Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2015

 TABA YA LETLAKALA LA KA NTLE | O KA KWEŠIŠA BEIBELE

Go Hwetša Thušo ya go Kwešiša Beibele

Go Hwetša Thušo ya go Kwešiša Beibele

Nagana o thoma go etela nageng e šele. O kopana le batho bao o sa ba tsebego gotee le metlwae, tšhelete le dijo tšeo o sa di tlwaelago. Go a kwešišega gore o ka ikwa o gakanegile.

O ka ikwa ka tsela e swanago ge o thoma go bala Beibele. E go iša lefaseng la bogologolo leo go bonalago o sa le tlwaela. Ge o le moo o kopana le batho bao ba bitšwago Bafilisita, o kopana le metlwae yeo o sa e tlwaelago e bjalo ka ‘go gagola diaparo,’ goba o kwa ka dijo tšeo di bitšwago manna le tšhelete ya tšhipi yeo e tsebjago e le terakema. (Ekisodo 16:31; Joshua 13:2; 2 Samuele 3:31; Luka 15:9) Tše ka moka di ka go gakantšha. Go fo swana le ge o etela nageng e šele, na o be o ka se thabele gore motho yo mongwe a go hlalosetše dilo tše itšego?

THUŠO YA NAKONG E FETILEGO

Go tloga ge mangwalo a makgethwa a be a thoma go ngwalwa lekgolong la bo-16 la nywaga B.C.E., batho ba ile ba thušwa go a kwešiša. Ka mohlala, moetapele wa mathomo wa setšhaba sa Isiraele e lego Moshe “o ile a hlalosa” seo se bego se ngwadilwe.—Doiteronomio 1:5.

Barutiši bao ba swanelegago ba Mangwalo ba be ba sa dutše ba le gona le nywagakgolong e lesome ka morago. Ka 455 B.C.E., sehlopha se segolo sa Bajuda seo se akaretšago bana ba bantši, se be se phuthegetše borekišetšong bja motse wa Jerusalema. Barutiši ba Beibele ba be ba le moo ba “bala puku [yona yeo e kgethwa] . . . ka go hlaboša.” Eupša ba dirile go gontši. “[Ba thušitše] gore batho ba kwešiše seo se balwago.”—Nehemia 8:1-8.

Ka morago ga nywagakgolo e mehlano, Jesu o ile a swarega ka modiro o swanago wa go ruta. Ge e le gabotse, batho ba be ba mo tseba e le morutiši. (Johane 13:13) O ile a ruta mašaba le batho ka o tee ka o tee. Lebakeng le lengwe o ile a bolela le lešaba le legolo a nea Thuto e tumilego ya Thabeng, gomme “mašaba a ile a tlabja kudu ke tsela ya gagwe ya go ruta.” (Mateo 5:1, 2; 7:28) Sehleng sa seruthwane sa 33 C.E., Jesu o ile a boledišana le barutiwa ba gagwe ba babedi ge ba be ba lebile motsaneng wa kgaufsi le Jerusalema a ba “bulela Mangwalo ka mo go feletšego.”—Luka 24:13-15, 27, 32.

Barutiwa ba Jesu le bona e be e le barutiši ba Lentšu la Modimo. Lebakeng le lengwe, letona la kgoro la Moethiopia le be le bala taba e itšego ka Mangwalong. Morutiwa yo a bego a bitšwa Filipi o ile a ya go lona gomme a le botšiša gore: “Na ruri tše o di balago o a di kwešiša?” Moethiopia o ile a araba ka gore: “Ruri, nka kgona bjang go kwešiša ka ntle le gore motho yo mongwe a ntlhahle?” Ke moka Filipi o ile a mo hlalosetša seo se bolelwago ke taba yeo.—Ditiro 8:27-35.

THUŠO E A HWETŠAGALA LEHONO

Ka go swana le barutiši ba Beibele ba nakong e fetilego, Dihlatse tša Jehofa lehono di swaregile ka modiro wa go ruta batho Beibele dinageng tše 239 lefaseng ka bophara. (Mateo 28:19, 20) Beke e nngwe le e nngwe di thuša batho ba fetago dimilione tše senyane go kwešiša Beibele. Ba bantši ba barutwana bao ga se Bakriste. Dithuto tše ke mahala e bile di ka swarelwa legaeng la motho goba lefelong le ge e le lefe leo a le kgethago. Batho ba bangwe ba bile ba thabela go swarelwa dithuto ka mogala goba bidio, ba diriša khomphutha goba sedirišwa se sengwe sa elektroniki.

Hle ikopanye le yo mongwe wa Dihlatse tša Jehofa bakeng sa go hwetša tsebišo mabapi le kamoo o ka holwago ke thulaganyo ye. O tla hwetša gore go e na le gore Beibele e be puku yeo e sa kwešišegego, e “hola ka go ruta, go kgala, go phošolla le go laya ka toko,” e le gore o ‘swanelege ka botlalo, o hlangwe ka mo go feletšego bakeng sa modiro o mongwe le o mongwe o mobotse.’—2 Timotheo 3:16, 17.

 

Ithute ka mo go oketšegilego

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?

Ke Eng Seo se Diregago Thutong ya Beibele?

Lefaseng ka bophara, Dihlatse tša Jehofa di tsebega ka go etela batho magaeng a bona go ba swarela thuto ya mahala ya Beibele. Bona kamoo e swarwago ka gona.

Lenaneo la go Ithuta Beibele Bakeng sa Bohle

Hwetša dikarabo tša dipotšišo tše seswai tšeo di botšišwago kudu tša mabapi le lenaneo la rena la go ithuta Beibele.