gobane nna ke tseba gabotse menagano yeo ke e naganago ka lena,’ o re’alo Jehofa, ‘e lego menagano ya khutšo, e sego ya bošula, gore ke le nee bokamoso le kholofelo.’” Ke ile ka thoma go dumela gore nka ba le kholofelo ya go phela ka mo go sa felego Paradeiseng mo lefaseng.Psalme 37:29.

Dihlatse tša Jehofa di be di mpontšha lerato la kgonthe. Ge ke be ke thoma go ya moo di bokanago gona, batho ka moka ba be ba na le bogwera e bile ba mpontšha lerato! (Johane 13:34, 35) Ba be ba ntshwere gabotse kudu ge ke bapetša le kamoo ke ilego ka swarwa ka gona kerekeng. Dihlatse di ile tša nkamogela go sa šetšwe boemo bja ka. Di ile tša ipha nako ya ka, tša ntlhokomela le go nthuša ka dilo tše dintši. Ke ile ka ikwa eka ke karolo ya lapa le legolo leo le nago le lerato.

Ge ke le gare ke ithuta Beibele, ke ile ka lemoga gore ke swanetše go dira diphetogo e le gore ke itshware ka tsela yeo e kgahlišago Modimo. Go be go se bonolo gore ke tlogele go kgoga motšoko. Ke ile ka ba ka fetoša le mohuta wa mmino wo ke bego ke o theetša ka ge o be o ntira gore ke kganyoge go kgoga patše. Ke ile ka se sa ya meletlwaneng le di-nightclub e le gore ke se ke ka lekega go tagwa, ka ge ke be ke nyaka go dula ke hlaphogetšwe. Ke ile ka nyaka bagwera ba bafsa bao tutuetšo ya bona e botse e bego e tla nthuša go fetoša tsela yeo ke bego ke phela ka yona.Diema 13:20.

Ka nako e swanago, Tony le yena o be a ithuta Beibele le Dihlatse tša Jehofa. Ge Dihlatse di be di araba dipotšišo tša gagwe di diriša Beibele, le yena o ile a kgodišega gore o be a ithuta therešo. O ile a dira diphetogo tše dikgolo bophelong bja gagwe: o ile a kgaogana le bagwera ba gagwe ba pele ba bašoro, a tlogela bokebekwa a ba a kgaotša go kgoga patše. Ka ge re be re tloga re nyaka go thabiša Jehofa, re ile ra dira diphetogo boitshwarong bja rena le go dira gore morwa wa rena a golele lefelong leo le bolokegilego. Re ile ra nyalana ka 1982.

Ke gopola ke nyaka ka dimakasineng tša Morokami le Phafoga! * ke nyaka ditaba tšeo di bego di bolela ka batho bao ba bego ba kgonne go dira diphetogo tšeo ke bego ke nyaka go di dira. Ke ile ka kgothatšwa kudu ke mehlala ya bona! Ke ile ka kwa ke na le matla a gore ke tšwele pele ke leka go e na le gore ke lahlele toulo. Ke ile ka dula ke rapela Jehofa gore a se ke a ntahla. Nna le Tony re ile ra kolobetšwa ra ba Dihlatse tša Jehofa ka July 1982.

KAMOO KE ILEGO KA HOLEGA KA GONA

Go gwerana le Jehofa Modimo go phološitše bophelo bja ka. Nna le Tony re bone Jehofa a re thekga ge dilo di be di be di sa re sepelele gabotse bophelong. Re ithutile go ithekga ka Modimo dinakong tša mathata, gomme ka mehla re bona a thuša le go thekga lapa la rena.Psalme 55:22.

Ke thabetše go thuša morwa le morwedi ba rena go tseba Jehofa bjalo ka nna. Ga bjale ke a thaba ge ke bona bana ba bona ba gola ba tseba ka Modimo.

Ga ke sa felelwa ke boroko bošego ke tshwenyegile ka bokamoso goba ka lehu. Nna le Tony re swaregile ka go etela diphuthego tša Dihlatse tša Jehofa beke le beke re yo di kgothatša. Re ba le tšona ge di ruta ba bangwe gore ge e ba ba ka dumela go Jesu, le bona ba ka thabela bophelo bjo bo sa felego.

^ par. 17 Le tšona di gatišitšwe ke Dihlatse tša Jehofa.

“Ga ke sa felelwa ke boroko bošego ke tshwenyegile ka bokamoso goba ka lehu”

Ithute ka mo go oketšegilego

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?