Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2015

Na Petro e be e le Mopapa wa Mathomo?

Na Petro e be e le Mopapa wa Mathomo?

“Mokadinale Jorge Mario Bergoglio, S.J., o kgethilwe go ba Mopapa yo a Phagamego, e le mohlatlami wa bo-265 wa Petro.”—VATICAN INFORMATION SERVICE, VATICAN CITY, MARCH 13, 2013.

“Mopišopo wa Roma o swanelwa ke go ba yo a phagamego kudu go feta batho ka moka ka Kerekeng, ka ge e le mohlatlami wa Mokgethwa Petro, yoo a hweditšego tokelo yeo e kgethegilego go Jesu Kriste.”—THE PRIMACY OF THE BISHOP OF ROME DURING THE FIRST THREE CENTURIES, 1903, KA VINCENT ERMONI.

“Ka gona, ge e ba motho le ge e le ofe a ka bolela . . . gore Mopapa wa Roma ga se mohlatlami wa Mošegofatšwa Petro tabeng ye ya go ba ga gagwe yo a phagamego; gona a rogakwe [ke gore, a tsebatšwe e le mohlanogi].” —LEKGOTLA LA MATHOMO LA VATICAN, JULY 18, 1870.

MAKATHOLIKA a dimilione lefaseng ka bophara a tšea tsebišo ya 1870 ya Lekgotla la pele la Vatican e le thuto yeo e ka se kego ya fetošwa le yeo e swanetšego go latelwa ya kereke. Lega go le bjalo, re swanetše go ipotšiša gore: Na ke thuto yeo e theilwego Mangwalong? Go oketša moo, na ruri Mopapa Francis ke mohlatlami wa moapostola Petro? Le gona na Petro e be e le mopapa wa mathomo?

“MO LESWIKENG LE KE TLA AGA PHUTHEGO YA KA”

Tsebišo ya 1870 ya Lekgotla la Vatican e be e theilwe kudu tlhalosong ya lona ya Mateo 16:16-19 le Johane 21:15-17. Dipoledišano tša Jesu le Petro tšeo re balago ka tšona mangwalong a gotee le dipegong tše dingwe tša Beibele, di bontšha gore moapostola Petro o kgathile tema e bohlokwa historing ya Bokriste bja lekgolong la pele la nywaga. Ge e le gabotse, ge ba be ba thoma go kopana, Jesu o ile a bolela e sa le pele gore Petro o be a tla bontšha dika tša go swana le tša leswika bophelong bja gagwe. (Johane 1:42) Eupša na Kriste o ile a phagamiša Petro?

Go Mateo 16:17, 18, re hwetša mantšu a Jesu ao a a botšago Petro a rego: “Ke re go wena, ke wena Petro [yoo leina la gagwe le bolelago gore “Leswika”], gomme leswikeng le ke tla aga kereke ya ka.” * Na Jesu o be a era gore “kereke” ya gagwe, goba phuthego, e be e tla agwa godimo ga Petro e le motho? Na Petro e be e tla ba hlogo ya balatedi ka moka ba Jesu? Baapostola ba bangwe bao ba bego ba le gona poledišanong yeo ba ile ba kwešiša bjang mantšu a Jesu? Diebangedi di utolla gore ka morago ga moo, ba ile ba ngangišana ka makga a mmalwa mabapi le gore ke mang yo e lego yo mogolo go ba feta. (Mateo 20:20-27; Mareka 9:33-35; Luka 22:24-26) Ge e ba e le gore Jesu o be a šetše a phagamišitše Petro, na baapostola ba be ba ka botšišana gore ke mang yo e lego yo mogolo go ba feta?

Petro yena o ile a kwešiša bjang mantšu a Jesu? Ka ge Petro a gotše e le Moisiraele, a ka ba a be a tseba diporofeto tše di fapafapanego tša Seheberu tšeo di bolelago ka “leswika” goba ‘leswika la sekhutlo.’ (Jesaya 8:13, 14; 28:16; Sakaria 3:9) Ge a be a tsopolela badumedigotee  le yena e nngwe ya tšona lengwalong leo a ba ngwaletšego lona, Petro o ile a hlalosa gore “leswika la sekhutlo” leo go porofetilwego ka lona e be e le Morena Jesu Kriste, yena Mesia. Petro o ile a diriša lentšu la Segerika la pe’tra (e lego lentšu lona leo le hwetšwago mantšung a Jesu go Mateo 16:18) bakeng sa Kriste a nnoši.—1 Petro 2:4-8.

Moapostola Paulo e be e le molatedi yo mongwe yo a botegago wa Jesu. Na Paulo o be a dumela gore Jesu o be a phagamišitše Petro? Ge Paulo a bolela ka boemo bja Petro phuthegong ya Bokriste ya lekgolong la pele la nywaga, o ngwadile gore Petro o be a le gare ga bao “ba bego ba bonagala e le dikokwane.” Go ya ka Paulo, go be go na le “dikokwane” tše fetago e tee. (Bagalatia 2:9) Go feta moo, ge e ba Petro a be a kgethilwe ke Jesu gore e be hlogo ya phuthego, o be a ka bonagala bjang, ke gore, badumedigotee le yena ba be ba ka nagana bjang gore ke kokwane?

Ge a ngwala mabapi le ditsela tše itšego tše di sa swanego tšeo Petro a bego a swara batho ka tšona, Paulo o ile a bolela ka tlhompho le ka tsela e lebanyago a re: “Ka mo ganetša re lebantše difahlego, gobane o be a tloga a fošitše.” (Bagalatia 2:11-14) Paulo ga se a ka a nagana gore Kriste o agile kereke, goba phuthego ya gagwe, godimo ga Petro goba motho le ge e le ofe yo a sa phethagalago. Go e na le moo, o be a dumela gore phuthego e agilwe godimo ga Jesu Kriste e le motheo. Go ya ka Paulo, “leswika leo le be le emela Kriste.”—1 Bakorinthe 3:9-11; 10:4.

“KE WENA PETRO . . .”

Re swanetše go kwešiša bjang mantšu a rego: “Ke wena Petro, gomme leswikeng le ke tla aga kereke ya ka”? E le gore re kwešiše tsopolo yeo gabotse, re swanetše go bala taba yeo e e dikologilego. Jesu le Petro ba be ba bolela ka eng? Jesu o be a sa tšwa go botšiša barutiwa ba gagwe gore: “Le re ke nna mang?” Petro o ile a araba ntle le go dikadika a re: “Ke wena Mesia, Morwa wa Modimo yo a phelago.” Ge Petro a re’alo, Jesu o ile a mo reta gomme a oketša ka gore o be a tla aga “kereke,” goba phuthego ya gagwe godimo ga “leswika” leo le tiilego kudu, lona leo Petro a bego a sa tšwa go dumela go lona, e lego Jesu ka boyena.—Mateo 16:15-18.

Re swanetše go kwešiša bjang mantšu a Jesu a rego: “Ke wena Petro, gomme leswikeng le ke tla aga kereke ya ka”?

 Ka go dumelelana le se, “Botate [ba bantši] ba Kereke” ba ile ba ngwala gore leswika leo go bolelwago ka lona go Mateo 16:18 le emela Kriste. Ka mohlala, lekgolong la bohlano la nywaga Augustine o ngwadile gore: “Morena o itše: ‘Leswikeng le ke tla aga Kereke ya ka,’ ka gobane Petro o be a mmoditše gore: ‘Ke wena Kriste Morwa wa Modimo yo a phelago.’ Ka baka leo, ke tla aga Kereke ya ka godimo ga leswika le leo o boletšego ka lona.” Augustine o boletše leboelela gore “Leswika leo (Petra) le be le emela Kriste.”

Augustine le ba bangwe ba be ba tla tšewa e le bahlanogi ge ba be ba ka ahlolwa go ya ka thuto ya gona bjale ya Kereke ya Katholika. Ge e le gabotse, go ya ka rathutatumelo wa Switzerland e lego Ulrich Luz, go dumelelana ka kgopolo ga diithuti tša Beibele tabeng ye lehono nkabe go ile gwa ahlolwa ke Lekgotla la Vatican la 1870 e le bohlanogi.

MOPAPA— NA KE MOHLATLAMI WA PETRO?

Moapostola Petro o be a sa tsebe sereto sa “mopapa.” Ge e le gabotse, bapišopo ba bantši bao e sego Baroma ba be ba ipitša ka sereto se go fihla lekgolong la senyane la nywaga. Lega go le bjalo, sereto se se be se dirišwa ka sewelo e le sa molao go fihlela go yela bofelong bja lekgolong la bo-11 la nywaga. Go feta moo, ga go na Mokriste wa lekgolong la pele la nywaga yo a bego a nagana gore go phagamišwa ga Petro, go ya kamoo ba bangwe ba naganago ka gona, go ile gwa fetišetšwa go bahlatlami le ge e le bafe. Ka baka leo, seithuti sa Mojeremane e lego Martin Hengel o phethile ka gore “ga go na tsela ya histori le ya tša thutatumelo yeo e hlalosago seo ka morago se ilego sa tsebja e le ‘go phagamišwa’ ga mopapa.”

Go ruma taba: Na Petro e be e le mopapa wa mathomo? Na o ile a ba le bahlatlami? Na thuto ya Kereke ya Katholika ya go phagamišwa ga mopapa e theilwe Mangwalong? Karabo feela e nepagetšego ya potšišo e nngwe le e nngwe ya tše ke aowa. Lega go le bjalo, ntlha ke gore ga go pelaelo gore Jesu o ile a aga kereke ya gagwe, e lego phuthego ya gagwe ya therešo, godimo ga gagwe. (Baefeso 2:20) Ka gona, yo mongwe le yo mongwe wa rena a ka ipotšiša potšišo e bohlokwa e rego, Na ke hweditše phuthego yeo ya therešo?

^ par. 8 Ditsopolo ka moka tše di tšwago ka Beibeleng sehlogong se di tšerwe go New American Bible ya Katholika, e lego phetolelo yeo e dirišwago wepesaeteng ya semmušo ya Vatican.

Ithute ka mo go oketšegilego

Na Bakriste ba Swanetše go Diriša Direto tša Bodumedi?

Direto “mohlomphegi” le “mopishopo” di tlwaelegile. Na direto tše bjalo le tše dingwe di dumelelwa ke Beibele?